2019 ވަނަ އަހަރުގެ ފަހުކޮޅު ޗައިނާގެ ވޫހާން ސިޓީއިން ރިޕޯޓް ކުރަން ފެށީ ކޮރޯނާވައިރަސް ޑިޒީޒް (ކޮވިޑް-19)ގެ ބަލިމަޑުކަން މުޅި ދުނިޔެއަށް ފެތުރިގެން ދިއުމާއެކު، ބަލި ކޮންޓްރޯލް ކުރުމަށް ގައުމުތަކުން ދެލޯމަރާފައި ނަމަވެސް އެންމެ ހަރުކަށިކޮށް ތަންފީޒު ކުރަން ފެށި އެއް ފިޔަވަޅަކީ އެ ބަޔަކު ތިބި ތަނެއްގައި ބޭރަށް ނުދެވޭގޮތަށް ރަށްތައް ލޮކްޑައުން ކުރުމެވެ. ނުވަތަ ފުރަބަންދު ކުރުމެވެ. ބަލީގެ ނުރައްކާ އިންތިހާއަށް ގަދަވެގެން ދިޔަ ދުވަސްވަރު އަމިއްލަ ގެއިންވެސް ބޭރަށް ނުކުތުމަކީ އަދަބު ލިބޭ ކަމަކަށް ވިއެވެ. ހީވެސް ނުކޮށް ތިއްބާ ބިންދާލި ބަލިމަޑުކަމުގެ ރާޅުގައި ފުރަބަންދުވުމާއެކު، ހިތަށްވެސް ގެނެވިފައި ނުވާ އެތައް ކަމަކަށް ލޯތަށް ހުޅުވާލަދިނެވެ. ދިރިއުޅުމުގެ ބިޒީ ތާވަލުން ވަގުތު ނުވެގެން ނުކުރެވި ހުރި ކިތަންމެ ކަމެއް ކުރަން ފެށި މީހުންނާއި، ދުވަހަކުވެސް ކުރެވޭނެއޭ ހިތަށް ނާރާ އެތައް ކަމެއް ކުރި މީހުން އެބަ އުޅެއެވެ.
އެފަދަ އެކަކީ، އިނގިރޭސިވިލާތުގައި ދިރިއުޅެމުންދާ އިންޑިއާ ދަރިކޮޅުގެ، އުމުރުން 38 އަހަރުގެ އަޝޯކް އަލިސެރިލް ތަމަރަކްޝަންއެވެ. މެކޭނިކަލް އިންޖިނޭރެއް ކަމަށްވާ ތަމަރަކްޝަން އާއިވެސް ފުރަބަންދުގެ އަމުރު އަރާ ހަމަކުރިއެވެ. ލިބުނު ވަގުތުގެ ބޭނުން އޭނާ ހިފީ އަމިއްލައަށް މަތިންދާބޯޓެއް އުފެއްދުމަށެވެ. މަތިންދާބޯޓު އުދުހުމުގެ ޕްރައިވެޓް ލައިސަންސްވެސް އޮންނަ ތަމަރަކްޝަންއަކީ އޭނާގެ އަމިއްލަ އަތުން އުފައްދާ މަތިންދާބޯޓެއްގައި، އާއިލާ ގޮވައިގެން އެއް ތަނުން އަނެއް ދަތުރު ކުރުމުގެ ހުވަފެންތައް ދެކެމުން ދިޔަ ޒުވާނެކެވެ. ތަމަރަކްޝަން ބުނާ ގޮތުގައި އަމިއްލަ އުދުހުންތަކަށް ކުއްޔަށް ދޫކުރާ މަތިންދާބޯޓުތަކަކީ ގިނަ ދުވަސްވެ، އުދުހެން އެންމެ ރައްކާތެރި ހާލަތެއްގައި ހުރި ބޯޓުތަކެއް ނޫނެވެ.
ކޮވިޑްގެ ލޮކްޑައުން އަމުރު އައި އިރުވެސް ތަމަރަކްޝަން އޮތީ އަމިއްލަ މަތިންދާބޯޓެއް އުފެއްދުމުގެ މަސައްކަތް ކޮންމެވެސް ސިފައެއްގައި ފަށާފައެވެ. ފޯޑް މޮޓޯ ކޮމްޕެނީގައި ވަޒީފާ އަދާ ކުރާ ތަމަރަކްޝަން ވަނީ އޭނާގެ މަސައްކަތު މާހައުލުގެ އެކުވެރިންނާއެކު އަމިއްލަ މަތިންދާބޯޓެއް އުފެއްދުމަށް ބޭނުންވާ ސަމާނަށް އޯޑަރު ދިނުމަށް ވިސްނާފައެވެ. ނަމަވެސް 2020 ގައި ތަންފީޒު ކުރަން ފެށި ލޮކްޑައުންގެ އަމުރާއެކު، އެ މަސައްކަތް ކުރަން ޖެހުނީ ތަމަރަކްޝަން އެކަންޏެވެ.
