މިލާން ކައިރީގައި ރޭލެއް ދަގަނޑުން ކައްސާލުމުގެ ސަބަބުން ތިން މަރު

އިޓަލީގެ އުތުރުގެ ސިޓީއެއް ކަމަށްވާ މިލާން ކައިރިން އާންމުން ދަތުރުކުރަމުންދިޔަ ރޭލެއް ދަނގަޑުން ކައްސާލުމުގެ ސަބަބުން ތިން މީހުން މަރުވެ 10 މީހަކު ވަރަށް ބޮޑަށް ޒަޚަމްވެއްޖެއެވެ.

މިހާދިސާގައި ކަމާ ބެހޭ އޮފިޝަލުން އެތައް ބަޔަކު ސަލާމަތްކޮށްފައިވާ ކަމަށް ވެސް ރިޕޯޓްތައް ބުނެއެވެ.

މިލާންގެ ޕައޮލްޓެލޯ ލިމިޓޯ ސްޓޭޝަންގައި ބުރާސްފަތި ދުވަހު ހިނގި މިހާދިސާގައި ރޭލުގެ ކެރިޖްތައް ރޭލުދަގަނޑުން ކައްސާލައިގެންނެވެ. ހާދިސާ ހިނގަން މެދުވެރިވީ "ޓްރެކް ސްވިޗެއް" ގެ ސަބަބުން ކަމަށް ބެލެވެއެވެ.

އާންމުންނާ ހަވާލާދީ ރިޕޯޓްތައް ބުނާ ގޮތުން އެކްސިޑެންޓްވި ރޭލު ކުޑައިރުކޮޅަކަށް ތެޅުނުތަން ފެނިގެން ދިޔައެވެ. އަދި އެ ރޭލު ދުއްވަމުން ދިޔައީ އާދައިގެ ބާރުމިނެއްގައި ކަމަށް ރިޕޯޓްތައް ބުނެއެވެ.

އިޓަލީގެ ރޭލުގެ ނިޒާމަކީ "މުސްކުޅިވަމުންދާ" ނިޒާމެއް ކަމަށް ރިޕޯޓްތައް ބުނެއެވެ. އަދި ދޭތެރެދޭތެރެ އިން އެކްސިޑެންޓްތައް ހިނގައެވެ. އެގޮތުން 2016 ގައި ހިނގި އެކްސިޑެންޓެއްގައި 23 މީހަކު މަރުވިއެވެ. އަދި 2009 ގައި ހިނގި އެކްސިޑެންޓެއްގައި ވެސް 32 މީހަކު މަރުވެފައިވެއެވެ.