ޑަބްލިޔުޓީއެމް އެފްރިކާ 2018 ފެއަރގައި ބައިވެރިވުމުގެ ފުރުސަތު ހުޅުވާލައިފި

ޑަބްލިޔުޓީއެމް އެފްރިކާ 2018 ފެއަރގައި ބައިވެރިވުމުގެ ފުރުސަތު ފަތުރުވެރިކަމުގެ ދާއިރާގައި ހަރަކާތްތެރިވާ ފަރާތްތަކަށް ފީލް އިންވެސްޓްމަންޓް އިން ހުޅުވާލައިފިއެވެ.

ފެއަރގައި 11 ޖާގަ އޮތްއިރު ފީލް އިންވެސްޓްމަންޓްގެ އިން ބުނީ ރިސޯޓްތަކާއި ގެސްޓް ހައުސްތަކަށް ބައިވެރިވުމުގެ ފުރުސަތު ހުޅުލާފައިވާ ކަމަށެވެ. އަދި ފެއަރގައި ބައިވެރިވާން ބޭނުންވާ ފަރާތްތަކަށް ފެބްރުއަރީ 15 ވަނަ ދުވަހާ ހަމައަށް ފުރުސަތު ހުޅުވާލާފައިވާ ކަމަށް ވެސް އެ ކުންފުނިން ބުންޏެވެ.

ފީލް އިންވަސްޓްމަންޓްގެ އެސިސްޓަންޓް ޖެނެރަލް މެނޭޖަރ އިބްރާހިމް ހުލައިލް ވިދާޅުވީ އެ ކުންފުނީގެ ފަރާތުން މި ފެއަރގައި ބައިވެރިވާން ނިންމީ ރާއްޖޭގެ ފަތުރުވެރިކަމުގެ ދާއިރާގައި ހަރަކާތްތެރިވާ ފަރާތްތައް ދެކުނު އެފްރިކާގައި އިޝްތިހާރު ކުރުމުގެ ގޮތުން ކަމަށެވެ. އަދި މޯލްޑިވިއަންގެ ފަރާތުން ދެކުނު އެފްރިކާ އިން ރާއްޖެއަށް ޑައިރެކެޓް ފްލައިޓްތަކެއް ވަރަށް އަވަހަށް ފަށަން ނިންމާފައިވާއިރު ރާއްޖޭގެ ފަތުރުވެރިކަމުގެ ދާއިރާގައި ހަރަކާތްތެރިވާ ފަރާތްތައް އެ ގައުމުގައި އިޝްތިހާރު ކުރުމަކީ މުހިންމު ކަމެއް ކަން އޭނާ ވަނީ ފަހާގަކުރައްވާފައެވެ.

މި ފެއަރ ބޭއްވުމަށް ހަމަޖެހިފައި ވަނީ މިއަހަރުގެ އޭޕްރީލް މަހުގެ 18 ވަނަ ދުވަހުން ފެށިގެން 20 ވަނަ ދުވަހާ ހަމައަށް ސައުތު އެފްރިކާގެ ކޭޕް ޓައުންގައެވެ.

މީގެ އިތުރުން ފެއަރ ނިންމާފައިވާ އެފްރިކާގެ ޖޮހެނަސްބޭރގް ސިޓީގައި ރޯޑް ޝޯއެއް ބޭއްވުމަށް ހަމަޖެހިފައިވާ ކަމަށް ވެސް ފީލް އިންވެސްޓްމަންޓް އިން ބުންޏެވެ.

މި ފެއަރގައި ބައިވެރިވާން ބޭނުންވާ ފަރާތްތަކަށް ވަނީ ހާއްސަ ޕެކޭޖެއް ވެސް ތައާރަފުކޮށްފައެވެ. އަދި ފެއަރއާ ގުޅޭ އިތުރު މައުލޫމާތު ހޯދުމަށް 3007575 ނަންބަރަށް ގުޅުމަށް އެ ކުންފުނިން ވަނީ އެދިފައެވެ.

މި އަންނަ އަހަރު ޑަބްލިޔުޓީއެމް އެފްރިކާ ފެއަރގައި މިއަށްވުރެއް ގިނަ ފަރާތްތަކަށް ބައިވެރިވެވޭނެ ފުރުސަތު ފަހިކޮށްދޭނެ ކަމަށް ފީލް އިންވެސްޓްމަންޓް އިން ބުންޏެވެ.

މިއަހަރުގެ ތެރޭގައި ތަފާތު ތިން އެގްޒިބިޝަންގައި ބައިވެރިވާނެ ކަމަށް އެ ކުންފުނިން މައުލޫމާތުދެއެވެ.