ދިވެހި ރާއްޖެއިން ލަންކާއަށް ކަނޑައަޅުއްވާފައި ހުންނަވާ ސަފީރު، މުހައްމަދު ހުސެއިން ޝަރީފު (މުންދު) ކުރީގެ ރައީސް މުހައްމަދު ނަޝީދާއި މައުމޫނު އަބްދުލް ގައްޔޫމްގެ ހާރިޖީ ސިޔާސަތުތަކަށް ވަރަށް ބޮޑަށް ފާޑު ވިދާޅުވެއްޖެއެވެ.

ޕީޕީއެމް އިން "ރުމާލު 2" ޖަގަހައިގަ އާދިއްޔަ ދުވަހުގެ ރޭ ބޭއްވި ޖަލްސާގައި ވާހަކަ ދައްކަވަމުން މުންދު ވިދާޅުވީ ރައީސް އަބްދުﷲ ޔާމިނަކީ ހާރިޖީ ދާއިރާގައި ދެ ވަނައެއް ނެތް ފަދަ ބޭފުޅެއް ކަމަށެވެ. ރައީސް މައުމޫނުގެ ސަރުކާރަށް ނިސްބަތްވާ ގޮތައް މުންދު ވިދާޅުވީ މީގެ ކުރިން ދިވެހިންނަށް ވިސްނައިދޭން މަސައްކަތްކުރީ ރާއްޖެއަކީ ކުޑަ އަދި މުސްތަގުބަލެއް ނެތް ގައުމެއްގެ ގޮތުގައި ކަމަށެވެ.

"އަޅުގަނޑުމެން ދިވެހިނަށް އޭރު ވިސްނުނީ އަޅުގަނޑުމެނަކީ ވަރަށް ނިކަމެތި ވަރަށް ކުޑަ ކުޑަ ބައެކޭ. އަޅުގަނޑުމެން ބަސް އަހައިގެން އެހެން މީހުން ބުނާ ގޮތަށް އުޅެފިއްޔާ ފަހަރެއްގައި އެއްޗެއް ދިއްކޮށްލަފާނެ އޭ. ދިއްކޮށްލައިފިއްޔާ އެއިން ލައިގެން ކައިގެން އުޅެވޭ ވަރުވާނެ އޭ. މިއީ ހާރިޖީ ވިސްނުމެއްގެ ގޮތުގައި އެންމެ ފުރަތަމަ ބޮލަށް ވެއްދި އެއްޗަކީ. އަޅުގަނޑުމެންގެ ސައިޒް އަޅުގަނޑުމެނަށް ދެއްކީ ވަރަށް ކުޑަކޮން ހަގީގަތުގައި އަސްލު ސައިޒަށް ވުރެ ކުޑަކޮށް،" ރައީސް ނަޝީދުގެ ވެރިކަމާ ރާއްޖޭގެ ހާރިޖީ ސިޔާސަތު ސިފަ ކޮށްދެއްވަމުން މުންދު ވިދާޅުވިއެވެ.

އޭގެ ފަހުން ރައީސް ނަޝީދު ވެރިކަމުގައި ގެންގުޅުއްވި ހާރިޖީ ސިޔާސަތުގައި ދިވެހިންނަށް ވިސްނަދިނުމަށް މަސައްކަތް ކޮށްފައި ވަނީ ދިވެހިން ކުރަމުން އައި މަސައްކަތްތަކާއި ދިވެހިންގެ ސަގާފަތް ދޫކޮށްލައިގެން ނޫނީ ގައުމު ތަރައްގީ ނުވާނެކަމުގެ ވިސްނުން ކަމަށް މުންދު ވިދާޅުވިއެވެ.

"އެހެން ބަޔަކު އުޅޭ ގޮތައް އުޅުނީމަ އެމީހުން ވެސް އުފަލުން އައިސް އަޅުގަނޑުމެން ކޮނޑަށް ލައިގެން ކޮންމެ ވެސް ތާކަށް ގެންދާނެ އޭ. ކޮންމެވެސް އައްސޭރިއަކަށް ނަމަވެސް ގެންދާނެ އޭ. އެއީ ދެން އައި ވިސްނުން،" މުންދު ވިދާޅުވިއެވެ.

