އެމެރިކާ އިން އދ. ފަދަ ޖަމާއަތްތަކަށް ހަރަދުކުރާ މިންވަރު ކުޑަކުރުމަށް އަމުރެއް ނެރުމަށް ނިންމާފައިވާ ކަމަށް ނިއު ޔޯކް ޓައިމްސް އިން ހާމަކޮށްފި އެވެ.
ޓްރަމްޕް ސަރުކާރުގެ އޮފިޝަލަކާ ހަވާލާދީ އެ ނޫހުގައި ބުނެފައިވަނީ "އޯޑިޓިންގ އެންޑް ރެޑިއުސިންގ ޔޫއެސް ފަންޑިންގ އޮފް އިންޓަނޭޝަނަލް އޮގަނައިޒޭޝަންސް" ގެ ނަމުގައި އެކުލަވާލާފައިވާ އަމުރުގެ ދަށުން، ވަކި ގިންތިތަކަށް ނުފެތޭ ޖަމާއަތްތަކަށާއި މަޝްރޫއުތަކަށް ދޭ ފައިސާގެ އަދަދު މަދުކުރެވޭނެ ކަމަށެވެ. މީގެ ތެރޭގައި މޫސުމީ ބަދަލުތަކާ ބެހޭ ގޮތުން އެކުލަވާލާފައިވާ ގަރާރުތައް ވެސް ހިމެނެ އެވެ.
މި އަމުރުގައި ހާއްސަ ގޮތެއްގައި ފަލަސްތީނު ފާހަގަކޮށްފައި ވެއެވެ. އެގޮތުން، ފަލަސްތީނުގެ މިނިވަން ކަމަށް ވަކާލާތުކުރާ ނުވަތަ އެކަމަށް ތާއީދުކުރާ ޖަމާއަތްތަކަށް ފައިސާ ދިނުން ހުއްޓޭނެ އެވެ. މި ލިސްޓްގައި ޕަލެސްޓައިން ލިބަރޭޝަން އޯގަނައިޒޭޝަން (ޕީއެލްއޯ)، އިރާނާއި ނޯތު ކޮރެއާ ބަލައިގަންނަ ޖަމާއަތްތައް ވެސް ހިމަނާފައި ވެއެވެ.
އދ. ގެ އިންޓަނޭޝަނަލް ކްރިމިނަލް ކޯޓު، ޕޮޕިއުލޭޝަން ފަންޑް އަދި ޕީސްކީޕިންގ ފޯސް މި އަމުރުގައި ހިމަނާފައިވާ އިރު، މި އިދާރާތަކަށް ހަރަދުކުރާ ފައިސާގެ މިންވަރު 40 އިންސައްތަ ކުޑަކުރެވޭނެ އެވެ. މި ނިންމުމުގެ ސަބަބުން، އދ. އިން 16 ގައުމެއްގައި ހިންގާ ސަލާމަތީ އޮޕަރޭޝަންތަކަށް ވަރަށް ބޮޑު ނޭދެވޭ އަސަރެއް ކުރާނެ އެވެ.
ޓްރަމްޕް ވަނީ އދ. އަކީ މީހުން މަޖާކޮށްލުމަށްދާ ކްލަބެއްގެ ގޮތުގައި ސިފަކުރައްވާފަ އެވެ.
