އަންގާރަ ދުވަހު އެމެރިކާގެ އެލަސްކާ ސްޓޭޓުގެ ކޮޑިއަކް އައިލެންޑަށް އައި 7.9 މެގްނިޓިއުޑްގެ ބިންހެލުމާ ގުޅިގެން ނެރުނު ސުނާމީ އިންޒާރު ކަމާބެހޭ ފަރާތްތަކުން އުވާލައިފިއެވެ.

7.9 މެގްނިޓިއުޑްގައި އައި ބިންހެލުން އައީ އަންގާރަ ދުވަހު ދަންވަރު 12:30 ގައެވެ. އެމެރިކާގެ ނެޝެނަލް ސުނާމީ ސެންޓަރުން އަލަސްކާގެ ކޮޑިއަކް އައިލެންޑަށް އައި ބިންހެލުމާ ގުޅިގެން ނެރުނު ސުނާމީގެ އިންޒާރު އުވާލާފައި ވަނީ ބިންހެލުން އައިތާ މަދު ގަނޑިއިރުތަކެއް ފަހުން ކަމަށްވާއިރު އެއްވެސް ވަރަކަށް، އަލަސްކާގެ ރަށްފުށުގެ ހިސާބުތަކަށް ރާޅުނާރާ ކަމަށް ރިޕޯޓުތައް ބުނެއެވެ.

ކޮޑިއެކް އައިލެންޑަށް އައި ބިންހެލުމާ ގުޅިގެން އޮފިޝަލުން، ކޮޑިއެކް އައިލެންޑުގެ ބިން ތިރި ހިސާބުތަކުގައި އުޅޭ މީހުން އެތަންތަން ދޫކޮށް ދިއުމަށް އެންގިއެވެ. އަދި ސުނާމީ އިންޒާރުގެ ސައިރެން ވެސް އެޅިއެވެ.

އަންގާރަ ދުވަހު އެމެރިކާގެ އެލަސްކާ ސްޓޭޓުގެ ކޮޑިއަކް އައިލަންޑަށް އައި ބިންހެލުމާ ގުޅިގެން އަލަސްކާގެ އައްސޭރިފަށުގެ ގިނަ ހިސާބުތަކަށާއި، ކެނެޑާގެ ބްރިޓިޝް ކޮލަމްބިއާ އަށް ސުނާމީގެ އިންޒާރު ނެރުނެވެ. އަދި ސުނާމީގެ "ވޮޗް" އިންޒާރު އެމެރިކާގެ "ވެސްޓް ކޯސްޓަށާއި އަދި ހަވާއީ އަށްވެސް ނެރުނެވެ.