"ގޯލްޑް 100" އެވޯޑްސްގެ ޕްލެޓިނަމް ޕާޓްނަރަކަށް ބީއެމްއެލް ހަމަޖައްސައިފި
މިއީ ބީއެމްއެލް އިން "ގޯލްޑް 100" އެވޯޑްސްގައި ބައިވެރިވާ ދެވަނަ ފަހަރު
"ގޯލްޑް 100" އެވޯޑްސްގެ ޕްލެޓިނަމް ޕާޓްނަރަކަށް ބެންކް އޮފް މޯލްޑިވްސް (ބީއެމްއެލް) ހަމަޖައްސައިފި
"ގޯލްޑް 100" އެވޯޑްސްގެ ޕްލެޓިނަމް ޕާޓްނަރަކަށް ބޭންކް އޮފް މޯލްޑިވްސް (ބީއެމްއެލް) ހަމަޖައްސައިފިއެވެ.
މި އަހަރުގެ ފެބްރުއަރީ 22 ވަނަ ދުވަހު "ގޯލްޑް 100 ގާލާ" އެވޯޑްސްގައި ވިޔަފާރީގެ ދާއިރާގައި ހަރަކާތްތެރިވާ އެންމެ ރަނގަޅު 100 ކުންފުނި ހޮވުމަށް ހަމަޖެހިފައިވާއިރު މިއީ ބީއެމްއެލް އިން "ގޯލްޑް 100" އެވޯޑްސްގައި ބައިވެރިވާ ދެވަނަ ފަހަރެވެ.
ބީއެމްއެލްގެ ޑިރެކްޓަރ އޮފް ބިޒްނަސް ކުލްދީޕް ޕަލިވާލް ވިދާޅުވީ ދެވަނަ ފަހަރަށް ގޯލްޑް 100 އެވޯޑްސްގައި ބައިވެރިވާން ފުރުސަތު ލިބުމުން އުފާކުރައްވާ ކަމަށާއި ބީއެމްއެލް އިން ރާއްޖޭގެ ވިޔަފާރީތައް ފުޅާކުރުމަށް އެހީތެރިކަން ފޯރުކޮށްދެމުން އަންނަ ކަމަށެވެ. އަދި މި އެވޯޑާ އެކު ބޭންކުން ދަނީ އެކި ކުންފުނިތަކުން ހޯދަމުންދާ ކާމިޔާބުތަކުގެ އަގުވަޒަން ކުރަމުން ކަމަށް ވެސް އޭނާ ވިދާޅުވިއެވެ.
މޯލްޑިވްސް ގެޓަވޭސް އާއި ކޯޕަރޭޓް މޯލްޑިވްސް ގުޅިގެން އިންތިޒާމްކުރާ މި އިވެންޓަކީ ރާއްޖޭގައި އެންމެ ފުޅާދާއިރާއެއްގައި ވިޔަފާރިކުރަމުން އަންނަ 100 ކުންފުނި ހޮވުމަށް ބާއްވާ އެޑިޝަންއެކެވެ.
ބީއެމްއެލް އިން ބުނީ ވޭތުވެދިޔަ އަހަރެކޭ އެއްގޮތަށް ރާއްޖޭގެ އެންމެ ކުރިއަރާފައިވާ 100 ވިޔަފާރި ކުންފުނި ހޮވުމަށްޓަކައި ހުށަހެޅޭ ކުންފުނިތަކުގެ މައުލޫމާތު އިވެލުއޭޓްކުރުމަށް މިނިވަން ކޮންސަލްޓަންސީ ފާމެއް ކަނޑައަޅާފައިވާ ކަމަށާއި، އެ އެވޯޑްތައް ލިބޭ ފަރާތްތައް އާންމު ކުރުމަށް ހާއްސަ ރަސްމިޔާތެއް ވެސް ބާއްވަން ހަމަޖެހިފައިވާ ކަމަށެވެ.
ގޯލްޑް 100 ގާލާ އެވޯޑްސް ހަފްލާގެ ތެރެއިން ދެ ފަރާތަކަށް ލައިފްޓައިމް އެޗީވްމަންޓް އެވޯޑް ވެސް ދޭނެއެވެ.
އެގޮތުން ގޯލްޑް 100 އަށް ނޮމިނޭޓްކުރާ ކުންފުނިތަކުގެ ޝަރުތުތަކެއް ފުރިހަމަވާން ޖެހެއެވެ. އެއީ ނޮމިނޭޓް ކުރަން ހުށަހަޅާ ކުންފުންޏަކީ ރަޖިސްޓްރީ ކުރެވިފައިވާ ކުންފުންޏަކަށްވުމާއި ރާއްޖޭގެ ކުންފުންޏަކަށްވުމާއި 2016 ވަނަ އަހަރު ކުންފުނީގެ އާމްދަނީގެ ގޮތުގައި 10 މިލިއަން ރުފިޔާ ލިބިފައިވުން ހިމެނެއެވެ.
ގޯލްޑް 100 ކުންފުނީގެ ގޮތުގައި ހޮވޭ ކުންފުނިތައް އެ ހަފްލާގައި ނެރޭ ގޯލްޑް 100 މެގަޒިންގައި ލިސްޓްކުރާނެއެވެ.
