ވަކީލުންގެ ބައްދަލުވުމުގެ ވަގުތު ކުޑަކުރީ ގާނޫނާ ހިލާފަށް: ވަކީލުން
މިހާރު ވަކީލުންގެ ބައްދަލުވުމަށް ލިބެނީ 30 މިނެޓް
ކުރީގެ ރައީސް މައުމޫނު އަބްދުލް ގައްޔޫމްގެ ގާނޫނީ ޓީމު
ބަންދުގައި ތިބޭ މީހުންނާ ބައްދަލު ކުރަން މީގެ ކުރިން ދީފައި އޮންނަ ވަގުތު ކުޑަކޮށް 30 މިނެޓަށް ހަމަޖައްސާފައިވަނީ ގާނޫނާ ހިލާފަށް ކަމަށް ގާނޫނީ ވަކީލުން ވިދާޅުވެއްޖެ އެވެ.
ކުރީގެ ރައީސް މައުމޫނު އަބްދުލް ގައްޔޫމާއި އެމަނިކުފާނުގެ ދަރިކަލުން ފާރިސް މައުމޫނާއި ދަނބިދަރިކަލުން މުހައްމަދު ނަދީމްގެ ގާނޫނީ ވަކީލުންގެ ޓީމުން އަންގާރަ ދުވަހު ބޭއްވި ނޫސްވެރިންގެ ބައްދަލުވުމުގައި މައުމޫނު ހަމީދު ވިދާޅުވީ ފުލުހުންގެ އާންމު ގަވައިދުގެ ދަށުން ވަކީލުންގެ ބައްދަލުވުމަށް ބަދަލެއް ނުގެނެވޭނެ ކަމަށެވެ. އޭނާ ވިދާޅުވީ ޖަލުތަކާއި ޕެރޯލްގެ ގާނޫނުގެ ދަށުން ޖަލުތަކުގައި ތިބޭ މީހުންނަށް ދޭ އިނާޔަތްތައް ކަނޑައަޅާނީ އެ ގާނޫނާއި އެ ގާނޫނުގެ ދަށުން ހަދާ ގަވައިދެއްގެ ދަށުން ކަމަށެވެ.
"އެ ބޭފުޅުންގެ (ފުލުހުންގެ) އެ ނިންމުމަކީ ޣައިރު ގާނޫނީ ނިންމެވުމެއް. އެ ބޭފުޅުންނަކަށް އެގޮތައް ހަންޏެއް ނުކުރެވޭނެ. ޖަލުތަކާއި ޕެރޯލްގެ ގާނޫނު ބުނާ ގޮތުންވިއްޔާ އެ ގާނޫނުގެ ދަށުން ގަވައިދުތައް ހެދޭނީ ކޮމިޝަނަރ އޮފް ޕްރިޒަންސް އަށް މިނިސްޓަރ އޮފް ހޯމް އެފެއާޒްގެ ލަފަޔާ މަޝްވަރާގެ މަތިން. އެއީ އާންމު އުސޫލެއްގެ ގޮތުން ހަދަން ޖެހޭ ހުރިހާ ގަވައިދެއް،" މައުމޫނު ހަމީދު ވިދާޅުވި އެވެ.
އަދި އެހެންމެ ކުއްލި ނުރައްކަލުގެ ހާލަތުގައިވެސް ޖަލުތަކާއި ޕެރޯލްގެ ގާނޫނު ސަސްޕެންޑް ކޮށްފައި ނުވާއިރު އެ ގާނޫނަށް އަމަލު ކުރަން ޖެހޭނެ ކަމަށްވެސް މައުމޫނު ހަމީދު ފާހަގަ ކުރެއްވި އެވެ.
