އެމެރިކާގެ ވޮޝިންޓަން ސްޓޭޓްގައި ދުއްވާފައިދިޔަ އެމްޓްރެކް ރޭލެއް ދަގަނޑުން ކައްސާލައި، ހައިވޭއެއްގެ މައްޗަށް ވެއްޓި، 3 މީހުން މަރުވެއްޖެއެވެ.

މިޙާދިސާގައި ޒަޚަމްވި ސަތޭކައަށް ވުރެ ގިނަ މީހުން ހޮސްޕިޓަލްތަކަށް ގެންގޮސްފައިވާއިރު، ބައެއް މީހުންގެ ޙާލު ސީރިއަސް ކަމަށް ހޮސްޕިޓަލްތަކުން ބުނެއެވެ. މިހާދިސާގައި ހިނގި އިރު، ރޭލު ދަތުރުކުރަމުންދިޔައީ ހައިވޭއެއް ހުރަސްކޮށް މަތިން އަޅާފައިވާ ރޭލު ދަގަނޑެއް މަތިންނެވެ. އަދި ރޭލު މަގުމައްޗަށް ވެއްޓުމުން 7 ވެހިކަލަކަށް ގެއްލުން ލިބިފައިވާއިރު، އޭގެ ތެރޭގައި ބޮޑު 2 ޓްރަކް ހިމެނެއެވެ. އަނިޔާވި މީހުންގެ ތެރޭގައި އެވަގުތު ހައިވޭގައި ދުއްވާފައި ދިޔަ ވެހިކަލްތަކުގައި ތިބި މީހުންނާއި މަގުމަތީގައި ތިބި މީހުން ހިމެނެއެވެ.

ކުރިން މުދާ އުފުލާ ރޭލު ދުއްވާ މި ރޫޓުން ފަސިންޖަރުން ދަތުރުކުރި މިއީ ފުރަތަމަ ފަހަރެވެ. ވޮޝިންޓަން ސްޓޭޓްގެ ވެރިރަށް ސިއޭޓްލްއިން ފުރައިގެން މި ރޭލު ދަތުރުކުރީ ޕޯޓްލޭންޑަށެވެ.

ރޭލު ދަގަނޑުން ކައްސާލިއިރު، ރޭލުގައި 77 ފަސެންޖަރުންނާއި އެމްޓްރެކްގެ 7 މުވައްޒަފުން ދަތުރުކުރި ކަމަށް އެމެރިކާގައި ރޭލުގެ ޚިދުމަތްދޭ މައި ކުންފުނި އެމްޓްރެކުން ބުނެއެވެ.

ރޭލު ދަގަނޑުން ކައްސާލުމާއިއެކު ރޭލުގެ ޑްރައިވަރާއި އިންޖިނިއަރު ޑިސްޕެޗަށް ގުޅައިގެން ވަރަށް ހާސްވެ ތިބެ ވާހަކަ ދައްކާ އަޑު ހިމެނޭ އޯޑިއޯތަކެއް ވަނީ އާއްމުކޮށްފައެވެ.

މި ޙާދިސާއަށް ފަހު، ޙާދިސާގައި މަރުވި މީހުގެ އާއިލާތަކަށް ތައުޒިޔާ ވިދާޅުވުމުގެ ކުރިން އެމެރިކާގެ ރައީސް ޑޮނަލްޑް ޓްރަމްޕް ވިދާޅުވީ މި އެކްސިޑެންޓަކީ އެމަނިކުފާނު ވަރަށް އަވަހަށް ހުށަހަޅުވަން ނިންމަވާފައިވާ އިންފްރާސްޓްރަކްޗަރ ޕްލޭން އަވަހަށް އެޕްރޫވް ކުރަން ޖެހޭކަމުގެ ހެއްކެއް ކަމަށެވެ.

އެކްސިޑެންޓް ހިނގި ރޭލު ދަގަނޑަކީ ދާދިފަހުން މަރާމާތުކޮށްފައިވާ ދަގަނޑެއްކަމަށް ރިޕޯޓްތައް ބުނެއެވެ.