ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމްގެ އެދިވަޑައިގަތުމަށް ކުރީގެ ރައީސް މައުމޫން ޢަބްދުލްޤައްޔޫމާއި، އުއްތަމަ ފަނޑިޔާރު ޢަބްދުﷲ ސައީދާއި، ފަނޑިޔާރު އަލީ ހަމީދާއި ބައްދަލު ކުރެއްވުމުން އެ ތިން ބޭފުޅުން ސިޔާސީ ވާހަކަފުޅު ދެއްކެވި ކަމަށް މިނިސްޓަރ އޮފް ހައުސިންގ އެންޑް އިންފްރާސްޓްރަކްޗަރ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ޤާނޫނީ ގޮތުން އުފެދިފައިވާ ސަރުކާރު ޤާނޫނާ ޚިލާފަށް ބަދަލުކުރުމަށް މަސައްކަތް ކުރެއްވުމާ ރިޝްވަތާ ގުޅޭ އެކި މައްސަލަތަކުގެ ތުޙުމަތުކޮށް، ކުއްލި ނުރައްކަލުގެ ޙާލަތުގެ ނިވަލުގައި، ކޯޓު އަމުރަކާ ނުލައި ހައްޔަރުކޮށްފައިވާ މި ތިން ބޭފުޅުންނާ ރައީސް ޔާމީންގެ ޚާއްސަ މަންދޫބެއްގެ ޙައިސިއްޔަތުން މުއިއްޒު ވަނީ ބުދަ ދުވަހު ބައްދަލު ކުރައްވާފައެވެ.
ޕީޕީއެމުން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން މުއިއްޒު ވިދާޅުވީ އެ ބައްދަލުވުންތަކުގައި ސިޔާސީ ވާހަކަ ދައްކަވަން އެ ތިން ބޭފުޅުން ވެސް މަސައްކަތްޕުޅު ކުރެއްވި ކަމަށެވެ. އެހެންނަމަވެސް އެ ތިން ބޭފުޅުންނާއި ބައްދަލުކުރެއްވީ ސިޔާސީ ވާހަކަ ދައްކަވަން ނޫންކަން ފާހަގަކުރަމުން މުއިއްޒު ވިދާޅުވީ ރައީސް ޔާމީންގެ ހާއްސަ މަންދޫބެއްގެ ހައިސިއްޔަތުން ވެސް އަމިއްލަ ހައިސިއްޔަތުން ވެސް ސިޔާސީ ވާހަކަ އެބޭފުޅުންނާއި ދައްކަވާފައިނުވާނެ ކަމަށެވެ.
" އެތިން ބޭފުޅުން އެ ވާހަކަތަކުގެ އިތުރަށް ސިޔާސީ ވާހަކަތައް ދެއްކެވި، ދައްކަވަން މަސައްކަތް ކުރެއްވި، އެހެން ނަމަވެސް އަޅުގަނޑު އެއިން އެއްވެސް ވާހަކައަކަށް އެއްވެސް އެއްޗެއް ނުދަންނަވަން. އަޅުގަނޑު އެވާހަކަތަކަށް އެއްވެސް ރައްދެއް ނުދީ، އެވާހަކަތަކަށް ނުދައްކަވާ، އަޅުގަނޑުގެ ޒިންމާ އަދާކޮށްފައި މާލެ އައީ" މުއިއްޒު ވިދާޅުވިއެވެ.
މުއިއްޒު ވިދާޅުވީ ރައީސްގެ ހާއްސަ މަންދޫބެއްގެ ގޮތުން އެ ތިން ބޭފުޅުންނާއި ބަދައްލު ކުރެއްވީ އެބޭފުޅުންގެ ސިއްހީ ހާލުކޮޅާއި، އެބޭފުޅުންގެ ކަންކަމުގެ އިންތިޒާމްތައް ބައްލަވާ ލެއްވުމަށް ކަމަށެވެ. އެ ތިން ބޭފުޅުންގެ ސިއްހީ ހާލުކޮޅާއި، ހުރިހާ އިންތިޒާމްތައް ވަރަށް ރަނގަޅަށް ހަމަޖައްސައިދީފައިވާ ކަމަށާއި، އެކަން އެބޭފުޅުން އުފަލާއި އެކު ފާހަގަ ކުރެއްވި ކަމަށް މުއިއްޒު ވިދާޅުވިއެވެ.
