ދެކުނު ކޮރެއާގެ ހޮސްޕިޓަލެއްގައި ހިނގި އަލިފާނުގެ ހާދިސާގައި މަރުވި މީހުންގެ އަދަދު 37އަށް އަރައިފި
26 ޖެނުއަރީ 2018 | ހުކުރު 15:49އަލިފާން ރޯވީ ހޮސްޕިޓަލުގެ އިމަރޖަންސީ ރޫމްގައި
ހޮސްޕިޓަލުގައި ރޯވި އަލިފާންގަނޑު ނިއްވާލަން މަސައްކަތްކުރަނީ
ދެކުނު ކޮރެއާގެ ހޮސްޕިޓަލެއްގައި ބުދަ ދުވަހު ރޯވި އަލިފާނުގެ ހާދިސާގައި މަދުވެގެން 37 މީހުން މަރުވެފައިވާ ކަމަށް އޮފިޝަލުން ބުނެފިއެވެ.
އަލިފާނުގެ ހާދިސާ ހިނގާފައި ވަނީ ވެރިރަށް ސޯލް އާއި 270 ކިލޯމީޓަރު ދުރުގައި، ދެކުނު ކޮރެއާގެ އިރުދެކުނުގައި އޮންނަ ރަށެއް ކަމަށްވާ މިރްޔަންގްގައެވެ. ސެޖޮންގް ހޮސްޕިޓަލްގައި ރޯވި އަލިފާންގަނޑު އެންމެ ފުރަތަމަ ރޯވީ އެ ހޮސްޕިޓަލުގެ އިމަރޖެންސީ ރޫމްގައި ކަމަށް ދެކުނު ކޮރެއާގެ ޔޮންހެޕް ނިއުސް އެޖެންސީ އިން ބުނެއެވެ.
ހާދިސާ ހިނގި ވަގުތު އެ ހޮސްޕިޓަލުގައި 200 ވަރަކަށް ބަލި މީހުން ތިބި ކަމަށް ރިޕޯޓުތައް ބުނެއެވެ. މި ހާދިސާއަކީ ވޭތުވެދިޔަ ދިހަ ވަރަކަށް އަހަރުތެރޭ ހިނގި މިފަދަ އެންމެ ނުރައްކާތެރި ހާދިސާ ކަމަށާއި މަރުވި މީހުންގެ އަދަދު އަދިވެސް އިތުރު ވެދާނެ ކަމަށް އޮފިޝަލުން ބުނެއެވެ.
އަލިފާން ނިއްވުމުގެ މަސައްކަތުގައި ހަރަކާތްތެރިވި ފަރާތްތަކުން ބުނެފައި ވަނީ މީހުން މަރުވީ އަލިފާނުގެ ދުމުގެ އަސަރުކޮށްގެން ކަމަށް ބެލެވޭ ކަމަށެވެ. މަރުވި މީހުންގެތެރޭގައި ހޮސްޕިޓަލުގެ ތިން ސްޓާފަކުވެސް ހިމެނެއެވެ.
އަލިފާން ރޯވި ހޮސްޕިޓަލަކީ އުމުރުން ދުވަސްވީ މީހުންނަށް ފަރުވާ ދިނުމަށް ހާއްސަ ހޮސްޕިޓަލެކެވެ.
