ސުކޫލްގެ ދެވަނަ ޓާރމް އިން ފެށިގެން ހުރިހާ ސުކޫލެއް ވައިފައިކޮށް ޓެބްލެޓްގެ އެހީގައި ކިޔަވައިދޭން ފެށޭނެ ކަމަށް ރައީސުލް ޖުމްހޫރިއްޔާ އަބްދުﷲ ޔާމީން އަބްދުލް ޤައްޔޫމް ވިދާޅުވެއްޖެއެވެ.
ބުދަ ދުވަހުގެ ރޭ ރިޔާސީ ބަޔާން އިއްވުމަށްޓަކައި ދަރުބާރުގޭގައި ބޭއްވި ޖަލްސާގައި ވާހަކަފުޅު ދައްކަވަމުން ރައީސް ޔާމީން ވިދާޅުވީ ރާއްޖޭގެ ސްކޫލް ނިޒާމްއަކީ ތިމާވެއްޓާ ރައްޓެހި ނިޒާކަމަށް ހެދުމުގެ މަސައްކަތް ވަނީ ފައްޓަވާފައިވާ ކަމަށާއި ހުރިހާ ސްކޫލެއް ވައިފައިކޮށް ގްރޭޑް އެކަކުން ފެށިގެން 12 އަށް ކިޔަވާ ކުދިންނަށް ޓެބްލެޓް ލިބިގެންދާނެ ކަމަށެވެ. އަދި މަތީ ތައުލީމް ހާސިލްކުރާ ކުދިންގެ ނިސްބަތް 32 ޕަސަންޓަށް ވަނީ އިތުރުކުރެވިފައިވާ ކަމަށް ވެސް ރައީސް ޔާމީން ވަނީ ފާހަގަކުރައްވާފައެވެ.
މީގެ އިތުރުން މި އަހަރުގެ އަމާޒަކީ މަތީ ތައުލީމް ހާސިލްކުރާ ކުދިންގެ ނިސްބަތް 60 ޕަސަންޓަށް އިތުރުކުރުން ކަމަށް ވެސް ރައީސް ޔާމީން ވިދާޅުވިއެވެ. އަދި ފަސް މާއްދާއިން ފާސްވާ ކުދިންގެ އަދަދު 75 ޕަސަންޓަށް އަރާފައިވާ ކަމަށް ވެސް ރައީސް ވިދާޅުވިއެވެ.
ސްކޫލްތައް ޑިޖިޓަލައިޒްކޮށް، މިއަހަރުގެ މެއި މަހުގެ ތެރޭގައި "ޓެބްލެޓް" ބޭނުން ކޮށްގެން ކިޔަވައި ދޭން ފެށޭނެ ކަމަށް އެޑިއުކޭޝަން މިނިސްޓަރު ޑރ. އާއިޝަތު ޝިހާމް ވެސް ވަނީ މިއަހަރުގެ ޖެނުއަރީ މަހު ވިދާޅުވެފައެވެ.
އެޑިއުކޭޝަން މިނިސްޓްރީން ޖެނުއަރީ މަހުގެ 10 ވަނަ ދުވަހު ދުވަހު ބޭއްވި ޕްރެސް ކޮންފަރެންސްގައި ވާހަކަ ދައްކަވަމުން ޑރ. އާއިޝަތު ޝިހާމް ވިދާޅުވީ ދަރިވަރުންނަށް ފެންވަރު ރަނގަޅު ތައުލީމެއް ފޯރުކޮށްދިނުމަށް ސަރުކާރުން ހިންގާ އެންމެ ބޮޑު އެއް މަޝްރޫއު ކަމަށްވާ ރާއްޖޭ ހުރިހާ ސްކޫލްތަކެއް ޑިޖިޓަލައިޒް ކުރުމުގެ މަޝްރޫއުގެ މަސައްކަތްތައް ކުރަމުންދާ ކަމަށާއި އެ މަސައްކަތްތައް 2017 ވަނަ އަހަރުން ފެށިގެން ކުރަމުންދާ ކަމަށާއި ކަމާބެހޭ ފަރާތްތަކާއެކު މަޝްވަރާތައް ވެސް ކުރެވެމުންދާ ކަމަށެވެ.
މިއީ އެޑިއުކޭޝަންގެ ދާއިރާއަށް މިހާތަނަށް ގެނެވޭ އެންމެ ބޮޑު އެއް ބަދަލުކަން އެޑިއުކޭޝަން މިނިސްޓްރީން ވަނީ ފާހަގަކޮށްފައެވެ.
