އީޔޫގެ ވަފުދު ރައީސް މައުމޫނާ ބައްދަލުކޮށްފި
މިނިވަން އިންސާފުވެރި އިންތިޚާބެއްގެ މުހިއްމު ކަމާ މެދު މަޝްވަރާ ކުރެވުނު
ރައީސް މައުމޫން، އަދި އެމަނިކުފާނުގެ ދަރިކަނބަލުން ޔުމްނާ، އީޔޫގެ ވަފުދާ އެކު
ހޮނިހިރު ދުވަހު ރާއްޖެއަށް ޒިޔާރަތްކުރި ވިލާތުގެ އިއްތިހާދުގެ ވަފުދު ކުރީގެ ރައީސުލްޖުމްހޫރިއްޔާ މައުމޫން ޢަބްދުލްޤައްޔޫމާއި ބައްދަލުކޮށްފިއެވެ.
މި ވަފުދާ ބައްދަލުކުރެއްވުމަށް ފަހު ރައީސް މައުމޫން ކުރެއްވި ޓްވީޓެއްގައި ވިދާޅުވީ، ރާއްޖޭގެ ސިޔާސީ މަސްރަހާ ގުޅޭ ގޮތުން ހުރި ކަންބޮޑުވުންތައް އެ ވަފުދާއި ހިއްސާ ކުރެއްވި ކަމަށެވެ. އަދި ހަމަ މިއާ އެކު މި އަހަރު ބާއްވަން ޖެހޭ ރިޔަސީ އިންތިޚާބަކީ މިނިވަން، އިންސާފުވެރި އަދި ދެ ފުށް ފެންނަ އިންތިޚާބަކަށް ހެދުމުގެ މުހިއްމު ކަމާއި ގުޅޭ ގޮތުން ވެސް ވިލާތުގެ އިއްތިހާދުގެ ވަފުދާއި މަޝްވަރާ ކުރެއްވި ކަމަށް ރައީސް މައުމޫން ވިދާޅުވިއެވެ. އެމަނިކުފާނު ވަނީ ރާއްޖެއާ މެދު ވިލާތުގެ އިއްތިހާދުން ބަހައްޓަވާ ގާތް ކަމަށް، އެ އިއްތިޙާދަށް ޝުކުރު ދަންނަވާފައެވެ.
ތިން މެންބަރުން ހިމެނޭ، އީޔޫގެ ޚާރިޖީ ގުޅުންތަކާ ބެހޭ އޮފީހުގެ މި ވަފުދުގައި އިސްކޮށް ހުންނެވީ ޔޫރަޕިއަން އެކްސްޓާރނަލް އެކްޝަން ސަރވިސަސްގެ ޑެޕިއުޓީ މެނޭޖިންގ ޑިރެކްޓަރ ޕައޯލާ ޕަމްޕަލޯނީއެވެ. އެކަމަނާގެ އިތުރުން ދެން މި ވަފުދުގައި ހިމެނެނީ ރާއްޖެއަށާއި ލަންކާއަށް ކަނޑައަޅާފައިވާ އީޔޫގެ ސަފީރު ޓޫންގް-ލައި މާރގް އާއި ޔޫރަޕިއަން އެކްސްޓާރނަލް އެކްޝަން ސަރވިސަސްގެ ދެކުނު އޭޝިއާ ޑިވިޝަންގެ ވެރިޔާ ކެރޮލިން ވިނޯޓްއެވެ.
މި ވަފުދުން ރާއްޖޭގައި ހަރަކާތްތެރިވާނީ ހޯމަ ދުވަހާ ހަމައަށެވެ.
ވިލާތުގެ އިއްތިހާދުގެ ވަފުދެއް ހޮނިހިރު ދުވަހު ރާއްޖެއަށް ޒިޔާރަތް ކުރިއިރު، އެ އިއްތިހާދުގެ އިންތިޚާބު އޮބްޒަރވްކުރާ ވަފުދުން ރާއްޖެއަށް ކުރި ޒިޔާރަތް ނިންމާލާފައި ވަނީ ހުކުރު ދުވަހުއެވެ. ދައުލަތުގެ އިސް ބައެއް ފަރާތްތަކާ ބައްދަލުކުރުމަށް އެ ވަފުދަށް އެޕޮއިންޓްމަންޓް ދީފައި ނުވާއިރު، ހުކުރު ދުވަހު އެބޭފުޅުން ފުރާވަޑައިގެންފައި ވަނީ ހަފްތާއެއްހާ ދުވަހު ރާއްޖޭގައި ތިއްބެވުމަށް ފަހުއެވެ.