2020 ވަނަ އަހަރުގެ ކުރީކޮޅު އިނގިރޭސިވިލާތަށް އައިސް، މަތިންދާބޯޓު ހަދާ ކިޓަކަށް އޯޑަރު ޖެހިން. ހަމަ އެ ދުވަސްވަރު ލޮކްޑައުންވެސް ކުރީ. އޭޕްރިލް ހިސާބުގަ ފުރަތަމަ ކިޓް ލިބުނީ. އެހެންވެ، އޭރު ވިސްނީ އެކީގައި މަސައްކަތް ކުރާ ބައެއް އެކުވެރިންނާއެކު މަތިންދާބޯޓު އުފެއްދުމުގެ މަސައްކަތް ކޮށް ނިންމާލަން. އެކަމަކު ލޮކްޑައުން އާ ހެދި އެކަން ވާ ގޮތެއް ނުވި. މުޅި ބޯޓުގެ މަސައްކަތްހެން އަހަރެން އެކަނި މައި އެކަނި ކުރަން ޖެހުނީއަޝޯކް އަލިސެރިލް ތަމަރަކްޝަން؛ މެކޭނިކަލް އިންޖިނޭރެއް
އެންމެ ހަގު އަންހެން ދަރިފުޅު، ދިޔާ ގެ ނަމުން ނަން ދީފައި ވާ ރަތް ކުލައިގެ "ޖީ-ދިޔާ" މަތިންދާބޯޓަކީ ޕައިލެޓާއެކު ޖުމުލަ 4 މީހުންގެ ޖާގައިގެ މަތިންދާބޯޓެކެވެ. ގަޑިއަކު 250 ކިލޯމީޓަރު ނުވަތަ 155 މޭލު ބާރު މިނުގައި ދަތުރު ކުރުމުގެ ގާބިލުކަން ލިބިފައިވާ މަތިންދާބޯޓެކެވެ.
ވައިގެ އުދުހުންތަކުގައި ބޭނުން ކުރުމުގެ ހުއްދަ ނެގުމަށްފަހު ތަމަރަކްޝަން މިހާރު ވަނީ "ޖީ-ދިޔާ"ގައި އޭނާގެ އެކުވެރިން ގޮވައިގެން ވިލާތުގެ 4 ގައުމެއް ހުރަސްކޮށް ދަތުރު ކޮށްފައެވެ. އޭނާގެ 4 މެންބަރުންގެ މައްޗަށް އެކުލެވެ އާއިލާވެސް މިހާރު އެ ބޯޓުގައި ދަތުރު ކޮށްފިއެވެ.
ފެބުރުއަރީ މަހު ފުރަތަމަ ދަތުރު އަޅައިފިން. އެއީ ވިއްސަކަށް މިނެޓްގެ ކުރު ދަތުރެއް. ޓެސްޓު އުދުހުންތަކުގެ ޕްރޮގްރާމް ނިންމާފަ، ސިވިލް އޭވިއޭޝަނުން ދޭ ދާއިމީ ހުއްދަ ލިބުނީ މި އަހަރުގެ މެއި މަހު. އޭގެ ފަހުން ބައެއް ދަތުރުތައް ކޮށްފިން. އަހަރަމެން މި އާއިލާގެ 4 މެންބަރުންވެސް ދަތުރު ކޮށްފިން. އެކުވެރިންތަކަކާއެކު ވިލާތުގެ ޗުއްޓީއަކަށް 4 ގައުމެއްވެސް ހުރަސްކޮށްފިންއަޝޯކް އަލިސެރިލް ތަމަރަކްޝަން؛ މެކޭނިކަލް އިންޖިނޭރެއް
ޖީ-ދިޔާ"އަކީ މުނިފޫހިފިލުވާލުމަށާއި އުފާވެރި ވަގުތުތަކެއް ހޭދަ ކުރުމަށް ތައްޔާރު ކުރި މަތިންދާބޯޓެއް ކަމުން، އެ މަތިންދާބޯޓުން މާލީ މަންފާއެއް ހޯދުމުގެ ވިސްނުމެއް ތަމަރަކްޝަން ނުގެންގުޅެއެވެ.
މި ބޯޓު އުފެއްދުމުގެ ހުރިހާވެސް ބޭނުމަކީ އުފާވެރި، މަޖާ ވަގުތުކޮޅެއް ހޭދަ ކުރުން. އެހެންވެސް، މާލީ މަންފާއެއް ހޯދާކަށް ނުވިސްނަން. އެކަހަލަ މަގުސަދެއްގައެއް ނޫން މި ބޯޓު އުފެއްދީ. އަސްލު ބޭނުމަކީ އާއިލާ ގޮވައިގެން ދަތުރު ކުރުން. މިހާރު އިތުރު 4 ޕައިލެޓަކާއެކު އެބަ ހިއްސާ ކުރަން ބޯޓު. ބޯޓުގެ ޔޫސޭޖް ހަމަ ކުރަން، އަހަރަމެންގެ މެދުގައި ހިއްސާކޮށްގެން ދަތުރު އަޅަނީއަޝޯކް އަލިސެރިލް ތަމަރަކްޝަން؛ މެކޭނިކަލް އިންޖިނޭރެއް
"ޖީ-ދިޔާ"ގެ މަސައްކަތްތައް މުޅިން ނިންމާލުމަށް ތަމަރަކްޝަން ވަނީ، 225790 ޑޮލަރު ހަރަދު ކޮށްފައެވެ.
