ރައީސް މައުމޫންގެ މައްޗަށް ކުރާ ތުހުމަތުތަކަށް އެމަނިކުފާނު އިންކާރު ކުރައްވައިފި
ރައީސް މައުމޫންގެ މައްޗަށް ފުލުހުން ތަފާތު ތިން ކުށެއްގެ ތުހުމަތު ކުރޭ
ފުލުހުންގެ ހައްޔަރަށް ވަޑައިގެންނެވުމުގެ ކުރިން ރައީސް މައުމޫން، ދަރިކަނބަލުންނާއެކު
ކުރީގެ ރައީސް މައުމޫން އަބްދުލްޤައްޔޫމްގެ މައްޗަށް ދިވެހި ފުލުހުން ކުރާ ތުހުމަތުތަކަށް އެމަނިކުފާނު އިންކާރު ކުރައްވާ ކަމަށް ރައީސް މައުމޫންގެ ޤާނޫނީ ވަކީލް މައުމޫން ހަމީދު ވިދާޅުވެއްޖެ އެވެ.
ފުލުހުންގެ ހުރިހާ ތުހުމަތަަކަށް ރައީސް މައުމޫން އިންކާރު ކުރައްވާ ކަމަށް ވިދާޅުވެ މައުމޫން ހަމީދު ޓްވީޓް ކުރައްވާފައިވާއިރު، ރައީސް މައުމޫންގެ މައްޗަށް ތަފާތު ތިން ކުށެއްގެ ތުހުމަތު ފުލުހުން ކޮށްފައިވެއެވެ.
ބުދަ ދުވަހު ހަވީރު ބޭއްވި ނޫސްވެރިންގެ ބައްދަލުވުމުގައި ރައީސް މަޢުމޫންގެ މައްޗަށް ފުލުހުން ކޮށްފައިވާ ތުހުމަތުތަކުގެ ތެރޭގައި، ރައްޔިތުންގެ މަޖިލީހުގެ މެމްބަރުންނަށް ރިޝްވަތު ދީގެން ޤާނޫނީ ގޮތުން އުފެދިފައިވާ ސަރުކާރު ވައްޓާލަން މަސައްކަތް ކުރުމާއި، ފަނޑިޔާރުންގެ މަސައްކަތަށް ނުފޫޒު ފޯރުވައި ވަކިި ގޮތަކަށް ހުކުމް ނެރެ، މައްސަލަތައް ނިންމުމަށް ފަނޑިޔާރުންނަށް ރިޝްވަތު ދިނުމުގެ ތުހުމަތުގެ އިތުރުން، ސަލާމަތީ ބާރުތަކުގެ ތެރޭގައި ބައިބައިވުން އުފައްދައި، ސަރުކާރާއި ދެކޮޅަށް ސަލާމަތީ ބާރުތަކުން ނިކުތުމަށް ހިތްވަރުދީ، އެކަމަށް ރޭވުންތައް ރޭވުމުގެ ތުހުމަތު ހިމެނެއެވެ.
ފުލުހުންގެ ފަރާތުން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ފުލުހުންގެ މުއައްސަސާ ހިންގެވުމާއި ހަވާލުވެވަޑައިގެން ހުންނެވި ޑެޕިއުޓީ ކޮމިޝަނަރ އޮފް ޕޮލީސް އަބްދުﷲ ނަވާޒު ވަނީ ހައްޔަރު ކޮށްފައިވާ ބޭފުޅުންނާއި ދެކޮޅަށް ގިނަ އަދަދެއްގެ ހެކި ލިބިފައިވާ ކަމަށް ވިދާޅުވެފައެވެ. އެހެންނަމަވެސް މައްސަލައިގެ އިތުރު ތަފްސީލް ފުލުހުންގެ ފަރާތުން ދެއްވާފައެއްނުވެއެވެ.
