ޝެއިޚް އިމްރާނާ ބައްދަލުކުރަން އާއިލާއަށް ދިން ފުރުސަތު ކެންސަލް ކޮށްފި
16 ފެބުރުއަރީ 2018 | ހުކުރު 10:35ބައްދަލުވުން އޮތީ ހޮނިހިރު ދުވަހަށް ހަމަޖައްސާފައި
ޝައިޚް އިމްރާން: ބަންދުކުރީ ދެއްކެވި ވާހަކައަކުން
ޖަލުގައި ބަންދުކޮށްފައި ހުރި ޢަދާލަތު ޕާޓީގެ ރައީސް ޝައިޚް އިމްރާން ޢަބްދުﷲ އާ ބައްދަލު ކުރުމަށް ޢާއިލާއަށް ދީފައި އޮތް ފުރުސަތު ކެންސަލް ކޮށްފިއެވެ.
ޢަދާލަތު ޕާޓީގެ އޮފިޝަލަކު ވިދާޅުވީ ހޮނިހިރު ދުވަހު އިމްރާނާ ބައްދަލު ކުރުމަށް ޢާއިލާއަށް ދީފައިވާ ފުރުސަތު ކެންސަލް ކުރިކަން އަންގާފައިވާ ކަމަށާއި އެބައްދަލުވުން ކެންސަލް ކޮށްފައި ވަނީ ކުރިން އެއްވެސް އެންގުމެއް ނެތި ކުއްލި ގޮތަކަށް ކަމަށެވެ.
ރާއްޖެ އެމްވީއަށް މައުލޫމާތު ދެއްވަމުން އަދާލަތު ޕާޓީގެ އޮފިޝަލް ވިދާޅުވީ ކުއްލި ނުރައްކަލުގެ ޙާލަތު އިއުލާން ކުރިފަހުން ލިބުނު ފުރަތަމަ ބައްދަލުވުމަކީ މާދަމާއަށް ދީފައިވާ ބައްދަލުވުން ކަމަށާއި އެބައްދަލުވުން ވެސް ކެންސަލް ކުރުމުން އާއިލާއިން ތިބީ ނުހަނު ކަންބޮޑުވުމާއެކުގައި ކަމަށެވެ.
މިމަހުގެ 1 ވަނަ ދުވަހު ސުޕްރީމް ކޯޓުން ކުރި އަމުރު ތަންފީޒް ނުކޮށް ރައީސް ޔާމީން އިއުލާން ކުރެއްވި ކުއްލި ނުރައްކަލުގެ ޙާލަތާއެކު ގޭ ބަންދަށް ގެނެސް ހުރި ކުރީގެ ޑިފެންސް މިނިސްޓަރ ކާނަލް ނާޒިމްވެސް ވަނީ އަނބުރާ ޖަލަށް ގެންގޮސްފައެވެ. އަދި ޖަލުގައި ތިބި ބައެއް ފަރާތްތައްވެސް ކުރިން ބައިތިއްބާފައި ތިބި ޖަލު ނޫން އެހެން ޖަލަކަށް ބަދަލުވެސް ކޮށްފައެވެ.
