އިންޑިއާގެ ބޮޑުވަޒީރަކު ފަލަސްތީނަށް ކުރައްވާ ތާރީޚީ ފުރަތަމަ ދަތުރުފުޅުގައި އިންޑިއާގެ ބޮޑުވަޒީރު ނަރެންދުރަ މޯދީ، އިސްރާއީލުން ހިފާފައިވާ ހުޅަނގު އައްސޭރިއަށް ޒިޔާރަތްކުރައްވައިފިއެވެ.
ފަލަސްތީނުގެ ރައީސް މަހުމޫދު އައްބާސްއާއިއެކު ބޭއްވެވި ބައްދަލުވުމަށްފަހު ބޮޑުވަޒީރު މޯދީ ވިދާޅުވީ މަޝްވަރާކޮށްގެން ފަލަސްތީނުގެ މިނިވަން ދައުލަތެއް ގާއިމް ކުރެވޭތަން ދެކިވަޑައިގަންނަވަން ބޭނުންފުޅުވާކަމަށެވެ.
މޯދީ ވަނީ ބޮޑުވަޒީރު ރަމީ ހަމްދަﷲއާއި ބައްދަލުކުރައްވައި އަދި ކުރީގެ ރައީސް ޔާސިރު އަރަފާތު ފަސްދާނުލެވިފައިވާ ދާރުލް އާސާރަށް ވަޑައިގެން މަގުބަރާގައި މާ ބޮނޑިއެއް ބާއްވާފައެވެ.
ހުކުރު ދުވަހު މޯދީ ކުރެއްވި ޓްވީޓެއްގައި ވިދާޅުވެފައިވަނީ ފަލަސްތީނުގެ ރައްޔިތުންނާއި އެ ރައްޔިތުންގެ ތަރަށްގީއަށް އެހީވެދެއްވާނެކަމުގެ ޔަގީންކަން އަރުވާކަމަށެވެ.
ފަލަސްތީނުގެ ރަސްމީ ނޫސް އޭޖެންސީ ވަފާއިން ބުނީ ދެ ގައުމުމުގެ ގުޅުން ބަދަހިކުރުމާއި ބެހޭގޮތުން ދެ ލީޑަރުން މަޝްވަރާ ކުރައްވާނެ ކަމަށާއި އަދި ދެ ގައުމުގެ މެދުގައި އެއްބަސްވުންތަކެއްގައި ސޮއިކުރާނެ ކަމަށެވެ.
ތަޖުރިބާކާރުން ވިދާޅުވާގޮތުގައި މޯދީގެ މި ދަތުރުފުޅަކީ މެދުއިރުމަތީގައި އިންޑިއާގެ ޚާރިޖީ ސިޔާސަތު ހަމަހަމަކުރުމަށް ކުރައްވާ މަސައްކަތުގެ ދަށުން ކުރައްވާ ދަތުރުފުޅެއްކަމަށެވެ.
އިސްރާއީލުން ހިފާފައިވާ ފަލަސްތީނަށް ވަޑައިގެންނެވުމުގެ ކުރިން މޯދީވަނީ އުރުދުންއަށް ވަޑައިގެން ރަސްގެފާނު އަބްދުﷲ ދެވަނަ އާއި އައްމާންގައި ބައްދަލުކުރައްވާފައެވެ.
މެދުއިރުމައްޗަށް މޯދީ ކުރައްވާ ދަތުރުފުޅުގައި އާދީއްތަ ދުވަހު އޮމާންއާއި ޔޫއޭއީއަށް ވަޑައިގަންނަވާނެއެވެ.