ކުރީގެ ޑެޕިއުޓީ ޕްރޮސެކިއުޓާ ޖެނަރަލް ހުސެއިން ޝަމީމް ވިދާޅުވީ ރައީސް މައުމޫނާ ހޯމަ ދުވަހު ބައްދަލުވުން ބޭއްވުމަށް ދެ ގަޑިއިރު ލިބިވައިގެންނެވިކަމަށާއި އެހެން ނަމަވެސް ވަކީލުންގެ ބައްދަލުވުމުގެ ވަގުތު ކުޑަކުރިކަން އެނގިވަޑައިގެންނެވީ އަންގާރަ ދުވަހު ރައީސް މައުމޫނާ ބައްދަލުކުރެއްވުމަށް މާފުއްޓަށް ވަޑައިގަންނަވަނިކޮށް ކަމަށެވެ. އޭނާ ވިދާޅުވީ އޭގެ މައްޗަށް ބަޔަކު އަމަލުކުރަން ޖެހޭ އުސޫލެއް ނަމަ އޮންނަން ވާނީ ސަރުކާރުގެ ގެޒެޓްގައި ޝާއިރު ކުރެވިފައި ކަމަށެވެ.
"މިއަދު ހެނދުނު އަޅުގަނޑުމެން ފޯމު ލީ އިރުގައި ދޮޅުގަޑިއިރު ލިބޭނެ ކަމަށް ވިދާޅުވީ. މާފުއްޓާ ހަމައަށް ދެވުނުއިރު ގަވާއިދު ބަދަލުވެއްޖެ. މާފުއްޓާ ހަމައަށް ދެވުނުއިރު ލިބުނީ ބައިގަޑިއިރު. ދެން އަޅުގަނޑު ގަބޫލެއް ނުކުރަން މިއީ ހަމަ ޖެހޭ އުސޫލެއް ކަމަކަށް،" ޝަމީމް ވިދާޅުވި އެވެ.
ގާނޫނީ ވަކީލު މުހައްމަދު ފައިސަލް ވިދާޅުވީ ކުއްލި ނުރައްކަލުގެ ހާލަތުގައިވެސް ގާނޫނީ ވަކީލެއްގެ ހައްގު ނުހިފެހެއްޓޭނެ ކަމަށް ގާނޫނު އަސާސީގައިވެސް ބަޔާންކޮށްފައިވާއިރު ގަވާއިދަށް ބަދަލެއް ގެނެސްގެން އެ ހައްގު ހަނި ނުކުރެވޭނެ ކަމަށެވެ. ރައީސް މައުމޫނުގެ ގާނޫނީ ޓީމުގައި ހިމެނިވަޑައިގަންނަވާ ފައިސަލް ވިދާޅުވީ ފުލުހުން އެމަނިކުފާނުގެ މައްޗަށް ގިނަ ތުހުމަތުތަކެއް ކުރާއިރު ވަކީލުންގެ ބައްދަލުވުމަށް މިހާރު ކަނޑައަޅާފައިވާ ވަގުތަކީ އެކަށީގެންވާ ވަގުތެއް ނޫން ކަމަށެވެ.
"ހަގީގަތުގައި އެ މާއްދާ (ގާނޫނު އަސާސީގެ 48 ވަނަ މާއްދާގެ ށ) ކުއްލި ނުރައްކަލުގެ ހާލަތުގައިވެސް ނުހިފެހެއްޓޭނެ ކަމަށް ބުނެފައިވާ ސަބަބަކީ ކުއްލި ނުރައްކަލުގެ ހާލަތުގައިވެސް ބަންދު ކުރެވޭ މީހުންނާއި ހައްޔަރު ކުރެވޭ މީހުންނަށް ގާނޫނީ ވަކީލެއްގެ ހައްގު އެންމެ ފުޅާ މިނެއްގައި ދިނުން. އަދި އެ މަގު އެއްވެސް ހާލަތެއްގައި ހަނި ނުކުރެވޭނެކަން އަންގާ ދިނުމަށް،" ފައިސަލް ވިދާޅުވި އެވެ.
ބަންދުގައި ތިބޭ މީހުންނަށް ވަކީލުންނާ ބައްދަލު ކުރަން ލިބޭނީ 30 މިނެޓްކަމަށް ފުލުހުން އެންގީ ޓުވީޓެއް މެދުވެރިކޮށް އަންގާރަ ދުވަހު އެވެ.