މުންދު ވިދާޅުވީ ރައީސް ޔާމިންގެ ހާރިޖީ ވިސްނުންފުޅުގައި ރާއްޖެ ދެކެނީ ދުނިޔޭގެ އެންމެ ބާރުގަދަ އަދި އެންމެ ނުފޫޒުގަދަ ގައުމުތަކާ އެއްވަރުގެ ގާބިލިއްޔަތު ހުރި ގައުމެއްގެ ގޮތުގައި ކަމަށެވެ.

"މިއަދު އަޅުގަނޑުމެނަށް އަޅުގަނޑުމެންގެ ސައިޒް ފެންނަނީ މީގެ ކުރީގައި ރައީސްކަން ކުރައްވާފައިވާ ބޭފުޅުން ވިސްނަދެއްވާފައިވާ ވިސްނުމަކު ނޫން. އަޅުގަނޑުމެން މިއަދު ބޭރު ގައުމުތަކަށް ގޮސް މި ތިބެނީ ވިސާރި ސައިޒްގައި ފަހްރުވެރިކަމާ އެކު،" މުންދު ވިދާޅުވިއެވެ.

އދ. ގެ ސެކިއުރިޓީ ކައުންސިލްގައި ރާއްޖެ ތަމްސީލްކުރާ ވާހަކަ މީގެ ކުރިން ރައީސަކު ދައްކަވާފައިނުވާއިރު ރައީސް ޔާމިންގެ ވެރިކަމުގައި އެ ކަން ހާސިލުވުމަށް ވަރަށް ކައިރި ވެއްޖެ ކަމަށް ވެސް މުންދު ވަނީ ވިދާޅުވެފައެވެ. އަދި ވިދާޅުވީ މި ސަރުކާރުގެ ވަޒީރުން ބޭރުގެ ގައުމުތަކުގައި ދައްކަވާ ވާހަކަފުޅުތައް ބޭރުގެ ފޮތްތަކުގައި ވެސް ލިޔަމުންދާ ކަމަށެވެ. ހަމަ އެހެންމެ ޖަޕާނާއި ސައުދީ އަރަބިއްޔާ އާއި މެލޭޝިޔާ ފަދަ ގައުމުތަކާއި ރާއްޖެއާ ދެމެދު މިހާރު އޮތް ފަދަ ގާތްގުޅުމެއް މީގެ ކުރީ ސަރުކާރެއްގައި ނެތް ކަމަށް ވެސް އޭނާ ވިދާޅުވިއެވެ.

މީގެ އިތުރުން މުންދު ވިދާޅުވީ ދިވެހި ރާއްޖޭގެ ރައީސުލް ޖުމްހޫރިއްޔާގެ މަގާމަށް ރައީސް ޔާމިނަށް ވުރެ ކުފޫ ހަމަވާ އެހެން ދިވެއްސަކު ނެތް ކަމަށެވެ. ރައީސް ޔާމިނަކީ މި ގައުމުގެ "ސިޔާދަތުގެ ބަތަލް" ކަމަށެވެ. އަދި މި ސަރުކާރުގައި ހުރިހާ ގައުމުތަކާ ވެސް ގުޅުން ބަދަހިކުރުމުގެ އިތުރަށް ގުޅުން ނެތް ގައުމުތަކާ ގުޅުން ބަދަހި ކުރަމުންދާ ކަމަށް އޭނާ ވިދާޅުވިއެވެ.

"އަޅުގަނޑުމެނަށް އަލަށް މި ލިބެނީ ސިޔާދަތުގެ ބަތަލެއް. މިނިވަން ކަމާއި ސިޔާދަތަކީ ދެ އެއްޗެއް. އަޅުގަނޑުމެންގެ ދަރިންނާ ދަރިންނާ ހިސާބަށް ދާއިރު ޓެކްސްޓް ފޮތްތަކުގައި ލިޔެވިފައި ހުންނާނެ،" މުންދު ވިދާޅުވިއެވެ. 

އޭނާ އެހެން ވިދާޅުވި ނަމަވެސް ދިވެހި ރާއްޖެ އިން ވަނީ ގަތަރާ އެކު އޮތް ސިޔާސީ ގުޅުން ކަނޑާލާފައެވެ. އަދި ކޮމަންވެލްތުން ވަކިވެފައިވާއިރު ބައެއް އެހެން ގައުމުތަކާ ދެމެދު އޮތް ހާރިޖީ ގުޅުންތައް ވަނީ ވަރަށް ބޮޑަށް ގޯސްވެފައެވެ.