ރައީސް މައުމޫންގެ ހާލުކޮޅު ސާފެއް ނުވޭ، ދޫނިދޫއަށް ބަދަލުކުރިކަންވެސް އާއިލާއަށް ނާންގާ: ޔުމްނާ
16 ފެބުރުއަރީ 2018 | ހުކުރު 09:23މައުމޫން ހައްޔަރުކުރީ ފެބްރުއަރީ ފަސްވަނަ ދުވަހުގެރޭ
ކުރީގެ ރައީސުލްޖުމްހޫރިއްޔާ އަލްއުސްތާޛް މައުމޫން ޢަބްދުލްޤައްޔޫމް
ކުއްލި ނުރައްކަލުގެ ހާލަތު ހިންގައި، ހައްޔަރުކޮށްފައިވާ ކުރީގެ ރައީސުލްޖުމްހޫރިއްޔާ މައުމޫން ޢަބްދުލްޤައްޔޫމް ހުންނެވި ހާލުކޮޅެއް ސާފު ނުވާ ކަމަށާއި، ކުއްލި ގޮތަކަށް އެމަނިކުފާނު މާފުށީ ޖަލުން ދޫނިދޫ ޑިޓެންޝަން ސެންޓަރަށް ބަދަލުކުރިކަން އާއިލާއަށް އަންގާފައިވެސް ނުވާކަމަށް އެމަނިކުފާނުގެ ދަރިކަނބަލުން ޔުމްނާ މައުމޫން ވިދާޅުވެއްޖެއެވެ.
ފެބްރުއަރީ 5 ވަނަ ދުވަހުގެރޭ ރާއްޖޭގައި ކުއްލި ނުރައްކަލުގެ ހާލަތު އިޢުލާނު ކުރުމަށްފަހު، ސަރުކާރު ވައްޓާލަން އުޅޭ ކަމުގެ ތުޙުމަތުގައި ހައްޔަރު ކޮށްފައިވާ ރައީސް މައުމޫން އެންމެ ފުރަތަމަ ހައްޔަރުގައި ބަހައްޓާފައިވަނީ ދޫނިދޫ ޑިޓެންޝަން ސެންޓަރުގައެވެ. އަދި އޭގެ ފަހުން މާފުށީ ޖަލަށް އެމަނިކުފާނު ބަދަލުކުރުމަށްފަހު، ކުއްލި ގޮތަކަށް އަނެއްކާވެސް ދޫނިދޫއަށް ބަދަލުކޮށްފައިވަނީ ބުރާސްފަތި ދުވަހުގެ އިރުއޮއްސުނު ވަގުތުއެވެ.
ރައީސް މައުމޫން ދޫނިދޫއަށް ބަދަލުކުރިކަން ދޫނިދޫ ކަސްޓޯޑިއަލްއިން އެމަނިކުފާނުގެ އާއިލާއަށް އަންގާފައި ނުވާއިރު، ޔުމްނާ ހާމަކުރައްވާފައިޥާ ގޮތުގައި ރައީސް މައުމޫން ހުންނެވީ ދޫނިދޫގައިކަން ކަށަވަރުވީ، ބުރާސްފަތި ދުވަހުގެރޭ އެކަމަނާ، ރައީސް މައުމޫންގެ އިންވެސްޓިގޭޝަން އޮފިސަރަށް ގުޅުއްވައި ސުވާލުކުރެއްވުމުންނެވެ.
ޔުމްނާ ވިދާޅުވީ ހުކުރު ދުވަހުގެ މެންދުރާއި ހަމައަށްވެސް ރައީސް މައުމޫން އާއި އާއިލާއާއި ގުޅޭގޮތް ވެފައި ނުވާ ކަމަށާއި، އެހެކަމުން އެމަނިކުފާނު ހުންނެވި ހާލަތެއް އާއިލާއަށް ސާފުނުވާ ކަމަށެވެ.
ރައީސް މައުމޫންގެ ޤާނޫނީ ވަކީލު، މައުމޫން ހަމީދު ވިދާޅުވީ، މިފަދަ ކުއްލި ބަދަލުތަކާއިއެކު، ރައީސް މައުމޫންގެ ހާލުކޮޅާއިމެދު ކަންބޮޑުވުން އުފެދޭ ކަމަށެވެ. ބުރާސްފަތި ދުވަހުގެރޭ މައުމޫން ހަމީދު ވަނީ އެ މައްސަލަ ހިއުމަން ރައިޓްސް ކޮމިޝަނަށްވެސް ހުށަހަޅުއްވައި، އެ ކޮމިޝަންގެ ރެޕިޑް އެކްޝަން ފޯސް ދޫނިދޫއަށް ފޮނުވައިދިނުމަށް އެދިވަޑައިގެންފައެވެ. ނަމަވެސް އެޗްއާރްސީއެމްއިން އެކަމާއި ގުޅިގެން އެއްވެސް މަސައްކަތެއް ކުރިކަން އެ ކޮމިޝަނުންވެސް އަދި ރަސްމީ އެހެން ފަރާތަކުންވެސް ހާމަކޮށްފައެއް ނުވެއެވެ.
