ޗައިނާގެ ކުންމިންގ ފެއާރގައި ބައިވެރިވުމުގެ ފުރުސަތު ހުޅުވާލައިފި

ޗައިނާގެ ޔުނާން ޕްރޮވިންސްގެ ކުންމިންގގައި 2018 ވަނަ އަހަރު ބޭއްވުމަށް ހަމަޖެހިފައިވާ "ޗައިނާ ސައުތު އޭޝިއާ އެކްސްޕޯ 2018" ގައި ބައިވެރިވުމުގެ ފުރުސަތު ލިބިފައިވާތީ އެ އެކްސްޕޯގައި ބައިވެރިވުމުގެ ފުރުސަތު ހުޅުވާލައިފިއެވެ.

އިކޮނޮމިކް ޑިވެލޮޕްމެންޓް މިނިސްޓްރީން ބުނީ މި ފެއާރ އޮންނާނީ މިއަހަރުގެ ޖޫން މަހުގެ 14 އިން 20 އަށް ޗައިނާގެ ކުންމިންގގައި ކަމަށެވެ.

އެ މިނިސްޓްރީން ބުނީ އެ ފެއާރގައި ދިވެހި އުފެއްދުންތައް ބައިވެރިކޮށް ދެއްކުމާއި ވިއްކުމާއި، ދިވެހި އުފެއްދުއްތަކަށް މާކެޓް ހޯދައިދިނުމުގެ މަސައްކަތް ކުރިއަށް ގެންދެވޭނެ ކަމަށެވެ. މި ފެއާރގައި ރާއްޖެއިން ބައިވެރިވުމުގެ އެންމެބޮޑު ބޭނުމަކަށް ވާނީ ދިވެހި އުފެއްދުންތައް މެކަނައިޒްކުރެވޭނެ ވަސީލަތްތައް ހޯދުމާއި ޗައިނާގެ ވިޔަފާރި ވެރިންނާއެކު ވިޔަފާރީގެ ގުޅުން ބަދަހިކޮށް، ދިވެހި އުފެއްދުންތަކުގެ އިތުރުން ސައުތު އޭޝިއާގެ ގިނަ ގައުމުތަކުގެ މާކެޓްތަކުން ހޯދުމުގެ ތަނަވަސްކޮށް ދިނުން ކަމަށް ވެސް އިކޮނޮމިކް މިނިސްޓްރީން ބުނެއެވެ.

ދިވެހި އުފެއްދުންތައް އުފައްދާ ފަރާތްތަކުގެ ތެރެއިން މިފެއަރގައި ބައިވެރިވުމަށް ޝައުގުވެރިވާ ފަރާތްތަކުން މިމަހުގެ 22 ވަނަ ދުވަހުން ފެށިގެން އޭޕްރީލް މަހުގެ 19 ވަނަ ދުވަހުގެ 14:00 ގެ ނިޔަލަށް ބައިވެރިވުމަށް ޝއުގުވެރިކަން ފާޅުކޮށް، ހުށަހެޅުއްވުން އެދޭ ކަމަށް ވެސް އިކޮނޮމިކް މިނިސްޓްރީން ބުނެއެވެ.