ދަރިން ގޮވައިގެން ވަޒީފާ އަދާކުރާ ބަފައިންނަށްވެސް ސެލިއުޓް ހައްގު!

ކޮރޯނާވައިރަސް ޑިޒީޒް (ކޮވިޑް-19)ގެ ބަލިމަޑުކަމުގައި މުޅި ދުނިޔެ މަޑުޖެހުމަކަށް ގެނެސް، އެކަހެރި ވެށިތަކުގައި ތިބެގެންވެސް ވަޒީފާ އަދާ ކުރެވިދާނެ ކަން އެއް ބަޔަކު އަނެއް ބަޔަކަށް ސާބިތުކޮށްދިނެވެ. އެއީ އޭގެ ކުރިންވެސް ކޮންމެވެސް ވަރަކަށް އޮތް ކަމެއް ކަމުގައި ވީ ނަމަވެސް، ގޭގައި ނުވަތަ އެނޫންވެސް ތަނެއްގައި އާއިލާއާއި އެކުގައި ހުރެގެން ވަޒީފާ އަދާ ކުރެވިދާނެ ކަން، ގިނަ ބަޔަކަށް އޮތީ ގަބޫލު ނުކުރެވިއެވެ. ނަމަވެސް ކޮވިޑްއާއި އެކު ހުރިހާ އެންމެންގެ ދިރިއުޅުމަށް އައި ބޮޑު ބަދަލާއެކު، އެކަންވެސް ބަދަލުވީއެވެ. ދަރިން ބަލަމުން ވަޒީފާ އަދާ ކުރާ ބަޔަކީ ހަމައެކަނި މައިން ނޫން ކަމާއި، އެފަދަ ބަފައިންވެސް އެބަތިކަން ހާމަވިއެވެ. މިއީވެސް އެފަދަ ވާހަކައެކެވެ.

މިއީ މިދިޔަ ބުރާސްފަތި ދުވަހު ހިނގާދިޔަ ހާދިސާއެކެވެ. ބްރެޒީލްގެ ނޫސްވެރިޔާ ފިލީޕޭ ކީލިންގް ހުށަހަޅައިދެމުން ދިޔަ ލައިވް ރޭޑިއޯ ރިޕޯޓު މެދުކަނޑާލީ އޭނާގެ ކުޑަކުޑަ ދަރިފުޅެވެ.

ރޭޑިއޯ ބްރޭންޑް ނިއުސް އެފްއެމް އިން އޭރު ލައިވް ކުރަމުން ދިޔައީ މަޝްހޫރު ފުޓުބޯޅަ ކުޅުންތެރިޔާ، ނޭމާއާއި ބެހޭ ރިޕޯޓެކެވެ. ލައިވް ރިޕޯޓް ހުށަހަޅާ ދެމުން ދިޔަ ނޫސްވެރިޔާގެ ދަރިފުޅު، ލޫކަސް، އޭރު އޮތީ ނިދާފައެވެ. ނަމަވެސް ރިޕޯޓް ނުނިމި އުޅެނިކޮށް ލޫކަސް ހޭލިއެވެ. ލޫކަސް ހޭލިކަން، ސްޓޫޑިއޯގައި ތިބި އެންކަރުންނަށް އިވި، އެ ދަރިފުޅު އުރާލުމަށް ކީލިންގް ގާތު އެދުނެވެ.

އެހާ ހިސާބުން ކީލިންގް، އޭނާގެ ކުޑަ ދަރިފުޅު އުރައިގެން ހުރެ، 2 ވަނަ ލައިވް ރިޕޯޓް ކުރިއަށް ގެންދަން މަސައްކަތް ކުރާ މަންޒަރު، ސޯޝަލް މީޑިއާގައި ފެތުރިގެން ދިޔައެވެ. ކީލިންގް، ލައިވް ރިޕޯޓް ހުށަހަޅަމުން ދިޔައިރު، އޭނާގެ ދަރިފުޅު ދިޔައީ ބައްޕަގެ ހެޑްސެޓް އަތުލުވޭތޯ، ކުރެވެން އޮތްހާ މަސައްކަތެއް ކުރަމުންނެވެ.

އެ ދުވަހަކީ ލޫކަސް ބަލިވެ އުޅުނު ދުވަހެކެވެ. ބަނޑެއްގައި ރިއްސާތީ ޑޭ-ކެއާއަށް ނުގެންދެވުނީ ކަމަށާ، ދަރިފުޅުގެ މަންމަ އަދި ކީލިންގްގެ އަންހެނުން ވީ، އޭނާ ކޮންމެހެން ދާންޖެހޭ މުހިންމު ބައްދަލުވުމަކަށް ގޮސްފަ ކަމަށް ކީލިންގް ކިޔާދިނެވެ.

އެ ހާދިސާ ވެގެން ދިޔައީ، ވަޒީފާ އަދާ ކުރަމުން ދަރިން ބަލާ މައިންބަފައިންނާއި ވަކިން ހާއްސަކޮށް، ދަރިން ބަލަމުން ވަޒީފާ އަދާ ކުރާ ބަފައިންނާ މެދު މުޖުތަމައު އަށް އޮޅިފައި އޮތް އެތައް ކަމެއް ބަދަލު ކުރުމަށް ކީލިންގްއަށް ލިބުނު ފުރުސަތަކަށެވެ. ކީލިންގް ވަނީ އެ ފުރުސަތުގެ ބޭނުން، އޭނާއަށް ހިފުނު އެންމެ ފުރިހަމައަކަށް ހިފާފައެވެ.

މިއީވެސް ދަރިންގެ ޒިންމާތައް އުފުލުމާއި އާއިލާ ބެލެހެއްޓުމުގައި، ދެމަފިރިންގެ މުހިންމު ހިއްސާ އޮތް މިންވަރާ، އެކަމަކީ ކުރެވިދާނެ ކަމެއް ކަމާ، މުޖުތަމައުވެސް ބަލައިގަންނާނެ ކަމެއްކަން އަންގައިދޭ މިސާލެކެވެ.