އިނގެރޭސި ޝާހީ އައިލާގެ އަމީރާއެއް ކަމުގައިވާ ޔޫޖީނީ ވިކްޓޯރިއާ ހެލެނާ، މި އަހަރު ކައިވެނި ބައްލަވައިގަތުމަށް ނިންމަވާފައިވާކަން އިނގެރޭސި ޝާހީ އައިލާއިން ހާމަކޮށްފިއެވެ.
އަމީރާ ޔޫޖީނީ އަކީ އިނގެރޭސި ރާނީގެ 3 ވަނަ ދަރިކަލުން، ޕްރިންސް އެންޑްރޫ، ޑޫކް އޮފް ޔޯކް ގެ ހަގު ދަރިކަބަލުންނެވެ. އެކަމަނާއަކީ އިނގެރޭސި ތަޚުތު ވާރުތަވާ ފަރާތްތަކުގެ ތެރެއިން 8 ވަނައަށް މިހާރު ހުންނެވި ފަރާތެވެ.
ޕްރިންސް އެންޑްރޫގެ ދެމަފިރިކަނބަލުން ހޯމަ ދުވަހު އާންމުކުރެއްވި ބަޔާނެއްގައިވަނީ، ޕްރިންސެސް ޔޫޖީނީ އާއި އެކަމަނާގެ ލޯބިވެރިޔާ ޖެކް ބްރޫކްސްބޭންކް މި މަހުގެ ކުރީކޮޅު، ނިކަރަގުއާގައި އެންގޭޖް ވެވަޑައިގެންފައިވާ ކަމަށެވެ.
The Duke and Duchess of York are delighted to announce the engagement of Princess Eugenie to Mr. Jack Brooksbank. pic.twitter.com/ct45JvDfbq
— The Royal Family (@RoyalFamily) January 22, 2018
އެ ބަޔާނުގައި އިޢުލާނުކޮށްފައިވާ ގޮތުގައި ޕްރިންސެސް ޔޫޖީނީ އާއި ޖެކް ބްރޫކްސްބޭންކް ކައިވެނި ކުރެއްވުމަށް ނިންމަވާފައިވަނީ މި އަހަރުގެ ސެޕްޓެމްބަރު މަހާއި ނޮވެމްބަރު މަހާއި ދެމެދު ވިންޑްސަރގައި ހުންނަ ސެއިންޓް ޖޯޖްސް ޗެޕަލްގައި ކަމަށެވެ.
ޕްރިންސެސް ޔޫޖީނީ އާއި ޖެކް ބްރޫކްސްބޭންކްގެ ކައިވެނި އިޢުލާނު ކުރެއްވުމާއިއެކު، ހޯމަ ދުވަހު އެ ދެބޭފުޅުން ވަނީ ބަކިންގހަމް ޕެލަސްގައި އެ ދެބޭފުޅުންގެ ރަސްމީ ފޮޓޯފުޅު ނަންގަވާ، އާންމުކުރައްވާފައެވެ.
Princess Eugenie and Mr. Jack Brooksbank were photographed earlier today following the announcement of their engagement. pic.twitter.com/ArYQIDeNZw
— The Royal Family (@RoyalFamily) January 22, 2018
ޕްރިންސެސް ޔޫޖީނީ އާއި ޖެކް ބްރޫކްސްބޭންކްގެ ކައިވެނި ވެގެންދާނީ މި އަހަރު ޝާހީ އާއި އާއިލާގެ ތެރޭގައި ކުރެވޭ ދެވަނަ ކައިވެންޏަށެވެ. އެގޮތުން، ޕްރިންސް ހެރީ އާއި އެމަނިކުފާނުގެ ފިއޯންސޭ، މޭގަން މާކެލްގެ ކައިވެނި މި އަހަރުގެ މޭމަހު ކުރުމަށް ހަމަޖެހިފައިވާކަންވެސް ޝާޙީ އާއިލާއިން ވަނީ ހާމަކޮށްފައެވެ.
