އިންޑިއާގައި ރޭލެއް ދަގަނޑުން ކައްސާލައި 23 ީމީހުން މަރުވެ 64 މީހުން ޒަޚަމްވެއްޖެ
ހާދިސާ ހިނގާފައިވަނީ ވެރިރަށް ނިއުދިއްލީގެ 100 ކިލޯމީޓަރު އިރުއުތުރުން އުއްތަރު ޕްރަދޭޝްގައި
އިންޑިއާގައި ދުވާލަކު 22 މިލިއަން ފަސިންޖަރުން ރޭލް ބޭނުންކުރޭ
އިންޑިއާގެ އުތުރުގައި އެކްސްޕްރެސް ރޭލެއް ދަނގަޑުން ކަ މަދުވެގެން 23 މީހުން މަރުވެ 64 މީހުން ޒަޚަމްވެއްޖެކަމަށް އޮފިޝަލުން ބުނެފިއެވެ.
މި ހާދިސާ ހިނގާފައިވަނީ ވެރިރަށް ނިއު ދިއްލީގެ 100 ކިލޯމީޓަރު އިރުއުތުރުން އުއްތަރު ޕްރަދޭޝްގެ ޚަތައުލީ ގައެވެ.
މީހުން ސަލާމަތްކުރުމުގައި މަސައްކަތްކުރާ ފަރާތްތަކުން ގެންދަނީ ހަލާކުވެފައިވާ ބައިތަކުގެ ދަށުގައި ތާށިވެފައިތިބި ފަރާތްތައް ސަލާމަތްކުރުމުގެ މަސައްކަތްކުރަމުންނެވެ.
"ތޭވީސް މީހުންވަނީ މަރުވެފައި އަދި އިތުރު 64 މީހުން މި އެކްސިޑެންޓްގައިވަނީ ޒަޚަމްވެފައި. މީހުން ސަލާމަތްކުރުމުގެ އޮޕަރޭޝަން މި ގެންދަނީ ކުރިޔަށް" ހާދިސާ ހިނގި ސަރަހައްދުގައި ހުރި ސިވިލް އޮފިޝަލެއްކަމަށްވާ ޖީ އެސް ޕްރިޔަދަރްޝީ އޭއެފްޕީގައި ވިދާޅުވެފައިވެއެވެ.
ޒަޚަމްވި މީހުން ހޮސްޕިޓަލަށް ގެންދެވިފައިވާއިރު ޑޮކްޓަރުންނާ ހަވާލާދީ މީޑިއާ ރިޕޯޓްތައް ބުނާ ގޮތުން އެމީހުންގެ ހާލަތު މިހާރު ގޯހެއް ނޫނެވެ.
ދަނގަޑު މަތިން ކަހާލާފައިވާ ރޭލްގެ ބައި ނަގާފައިވަނީ ކެރޭނެއް ބޭނުންކޮށްގެންނެވެ. އަދި ތާށިވެފައިވާކަމަށް ބެލެވޭ މީހުން ނެގުމަށްޓަކައި އެމީހުންނާ ހަމައަށް ވާސިލްވުމަށް ގޭސްކަޓަރ ބޭނުންކޮށްފައިވާކަމަށް އިއާންސް ނިއުސް އޭޖެންސީ ރިޕޯޓްކޮށްފައިވެއެވެ.
މި އެކްސިޑެންޓް ހިނގަން މެދުވެރިވި ސަބަބެއް އަދި ނޭނގެ އެވެ.
ރޭލްވޭ މިނިސްޓަރ ސުރޭޝް ޕްރަބޫ ވަނީ ރޭލް ކައްސާލި ހާދިސާގެ ތަހުގީގެއް ހިންގުމަށް އަމުރުކުރައްވާފައެވެ.
މިނިސްޓަރ ވަނީ މަރުވި ކޮންމެ މީހެއްގެ އާއިލާއަށް ބަދަލެއްގެ ގޮތުގައި 5،500 ޑޮލަރު ދޭނެކަން އިއުލާނުކުރައްވާފައެވެ.
ބޮޑުވަޒީރު ނަރެންދްރަ މޯދީ ޓްވިޓަރގައި ވިދާޅުވެފައިވަނީ އެކްސިޑެންޓްގެ ސަބަބުން ހިތާމަފުޅު ކުރައްވާކަމަށާއި މަރުވި މީހުންގެ އާއިލާތަކަށް ތައުޒިއާ ފޮނުއްވައި ޒަޚަމްވި މީހުންނަށް އަވަސް ޝިފާއަކަށް އެދިވަޑައިގަންނަވާކަމަށެވެ.
