އަސާންޖަށް އިކުއެޑޯރގެ ރަށްވެހިކަން ދީފި

ވިކިލީކްސްގެ ވެރިޔާ ޖޫލިއަން އަސާންޖަށް ދެކުނު އެމެރިކާގެ ޤައުމެއްކަމަށްވާ އިކުއެޑޯރއިން ރަށްވެހިކަން ދީފިއެވެ.

ވިކިލީކްސްއިން އެމެރިކާގެ އަސްކަރީ ސިއްރުތަކެއް ލީކްކޮށްލިފަހުން، ހައްޔަރުކޮށް، އެކްސްޓްރަޑައިޓް ކޮށްފާނެކަމުގެ ބިރަށް އިނގިރޭސިވިލާތުގެ ވެރިރަށް ލަންޑަނުގައި ހުންނަ އިކުއެޑޯރގެ އެމްބަސީއަށް މީގެ 5 އަހަރުކުރިން ވަނީއްސުރެ އޭނާ ހުންނަނީ އެޤައުމުގެ ޙިމާޔަތުގައި އެމްބަސީގައެވެ.

އޮސްޓްރޭލިއާއަށް އުފަން އަސާންޖް ހައްޔަރުކޮށް ސްވިޑަންއަށް އެކްސްޓްރަޑައިޓްކުރުމަށް އިނގިރޭސި ފުލުހުން މަސައްކަތްކުރީ ސްވިޑަންގައި އޭނާގެ މައްޗަށް ޖިންސީ ފުރައްސާރައިގެ ތުހުމަތުތަކެއް ކުރެވިގެންނެވެ. އެހެން ނަމަވެސް އެ ތުހުމަތުތަކަށް އަސާންޖް އިންކާރުކުރެއެވެ. އަދި އިނގިރޭސީން އޭނާ ސްވިޑަންއަށް ޙަވާލުކުރުމުން، ސްވިޑަންއިން އޭނާ އެމެރިކާއަށް ހަވާލުކޮށްފާނެ ކަމުގެ ބިރު އެބައޮތްކަމަށް ބުނެ، އަސާންޖް އިކުއެޑޯރ އެމްބަސީއިން ޙިމާޔަތް ހޯދީ 2012 ވަނަ އަހަރެވެ.

އަސާންޖްގެ މައްޗަށް ސްވިޑަންގައި އުފުލި ދައުވާ އަނބުރާ ގެންގޮސްފައި ވީނަމަވެސް، އަދިވެސް އޭނާ ހައްޔަރުކުރަން އިނގިރޭސި ފުލުހުން ބޭނުންވެއެވެ.

އިކުއެޑޯރގެ ޚާރިޖީ ވަޒީރު މާރިއާ ފެނާންޑާ އެސްޕިނޯސާ ވިދާޅުވީ އަސާންޖަށް މިހާރު އިކުއެޑޯރގެ ރަށްވެހިކަން ދީފައިވާކަމަށެވެ. އަދި އޭނާއަށް ރައްކާތެރިކަމާއިއެކު ލަންޑަނުގައި ހުންނަ އެމްބަސީއިން ނިކުމެވޭނެ މަގު ފަހިކުރުމަށްޓަކައި، އޭނާއަށް ޑިޕްލޮމެޓިކް އިމްތިޔާޒު ދިނުމަށް އިނގިރޭސި ޚާރިޖިއްޔާގައި އިކުއެޑޯރ ސަރުކާރުން އެދުނެވެ. ނަމަވެސް އިކުއެޑޯރގެ އެ އެދުމަށް އިނގިރޭސި ސަރުކާރުން އާނ ބަސް ބުނެފައެއް ނުވެއެވެ.

އިނގިރޭސި ފޮރިން އޮފީހުން ނެރުނު ބަޔާނެއްގައި ވަނީ އަސާންޖްގެ މައްސަލަ ހައްލުކުރުމަށް އޮތް ހަމައެކަނި ގޮތަކީ އޭނާ އެމްބަސީއިން ނިކުމެ، އިންސާފާއި ކުރިމަތިލުންކަން އިކުއެޑޯރއަށް އެނގެން ޖެހޭނެކަމަށެވެ.

އަސާންޖްވަނީ އިކުއެޑޯރގެ ޤައުމީ ޓީމްގެ ޖަރޒީގައި ހުރެ ނަގާފައިވާ ފޮޓޯއެއް ބުދަ ދުވަހު ޓްވިޓަރގައި އާއްމުކޮށްފައެވެ.

އަސާންޖް ގެންދަނީ އެމްބަސީގައި ހުރެގެންވެސް ވިކިލީކްސް މެދުވެރިކޮށް އެކި ޤައުމުތަކުގެ ސިއްރުތައް ހާމަކުރަމުންނެވެ.