އިޓަލީއަށް ނިސްބަތްވާ ގިނަ އަދަދެއްގެ ފުޓްބޯޅަ ކުޅުންތެރިން ރާއްޖޭގައި ޗުއްޓީ ހޭދަކުރަމުން އެބަދެއެވެ.
ސޯޝަލް މީޑިއާ ޕްލެޓްފޯމް އިންސަޓްގްރާމްގައި ޕޯސްޓްކޮށްފައިވާ ބައެއް ފޮޓޯތަކަށް ބަލާލާއިރު އިޓަލީގެ ޔުވެންޓަސްއަށް ނިސްބަތްވާ ހަތަރު ކުޅުންތެރިޔަކު އަންނަނީ ރާއްޖޭގައި ޗުއްޓީ ހޭދަކުރަމުންނެވެ. އެގޮތުން އެ ޓީމުގެ ޑިފެންސްގެ އެންމެ މައި ދެ ތަނބު ކަމަށްވާ އަންދްރޭ ބަރްޒަގާލީއާ ޖިއޯޖިއޯ ކިއެލީނީގެ އިތުރުން އެ ޓީމުގެ ތަޖުރިބާކާރު މިޑްފީލްޑަރު ކްލައުޑިއޯ މާކިސިއޯ އަންނަނީ ރާއްޖޭގައި ޗުއްޓީ ހޭދަކުރަމުންނެވެ. ހަމައެހެންމެ އެ ޓީމުގެ ޒުވާން މިޑްފީލްޑަރު ސްޓެފަން ސްޓުރާރޯ ވެސް މިވަގުތު ހުރީ ރާއްޖޭގައެވެ.
ޔުވެންޓަސްގެ މި ކުޅުންތެރިންގެ އިތުރުން ދާދިފަހުން އެ ޓީމު ދޫކޮށް ވާދަވެރި އޭސީ މިލާންއަށް ބަދަލުވި އިތުބާރު ޑިފެންޑަރު ލިއޮނާޑޯ ބޮނޫޗީ އަދި ތަޖުރިބާކާރު ކީޕަރު މާކޯ ސްޓޮރާރީ ވެސް މިވަގުތު ތިބީ ރާއްޖޭގައެވެ. މީގެއިތުރުން ނަޕޯލީގެ މިޑްފީލްޑަރު އެމާނުއެލް ގިއަކެރީނީ ވެސް މިވަގުތު ހުރީ ރާއްޖޭގައެވެ. މި ހުރިހާ ކުޅުންތެރިންނަކީ ވެސް މީގެކުރިން ޔުވެންޓަސްއަށް ކުޅެފައިވާ ކުޅުންތެރިންކަން ފާހަގަ ކޮށްލެވެއެވެ.
މި ކުޅުންތެރިންގެ ތެރެއިން ބޮނޫޗީ އަދި ކިއެލީނީގެ އިތުރުން ގިއަކެރީނީ ޗުއްޓީ ހޭދަކުރަމުން އަންނަނީ އެއް ރިސޯޓެއްގައެވެ. އެގޮތުން ކިއެލީނީގެ އަންހެނުން ކެރޮލައިން ބޮނިސްޓާލީ އިންސްޓަގްރަމްގައި ޕޯސްޓްކޮށްފައިވާ ފޮޓޯއެއްގައި މި ތިން ކުޅުންތެރިން އެ ކުޅުންތެރިންގެ އާއިލާއާއެކު ރެސްޓޯރެންޓުގެ މޭޒުގައި ތިބޭ މަންޒަރު ފެނިގެންދެއެވެ. ހަމައެހެންމެ ރާއްޖޭގެ ސާފު މޫދާއި ހިތްގައިމު ގޮނޑުދޮށްތަކުގައި އަރާމުކުރާ މަންޒަރު އޭނާގެ ސްޓޯރީއިން ފެނިގެންދެއެވެ.
ރާއްޖެއެމްވީއަށް އެނގިފައިވާ ގޮތުގައި ސްޓޮރާރީއާ ބަރްޒަގާލީ އަދި ސްޓުރާރޯގެ އިތުރުން މާކިސީއޯ ޗުއްޓީ ހޭދަކުރަމުން އަންނަނީ ފޯ ސީޒަންސް ލަނޑާގިރާވަރު ރިސޯޓުގައެވެ. ސްޓޮރާރީގެ އިންސްޓަގްރަމް ސްޓޯރީއިން ވެސް މި ކުޅުންތެރިން ރާއްޖޭގެ މާހައުލުގައި ހިތްހަމަޖެހުމާއެކު ޗުއްޓީ ހޭދަކުރަމުންދާ މަންޒަރު ފެނެއެވެ.
ފިނި މޫސުމުގެ ޗުއްޓީ ހޭދަކުރުމަށް ކޮންމެ އަހަރަކު ވެސް ދުނިޔޭގެ މަޝްހޫރު ކުޅުންތެރިން ރާއްޖެއަށް އާދެއެވެ. ވަކިން ހާއްސަކޮށް އިޓަލީގެ ކުޅުންތެރިންގެ މެދުގައި ޒަމާނުއްސުރެ ވެސް ރާއްޖެއަކީ ޗުއްޓީ ހޭދަކުރުމަށް މަޝްހޫރު މަންޒިލެކެވެ. މީގެކުރިން އަންދްރެއާ ޕިރްލޯއާއި ޕައޮލޯ މަލްޑިނިއާ މެތިއު ފްލެމިނީ އަދި ފިލިޕޯ އިންޒާގީ ފަދަ އިޓަލީއަށް ނިސްބަތްވާ މަޝްހޫރު ކުޅުންތެރިން ރާއްޖެ އައިސްފައިވެއެވެ.
