މަގާމުން ވަކިކޮށްފައިވާ ކެޓަލޯނިއާގެ ކުރީގެ ލީޑަރު ކާލްސް ޕުޖްޑިމޮންޓް ބެލްޖިއަމް ދޫކުރައްވައި އެހެން ތަނަކަށް ވަޑައިގަންނަވާ ނަމަ ހައްޔަރުކުރާނެ ކަމަށް ސްޕެއިންގެ ސަރުކާރުން ބުނެފައިވަނިކޮށް ހޯމަ ދުވަހު ޑެންމާކަށް ވަޑައިގެންފިއެވެ.

ކެޓަލޯނިއާގެ ސަރުކާރު އުވާލުމާ އެކު ޕުޖްޑިމޮންޓް ވަނީ މިިދިޔަ އަހަރުގެ އޮކްޓޯބަރުމަހުގެ ފަހުކޮޅު ބެލްޖިއަމްއަށް ވަޑައިގެންފައެވެ.

ކޯޕަން ހޭގަން އެއަރޕޯޓަށް ޕުޖްޑިމޮންޓް ފައިބައިވަޑައިގެންނެވިއިރު އޭނާގެ ވަށައިގެން ނޫސްވެރިން ތިބި މަންޒަރު ޑެންމާކުގެ ބްރޯޑްކަސްޓަރ ޓީވީ 2 އިން ހާމަކޮށްފައިވާ ފޮޓޯއަކުން ފެނެއެވެ.

ކޯޕަން ހޭގަން ޔުނިވާސިޓީގައި ކެޓަލޯނިއާ ބެހޭ ގޮތުން ހޯމަ ދުވަހު ބާއްވާ ބަހުސެއްގައި ޕުޖްޑިމޮންޓް ބައިވެރިވެ ވަޑައިގަންނަވާނެވެ.

ޕުޖްޑިމޮންޓް ޑެންމާކަށް ވަޑައިގެންފައި މި ވަނީ ބެލްޖިއަމް ދޫކުރައްވައި ޑެންމާކަށް އޭނާ ވަޑައިގެންފި ނަމަ ހައްޔަރުކުރުކޮށް އޭނާ ސްޕެއިން ސަރުކާރާ ހަވާލުކުރުމަށް ސްޕެއިންގެ ސުޕްރީީމް ކޯޓުގެ ފަނޑިޔާރުން އަމުރެއް ނެރެފައިވާ ކަމަށް ސްޕެއިންގެ ޕްރޮސިކިއުޝަން ސަރވިސް އިން ބުނެފައިވަނިކޮށެވެ.

ސްޕެއިންގެ މައި ސަރުކާރުން ވަކިވެ ކެޓަލޯނިއާގައި މިނިވަން ދައުލަތެއް ގާއިމްކުުރުމަށް ފެނޭތޯ ބެލުމަށް ނެގި ވޯޓަށް ފަހު މިނިވަންވުމަށް ފެންނަ ކަމަށް ނިންމުމާ ގުޅިގެން ޕުޖްޑިމޮންޓް ވަނީ ކެޓަލޯނިއާގެ މިނިވަންކަން އިއުލާނުކުރައްވާފައެވެ.

ކެޓަލޯނިއާގެ ސަރަހައްދީ ޤާނޫނު ހަދާ މަޖިލީހުން ސްޕެއިންގެ މައި ސަރުކާރުން ވަކިވެ، އޮކްޓޯބަރު 27 ވަނަ ދުވަހު މިނިވަންކަން އިއުލާންކުރުމާ އެކު، ސްޕެއިންގެ މައި ސަރުކާރުން ވަނީ އެސަރަހައްދަށް ދީފައިވާ ސަރަހައްދީ މިނިވަންކަން ނިގުޅައިގަނެ، ޤާނޫނު ހަދާ މަޖިލިސް އުވާލައި، ޑިސެމްބަރު 21 ގައި އިންތިޚާބެއް ބާއްވާފައެވެ.

ސަތޭކަ ތިރީސް ފަސް ގޮނޑި ހިމެނޭ ކެޓަލޯނިއާގެ ޤާނޫނު ހަދާ މަޖިލީހުގެ 70 އަށް ވުރެ ގިނަ ގޮނޑި ކާމިޔާބުކޮށްފައި ވަނީ ވަކިވެގަތުމަށް މަސައްކަތްކުރާ ޕާޓީތަކުންނެވެ.

މި އިންތިޚާބުގައި ސްޕެއިންގެ ބޮޑުވަޒީރު މަރިއާނޯ ރަޚޯއީގެ ޕޮޕިއުލަރ ޕާޓީއަށް ލިބިފައި ވަނީ އެންމެ ތިން ގޮނޑިއެވެ. އުވާލެވުނު މަޖިލީހުގައި އެޕާޓީގެ 11 މެމްބަރުން ތިއްބެވިއެވެ.

ކެޓަލޯނިއާގެ ލީޑަރަކަށް ވަޑައިގަންނަވާނެ ކެނޑިޑޭޓެއް އެ ސަރަހައްްދުގެ ގާނޫނުހަދާ މަޖިލީހުގެ ރައީސް ހޯމަ ދުވަހު އިއުލާނު ކުރައްވާނެއެވެ. އެންމެ ތާއީދު ބޮޑު ބޭފުޅަކީ ޕުޖްޑިމޮންޓްކަމަށް ވީ ނަމަވެސް ގައުމަށް އެނބުރި ވަޑައިގެންފި ނަމަ ހައްޔަރުކުރާނެތީ ޕުޖްޑިމޮންޓް ބޭނުންފުޅުވަނީ އަރުވާލެއްވިގެން ހުންނަވައި ވެރިކަން ކުރެއްވުމަށެވެ. ސްޕެއިންގެ ބޮޑުވަޒީރު މަރިއާނޯ ރަޚޮއި ހޮނިހިރު ދުވަހު ވެސް ވަނީ އަރުވާލެއްވިގެން ހުންނަވައި ވެރިކަން ކުރެއްވުމަކީ ޣައިރު ގާނޫނީ ކަމެއް ކަމަށް ވިދާޅުވާ ވިދާޅުވުން ތަކުރާރުކުރައްވާފައެވެ.