ދެކުނު ކޮރެއާގެ ހޮސްޕިޓަލެއްގައި ރޯވެ 31 މީހުން މަރުވެއްޖެ
26 ޖެނުއަރީ 2018 | ހުކުރު 05:28މިއީ އުމުރުން ދުވަސްވީ މީހުންނަށް ޚާއްސަ ހޮސްޕިޓަލެއް
ހޮސްޕިޓަލުގައި ރޯވި އަލިފާންގަނޑު ނިއްވާލަން މަސައްކަތްކުރަނީ
ދެކުނު ކޮރެއާގެ ހޮސްޕިޓަލެއްގައި އަލިފާނުގެ ޙާދިސާއެއް ހިނގައި، 31 މީހުން މަރުވެއްޖެއެވެ.
މިހާދިސާ ހިނގާފައި ވަނީ ވެރިރަށް ސޯލް އާއި 270 ކިލޯމީޓަރު ދުރުގައި، ދެކުނު ކޮރެއާގެ އިރުދެކުނުގައި އޮންނަ ރަށެއް ކަމަށްވާ މިރްޔަންގްގައެވެ. ސެޖޮންގް ހޮސްޕިޓަލްގައި ރޯވި އަލިފާންގަނޑު އެންމެ ފުރަތަމަ ރޯވީ އެހޮސްޕިޓަލުގެ އިމަރޖަންސީ ރޫމްގައި ކަމަށް ދެކުނު ކޮރެއާގެ ރަސްމީ ޔޮންހެޕް ނިއުސް އެޖެންސީ އިން ބުނެއެވެ.
އެހޮސްޕިޓަލަކީ އާއްމުކޮށް އުމުރުން ދުވަސްވީ މީހުންނަށް ފަރުވާ ދިނުމަށް ޚާއްސަ ހޮސްޕިޓަލެކެވެ.
ރޯވި ވަގުތު ހޮސްޕިޓަލާއި، އެތަނުގެ ކައިރީގައި ހުންނަ ދުވަސްވީ މީހުން ބަލަހައްޓާ މަރުކަޒުގައި 100 އެއްހާ މީހުން ތިއްބެވެ.
މިހާދިސާގައި 40 މީހަކަށް އެކިވަރުގެ އަނިޔާތައް ލިބިފައިވާ އިރު 11 މީހެއްގެ ޙާލު ސީރިއަސް ކަމަށް ރިޕޯޓްތައް ބުނެއެވެ. މަރުވި 31 މީހުންގެ ތެރޭގައި އަލިފާނުގެ ޙާދިސާއަށް ފަހު އެހެން ހޮސްޕިޓަލަކަށް ގެންދަނިކޮށް މަރުވި މީހުން ހިމެނެއެވެ.
އަލިފާން ރޯވާން ދިމާވި ސީދާ ސަބަބު އަދި ހޯދިފައެއް ނުވެއެވެ.
