އިއްތިހާދުގެ ބޯޓެއްގެ ފާޚާނާ ތެރޭގައި ވިހެއުމަށްފަހު މަރުވެފައި އޮތް ކުއްޖަކު ފެނިއްޖެ
8 ޖެނުއަރީ 2018 | ހޯމަ 17:44ތުހުމަތުގައި 37 އަހަރުގެ އަންހެނަކު ވަނީ ހައްޔަރު ކޮށްފައި
އިއްތިހާދު އެއަރވޭޒްގެ ފްލައިޓެއް
އިއްތިހާދު އެއަރވޭޒް ގެ ބޯޓެއްގެ ފާޚާނާ ތެރޭގައި ވިހެއުމަށް ފަހު މަރުވެފައި އޮތް ކުއްޖަކު ފެނިއްޖެއެވެ. ކުއްޖާ އޮތީ ފާޚާނާގެ ވަތްގަނޑެއްގެ ތެރެއަށް ލާފައެވެ.
ކުއްޖާ ފެނުނީ ސާފު ކުރަން ޖަކާޓާގެ ވައިގެބަނދަރުން ބޯޓަށް އެރި މީހުންނަށެވެ.
މައްސަލައިގެ ތުހުމަތުގައި އިންޑޮނީޝިއާގެ ފުލުހުން ވަނީ 37 އަހަރުގެ އަންހެނަކު ހައްޔަރު ކޮށްފައެވެ.
ބެލެވޭ ގޮތުގައި މި އަންހެން މީހާ ފާޚާނާ ތެރޭގައި ވިހެއީ މި ދިޔަ ހޮނިހިރު ދުވަހު އަބޫދާބީން ފުރައިގެން އިންޑޮނީޝިއާގެ ވެރިރަށް ޖަކާޓާ އަށް ދަތުރު ކުރަމުން ދަނިކޮށްނެވެ.
އަންހެން މީހާ އަކީ އަބޫދާބީގައި މަސައްކަތް ކުރާ އިންޑޮނީޝިއާގެ ހުޅަނގު ޖާވާގެ އަވަށަކަށް ނިސްބަތްވާ މީހެކެވެ. އޭނާ އަބޫދާބީގައި މަސައްކަތް ކުރާތާ 4 އަހަރު ވެއްޖެ ކަމަށް ފުލުހުންނާ ހަވާލާދީ ރިޕޯޓުތަކުގައި ވެއެވެ.
ބޯޓު ދަތުރު ކުރަމުން ދަނިކޮށް އަންހެން މީހާ ލޭ ފައިބާތީ، ހާލު މާ ސީރިއަސް ވުމާއެކު ސިއްހީ ޚިދުމަތް ދިނުމަށް ދަތުރުގެ މިސްރާބު ބަދަލު ކޮށް ބެންކޮކް އަށް ބޯޓު ޖެއްސިއެވެ.
ބެންކޮކް އަށް އަންހެން މީހާ ބޭލުމަށްފަހު ބޯޓުގެ މަންޒިލަށް އަލުން ދަތުރު ފެށި އިރުވެސް ބޯޓުގެ ފާޚާނާގައި އޭނާ ވިހާފައި އޮތް ކުއްޖާ މަރުވެފައި އޮތް ކަމެއް ނޭގެއެވެ. އެކަން އެނގުނީ ބޯޓު ޖަކާޓާގައި ޖެއްސުމަށް ފަހުގައެވެ.
ހާނީ ނަމަކަށް ކިޔާ މި އަންހެން މީހާ އިންޑޮނީޝިއާގެ ފުލުހުން ހައްޔަރު ކުރީ ސިއްހީ ފަރުވާ އަށް ފަހު އެހެން ފްލައިޓެއްގައި އިންޑޮނީޝިއާ އަށް އައުމާ އެކުގައެވެ.
އޭއެފްޕީ އަށް ޖަކާޓާގެ އެއަރޕޯޓުގެ ފުލުހަކު ކިޔައިދިން ގޮތުގައި ބޯޓު ސާފު ކުރާ މީހުންނަށް ދުވަސްފުރާ ވިހާފައިވާ މިކުއްޖާ ފެނުނު އިރު އޮތީ ޕްލާސްޓިކް ކޮތަޅަކަށް ލާ އޮޅާލާފައެވެ.
ކުއްޖާ މަރުވި ސަބަބު އިންޑޮނީޝިއާގެ ފުލުހުން ގެންދަނީ ތަހުގީގު ކުރަމުންނެވެ.
