ސްރީލަންކާގެ ރިޔާސީ ދައުރަކީ ފަސް އަހަރުކަމާއި ރައީސް ސިރިސެނާއަށް ވެރިކަމުގައި ހުންނެވުމަށް އިތުރު އަހަރެއް ލިބިވަޑައިނުގަންނަވާނެ ކަމަށް އެ ގައުމުގެ ސުޕްރީމް ކޯޓުން  ރައީސް މައިތިރިޕާލާ ސިރިސެނާގެ ސެކްރެޓޭރިއަޓަށް އަންގަވައިފިއެވެ.

ވެރިކަމުގައި ހަ އަހަރު ހުންނެވިދާނެތޯ ބެލުމަށް އެގައުމުގެ ސުޕްރީމް ކޯޓުގެ ލަފަޔަކަށް ރައީސް ސިރިސެނާ އެދިވަޑައިގެންފައިވަނީ މިދިޔަ ހަފްތާގައެވެ.

 އެމަނިކުފާނު އެދިވަޑައިގެންފައިވާ މައްސަލަ ބަލަން އެގައުމުގެ ސުޕްރީމް ކޯޓުން ފަސް މެމްބަރުންގެ ބެންޗެއް ވަނީ އެކުލަވާލާފައެވެ.

ފަސް މެންބަރުންގެ ބެންޗުގައި ހިމެނިވަޑައިގަންނަވަނީ އުއްތަމަ ފަނޑިޔާރު ޕްރިޔަސަތު ޑެޕްއާއި، ފަނޑިޔާރު އީވާ ވަނަސުންދެރާ، ބުވަނެކަ އަލުވިހަރެ، ސިސިރާ ޑެ އެބްރޫ އަދި ކޭ.ޓީ ޗިތުރަސިރީއެވެ.

ފަސް މެމްބަރުންގެ އިއްތިފާގުން ނިންމަވާފައި ވަނީ ރިޔާސީ ދައުރަކީ ފަސް އަހަރު ކަމަށެވެ.

ސިރިސެނާ ވެރިކަމުގެ ދައުރަށް އެއް އަހަރު އިތުރު ކުރުމަށް އެގައުމުގެ ސުޕްރީމް ކޯޓަށް ހުށަހެޅުއްވިއިރު، 2015 ވަނަ އަހަރު ގާނޫނު އަސާސީ އަށް ބަދަލު ގެނެސް ރައީސްއަކަށް ވެރިކަމުގައި ހުންނެވޭނީ ހަ އަހަރުގެ ބަދަލުގައި ފަސް އަހަރު ކަމަށް ކަނޑައެޅުއްވުމުގައި އިސްކޮށް ހުންނެވީ ވެސް ރައީސް ސިރިސެނާއެވެ.

ގާނޫނު އަސާސީ އަށް 2015 ވަނަ އަހަރު ގެނައި އިސްލާހާ އެކު ސިރިސެނާގެ ވެރިކަމުގެ ދައުރު ހަމަވާނީ 2020 ވަނަ އަހަރެވެ. 

ސިރިސެނާގެ ހުށަހެޅުއްވި މައްސަލައާ ގުޅިގެން ސުޕްރީމް ކޯޓުގެ ބެންޗުގެ ފުރަތަމަ ބައްދަލުވުން ޖެނުއަރީ މަހުގެ 11 ވަނަ ދުވަހު ބާއްވާފައިވާއިރު ސުޕްރީމް ކޯޓަށް ފެންނަ ލަފާ ސިރިސެނާ އަށް އަރުވާފައިވަނީ ޖެނުއަރީ 14އިގައެވެ.

ސްރީލަންކާގެ ރައީސް އެމަނިކުފާނު ވެރިކަމުގެ ދައުރުގެ މުއްދަތު އިތުރު ކުރެއްވުމަށް މަސައްކަތްޕުޅު ކުރެއްވިއިރު ސިރިސެނާ ސަރުކާރުގެ ކޯލިޝަން ޕާޓްނަރު "ދަ ޔުނައިޓެޑް ނެޝެނަލް ޕާޓީ (ޔޫއެންޕީ)" އާ މެދު ވަނީ ނުތަނަވަސްކަން އުފެދިފައެވެ. ޔޫއެންޕީ ލީޑު ކުރައްވަނީ ލަންކާގެ ބޮޑުވަޒީރު ރަނިލް ވިކްރަމްސިންހައެވެ.