ދަ ކްރޭންބެރީސްގެ ލަވަކިޔުންތެރިޔާ ޑޮލޯރްސް އޮރަޔޯޑާން މަރުވެއްޖެ

ދަ ކްރޭންބެރީސްގެ ލަވަކިޔުންތެރިއެއް ކަމަށްވާ ޑޮލޯރްސް އޮރަޔޯޑާން މަރުވެއްޖެއެވެ.

އޭނާ މަރުވިއިރު އުމުރަކީ 46 އަހަރެވެ.

ޑޮލޯރްސް އޮރަޔޯޑާންގެ ބޭންޑު ކަމަށްވާ ދަ ކްރޭންބެރީސްއިން ނެރެފައިވާ ބަޔާނެއްގައި ބުނެފައިވަނީ އޭނާ މަރުވީ ކުއްލި ގޮތަކަށް އިނގިރޭސިވިލާތުގެ ލަންޑަނުގައި ކަމަށެވެ. ޑޮލޯރްސް އޮރަޔޯޑާންގެ މަރާއި ގުޅޭ ގޮތުން މިވަގުތު އިތުރު އެއްޗެއް ބުނަން ބޭނުންނުވާ ކަމަށް ބޭންޑުން ބުނެ އެވެ.

އެ ބަޔާނުގައި ބުނެފައިވަނީ ގެއްލުނީ ވަރަށް އަގުހުރި އާޓިސްޓެއް ކަމަށާއި އޭނާ އަކީ ވަރަށް ހުނަރުވެރި މީހެއް ކަމަށެވެ.

ޑޮލޯރްސް އޮރަޔޯޑާންގެ މަރާއި ގުޅިގެން އައިރިޝްގެ ރައީސް މައިކަލް ހިގިންސް ނެރުއްވާފައިވާ ބަޔާނުގައި ވިދާޅުވެފައި ވަނީ ޑޮލޯރްސް އޮރަޔޯޑާން މަރުވުމަކީ ވަރަށް ބޮޑު ހިތާމަފުޅެއް ގެނުވި ކަމެއް ކަމަށާއި ޑޮލޯރްސް އޮރަޔޯޑާން އާއި ދަ ކްރޭންބެރީ ބޭންޑަކީ ގައުމުގެ ފެންވަރުގައި އަދި ދުނިޔޭގެ ފެންވަރުގައި ނަމޫނާ ބައެއްކަމަށެވެ. އައިރިޝް މިއުޒިކަށް ލޯބިކުރާ ފަރާތްތަކަށް އެ ގެއްލުނީ އަގުހުރި މިއުޒީޝަނެއްކަމަށް ރައީސް މައިކަލް ނެރުއްވި ބަޔާނުގައި ވިދާޅުވެފައިވެ އެވެ. . އަދި އެއީ އެ ގައުމަށް ލިބުނު ބޮޑު ގެއްލުމެއްގެ ގޮތުގައި ވަނީ ސިފަކުރައްވާފައެވެ.

ޑޮލޯރްސް އޮރަޔޯޑާންގެ އެންމެ ފުރަތަމަ އަލްބަމް ނެރެފައިވަނީ 2007 ވަނަ އަހަރުގައެވެ. އެއީ "އާ ޔޫ ލިސެނިންގ" އެވެ.