ޔުނިވާސަލް ގޮވައިގެން އެންރީކޭ ކޯޓަށް

މަޝްހޫރު ލެޓިން ލަވަކިޔުންތެރިޔާ އެންރީކޭ އިގްލޭސިއަސް އޭނާގެ ލަވަ ސްޓްރީމިން ކުންފުނި ކަމަށްވާ ޔުނިވާސަލް މިއުޒިކް ގޮވައިގެން ކޯޓަށް ދާން ނިންމައިފިއެވެ.

އޭނާ ޔުނިވާސަލް ގޮވައިގެން ކޯޓަށް ދާން ނިންމީ ޔުނިވާސަލް މިއުޒިކްއިން ލިބޭ ރޯޔަލްޓީން 50 ޕަސެންޓް ފައިދާ ދޭން ނިންމާފައިވީ ނަމަވެސް އޭނާއާއި މެދު އެގޮތަށް އަމަލުކޮށްފައިނުވާތީއެވެ.

އެންރީކޭ މިހާރު ވަނީ އެމައްސަލަ މިއާމީ ފެޑެރަލް ކޯޓަށް ހުށައަޅާފައެވެ. އެންރީކޭގެ ގާނޫނީ ވަކީލު ޖޭމްސް ސަމަޓާރޯ ވިދާޅުވީ ޔުނިވާސަލް މިއުޒިލް ގްރޫޕާއި އެކު ހަދާފައި އޮތް އެގްރިމެންޓް އެންރީކޭ އުވާލާފައިވަނީ 2015 ވަނަ އަހަރު ކަމަށާއި އެއްބަސްވުން އުވާލުމުގެ ކުރިން އޭނާއަށް ހައްގުވާ ފައިސާ އޭނާއަށް ދީފައިނުވާ ކަމަށެވެ.

އަދި އޭނާއަށް ދޭން އެއްބަސްވެފައިވާ 50 ޕަސެންޓް ފައިދާ ދޭން ޔުނިވާސަލް މިއުޒިކް ގުރޫޕުން އެއްބަސްވެފައި ވީނަމަވެސް އެ ފައިސާ ދީފައި ނުވާކަމަށް އޭޖޭމްސް ވިދާޅުވިއެވެ. ޔުނިވާސަލް މިއުޒިކް ގުރޫޕުން މިކަމާއިމެދު އެއްޗެއް އަދި ބުނެފައެއް ނުވެއެވެ.

އެންރިކް އަކީ ލެޓިން މިއުޒިކް ސްޓާރެއް ކަމަށްވާ ޖޫލިއޯ އިގްލޭސިއަސްގެ ދަރިއެކެވެ.އެންރިކްގެ މިއުޒިކް ކެރިއާ ފަށާފައިވަނީ 1990 ވަނަ އަހަރުގައެވެ. އޭނާ މަޝްހޫރު ވެގެން ދިޔައީ 1999 ވަނަ އަހަރު ނިކުތް ބައިލަމޯސް ލަވައިންނެވެ.