އިނގިރޭސި ޖާސޫސީ އެޖެންޓް "ޖޭމްސް ބޮންޑް" ގެ ރޯލުން ފެނިގެން ދިޔަ އެކްޓަރު ރޮޖާ މޯ އަންގާރަދުވަހުގައި މަރުވެއްޖެއެވެ.

އޭނާ މަރުވިއިރު އުމުރަކީ 89 އަހަރެވެ. އޭނާ ވަނީ 12 އަހަރު ވަންދެން "ޖޭމްސް ބޮންޑުގެ" ރޯލު ކުޅެފައެވެ. ހަތް ފިލްމެއްގައި އޭނާ ވަނީ ބޮންޑްގެ ރޯލު އަދާކޮށްފައެވެ. މަޝްހޫރު އިނގިރޭސި ސީކްރެޓް އެޖެންޓްގެ ރޯލް އޭނާ ކުޅެން ފަށާފައި ވަނީ ސޯން ކޮނެރީ އަށް ފަހުއެވެ. 

ރޮޖާ މަރުވެފައި ވަނީ ސްވިޓްޒަލޭންޑުގެ ހޮސްޕިޓަލެއްގައި ކެންސަރަށް ފަރުވާދެމުން ދަނިކޮށެވެ.

ރޮޖާ މަރުވުމާ ގުޅިގެން އޭނާގެ އާއިލާއިން ނެރުނު ނޫސްބަޔާނެއްގައި ބުނީ އޭނާ މަރުވީ ކެންސަރު ބައްޔަށް ފަރުވާހޯދަމުން ދަނިކޮށް ކަމަށެވެ.

އިނގިރޭސިވިލާތަށް އުފަން ރޮޖާ "ޖޭމްސް ބޮންޑް"ގެ ރޯލް އެންމެ ފުރަތަމަ ކުޅުނީ  1973 ގައި ރިލީޒް ކުރި ބޮންޑް ފިލްމް "ލިވް އެންޑް ލެޓް ޑައި" ގަ އެވެ. އޭނާ "ޖޭމްސް ބޮންޑް" ގެ ރޯލުހުއްޓާލީ 1985 ގަ އެވެ.

ރޮޖާ މޯ ބޮންޑްގެ ރޯލް ކުޅުނު ފިލްމްތަކުގެ ތެރޭގައި "ދަ މޭން ވިތު ގޯލްޑެން ގަން" (1974)، "ދަ ސްޕައި ހޫ ލަވްޑް މީ" (1977)، "މޫންރެކާ" (1979)، "ފޮ ޔުއާ އައިސް އޮންލީ" (1981)، "އޮކްޓޮޕުސީ" (1983) އަދި "އަ ވިއު ޓު އަ ކިލް" (1985) ހިމެނެ އެވެ. އަދި މިހާތަނަށް އެންމެ ގިނަ ދުވަސް ވަންދެން ބޮންޑްގެ ރޯލް ކުޅެފައިވަނީ ވެސް އޭނާ އެވެ. 

ޖޭމްސް ބޮންޑްގެ ރޯލުގެ އިތުރުން ވެސް ގިނަ ފިލްމްތަކެއް އޭނާ ވަނީ އަދާކޮށްފައެވެ. އޭނާ އެންމެ ފަހުން ފެނިގެން ގޮސްފައި ވަނީ 2011 ވަނަ އަހަރު ރިލީޒްކުރި "އަ ޕްރިންސެސް ފޯ ކްރިސްމަސް" އިން އެޑްވަޑް ޑިއުކް އޮފް ކަސްލްބަރީގެ ރޯލުންނެވެ.