ސުޕްރީމް ކޯޓުން ބުރާސްފަތި ދުވަހުގެރޭ ނެރުނު އަމުރުގައި ވަގުތުން މިނިވަން ކުރުމަށް އަމުރުކޮށްފައިވާ ސިޔާސީ ބޭފުޅުން ބަންދުން ދޫކޮށްނުލައި، ބަންދުގައި ބައިތިއްބާފައި ތިބި ތިބުމަކީ، ޤާނޫނީ ގޮތުން ބަލާއިރު އެފަރާތްތައް ރަހީނުކުރުން ކަމަށާއި، އެގޮތަށް އެކަން ކުރުމުގައި ޝާމިލްވާ ހުރިހާ ފަރާތްތައް އެކަމުގެ ޖިނާއީ ޒިންމާ ނަގަން ޖެހޭނެ ކަމަށް ގާނޫނީ ވަކީލް ހިސާން ޙުސައިން ވިދާޅުވެއްޖެއެވެ.
ކުރީގެ ރައީސް މުހައްމަދު ނަޝީދުގެ ގާނޫނީ ޓީމުގައި ވެސް ހިމެނިވަޑައިގަންނަވާ ހިސާން ވިދާޅުވީ ސުޕްރީމް ކޯޓުން ޙުކުމެއް ނެރުމާ އެކު، ދައުލަތުގެ ހުރިހާ އިދާރާތަކުން އެ ޙުކުމަށް ވަގުތުން ވަގުތަށް ތަބާވާން ޖެހޭނެ ކަމަށެވެ.
ގަދަބާރުން މީހަކު ހިފަހައްޓާފައި ބެހެއްޓުމަކީ ޤާނޫނީ ގޮތުން ބަލާއިރު ރަޙީނުކުރުން ކަމަށާއި، އަދި ކޯޓުން މީހަކު ދޫކޮށްލަން އަމުރު ކުރުމަށް ފަހު، ދައުލަތުގެ އެއްވެސް އިދާރާއަކުން އެމީހަކު ބަންދުގައި ބަހައްޓައިފި ނަމަ، އެކަން ކުރުމުގައި ބައިވެރިވާ ހުރިހާ ފަރާތްތައް އެކަމުގެ ޖިނާޢީ ޒިންމާ ނަގަން ޖެހޭނެ ކަމަށް ވެސް ހިސާން ވިދާޅުވިއެވެ.
ޤާނޫނު ހިންގުމަށް ހުރަސްއެޅުމާއި، ދައުލަތުގެ އެހެނިހެން މަސައްކަތްތަކަށް ހުރަސްއެޅުމަކީ ޖިނާޢީ ކުށެއް ކަން، ޤާނޫނުލްއުޤޫބާތުގެ 533 ވަނަ މާއްދާގައި ބަޔާންކޮށްފައިވާ ކަމަށާއި، އަދި އޭގެ ތެރޭގައި ރަސްމީ ވާޖިބަކާއި ޚިލާފުވެގެން ޤާނޫނު ހިންގުމަށް ހުރަސް އެޅުން ވެސް ހިމަނާފައިވާކަން ހިސާން ވިދާޅުވިއެވެ.
ހިސާން ވިދާޅުވީ، ސުޕްރީމް ކޯޓު އަމުރަށް ތަބާނުވެ ދައުލަތުން މިހާރު ކުރަމުން މި ގެންދާ ކަންކަމަކީ ޤާނޫނު ހިންގުމަށް ހުރަސްއެޅުމަށް ދައުލަތުގެ ބަންޑާރަނައިބާއި، ތަންފީޒީ އިދާރަތަކުގެ ވެރިން ކުރައްވާ ކަންކަން ކަމުގައި ދެކިލައްވާ ކަމަށެވެ. އަދި ކޯޓު އަމުރު ތަންފީޒުނުކޮށް ހިނގާ ކޮންމެ ސިކުންތެއްގެ ޒިންމާ، އެކަމުގައި ޝާމިލްވާ އެންމެހާ މުވައްޒަފުން ނަގަންޖެހޭނެ ކަމަށެވެ.
ސުޕްރީމް ކޯޓުގެ އަމުރަކީ ސަރުކާރުގެ އެއްވެސް ބަހެއް ނެތި، ނިންމާފައިވާ ނިންމުމެއް ކަމަށް ސަރުކާރުން ބުނަމުންދާއިރު، ހިސާން ވިދާޅުވީ، ސުޕްރީމް ކޯޓުން މީގެ ކުރިން ވެސް އެކްސް ޕާޓޭކޮށް (އެހެން ފަރާތެއްގެ މަޝްވަރާއެއް ނެތި) މައްސަލަތައް ނިންމާފައިވާ ކަމަށާއި، އަދި މިހާތަނާ ޖެހެންދެން ވެސް ސަރުކާރުން އައީ އެ އަމުރުތަކަށް ތަބާވަމުން ކަމަށެވެ.
ހިސާން ވަނީ ބަންޑާރަނައިބު މުޙައްމަދު އަނިލް ޤާނޫނުގެ އިމުގެ ތެރެއަށް ރުޖޫޢަވެވަޑައިގަތުމަށް ގޮވާލައްވާފައެވެ.
