ޕްރޮސެކިއުޓަރ ޖެނެރަލް އަކަށް ހުންނެވި އައިޝަތު ބިޝާމް އިސްތިއުފާ ނުދެއްވައި، ޤާނޫނު ނެގެހެއްޓުމަށް ސާބިތުކަމާ އެކު ދެމިހުންނެވުމަށް ގުޅިފައިވާ ޕާޓީތަކުން ގޮވާލައިފިއެވެ.
ގުޅިފައިވާ ޕާޓީތަކުން މިހެން ގޮވާލާފައި މިވަނީ ރާއްޖޭގައި މިހާރު ކުއްލި ނުރައްކަލުގެ ޙާލަތެއް ނެތް ކަމަށާއި ކުއްލި ނުރައްކަލުގެ ހާޅަތުގައި ބަންދުކޮށްފައިވާ އެންމެހާ ފަރާތްތައް ވަގުތުން ދޫކޮށްލުމަށް ޕްރޮސެކިއުޓަރ ޖެނެރަލް އައިޝަތު ބިޝާމް އެންގެވުމާ ގުޅިގެން ސަރުކާރުން ކުރަމުންދާ ޕްރެޝަރތަކާ ހެދި އިސްތިއުފާ ދެއްވަން އުޅޭ ކަމުގެ އަޑުތަކެއް ފެތުރިފައި ވަނިކޮށެވެ.
ގުޅިފައިވާ ޕާޓީތަކުން މ. ކުނޫޒްގައި ބޭއްވި ޕްރެސް ކޮންފަރެންސެއްގައި ވިލިނގިލީ ދާއިރާގެ މެންބަރު ސައުދު ހުސައިން ވިދާޅުވީ ރައްޔިތުންގެ މަޖިލީހުން ސްޓޭޓް އޮފް އިމަޖެންސީއާ ގުޅޭ ގޮތުން މަޖިލީހުން ނިންމި ނިންމުމަކީ ރާއްޖޭގެ ޤާނޫނުއަސާސީއާ ޚިލާފަށް ނިންމާފައި ނިންމުމެއް ކަމަށާއި އެހެންކަމުން ކުއްލި ނުރައްކަލުގެ ހާލަތެއް ނެތް ކަމަށާއި ކުއްލި ނުރައްކަލުގެ ހާލަތުގައި ހައްޔަރުކޮށްފައިވާ ހުރިހާ ފަރާތްތައް ދޫކޮށްލުމަށް ފުލުހުންނަށާއި ކަމާ ބެހޭ އެންމެހާ ފަރާތްތަކަށް ޕީޖީ ބިޝާމް އިރުޝާދު ދެއްވާފައި ކަމަށް އިއްޔެއިން ފެށިގެން ރާއްޖޭގެ މީޑިޔާތަކުގައި އަޑު ފެތުރިފައިވާ ކަމަށެވެ.
"އަޅުގަނޑު މިފުރުސަތުގައި ޕީޖީއަށް ޤާނޫނުއަސާސީން ލިބިދޭ ޤާނޫނީ ޒިންމާ އަދާކުރުމަށް އެކަމަނާ އެނެންގެވި ޑިޒިޝަންއަށް ގުޅިފައިވާ ޕާޓީތަކުން މަރުހަބާ ކިޔަން. އަޅުގަނޑުމެން އެދެނީ ޕީޖީގެ އެގޮވާލެއްވުމަށް ދައުލަތުގެ އެންމެހާ ފަރާތްތަކުން ޢަމަލް ކުރެއްވުމަށް. އަޅުގަނޑު ޤަބޫލް ކުރާ ގޮތުގައި މިކަމާ ގުޅިގެން ޕީޖީއަށް މިކަމާ ގުޅިގެން ކޮންމެވެސް ކަހަލަ ސިޔާސީ ނުފޫޒްތަކެއް އަންނާނެކަން ކަށަވަރު މިހާރު މިފެންނަ މަންޒަރުން. އެހެންވީމާ ޕީޖީއަށް އަޅުގަނޑުމެން ގޮވާލަން ޕީޖީއަކީ ވަކި ބާރެކޭ. ސާބިތުކަމާއެކީގައި ހުންނަވާށޭ މިޤާނޫން އަސާސީގެ ހަމަތައް ހިފަހައްޓައި ދެއްވާށޭ މިޤާނޫން އަސާސީން ބޭރުވެފައިވާ ހުރިހާ ކަންކަން ޤާނޫން އަސާސީގެ ތެރެއަށް ވެއްދުމަށްޓަކައި ޕީޖީ ތި ނެންގެވި ޑިޒިޝަންއަށް އަޅުގަނޑުމެން މަރުހަބާ ކިޔަމޭ އިސްތިއުފާ ނުދެއްވާ ކުރިއަށް ވަޑައިގަންނަވާށޭ. އަޅުގަނޑުމެން މިތިބީ ކަމަނާގެ ފަހަތުގައޭ" ސައުދު ވިދާޅުވިއެވެ.
