މަކަރު ހީލަތުގެ ކުށުގައި ތައިލެންޑް މީހަކު 13،275 އަހަރަށް ޖަލަށް ލުމަށް ހުކުމް ކޮށްފި

މަކަރު ހީލަތް ހަދައިގެން މީހުންގެ އަތުން ގިނަ އަދަދެއްގެ ފައިސާ ހޯދި ކަމުގެ ކުށް ސާބިތުވެ ތައިލެންޑްގެ ރައްޔިތަކު 13،275 (ތޭރަ ހާސް ދުއިސައްތަ ހަތް ދިހަ ފަހެއް) އަހަރަށް ޖަލަށް ލުމަށް ހުކުމް ކޮށްފިއެވެ.

އުމުރުން 34 އަހަރުގެ ޕުޑިތް ކިއްޓިތްރަޑިލޮކް ވަނީ މަކަރު ހީލަތް ހަދައިގެން އެތައް ބައެއްގެ އަތުން ގިނަ އަދަދެއްގެ ފައިސާ ހޯދި ކަމަށް ކޯޓުގައި އިއުތިރާފް ވެފައެވެ.

އިންވެސްޓް ކޮށްގެން ރަނގަޅު ފައިދާ އެއް ލިބޭނެ ކަމަށް ބުނެ ސާޅީސް ހާހަށް ވުރެ ގިނަ މީހުން މަޅީގައި ޖައްސައިގެން އެމީހުންގެ އަތުން 160 މިލިއަން ޑޮލަރަށް ވުރެ ގިނަ ފައިސާ އޭނާ ހޯދިކަން ކޯޓުގައި ވަނީ ސާބިތު ވެފައެވެ.

ދައުލަތުގެ ވަކީލުން ކޯޓުގައި ބުނެފައިވަނީ، ޕުޑިތް އަކީ، މީހުން ލައްވާ އިންވެސްޓް ކުރުވުމަށް ކޮންފަރެންސްތައް ބާއްވައިގެން އިމާރާތް ކުރުމާއި، ސެކަންޑް ހޭންޑް ވެހިކަލް އެކްސްޕޯޓު ކުރުން ފަދަ ކަންކަމުން ބޮޑު ފައިދާ އެއް ލިބޭނެ ކަމަށް ބުނެ މީހުންގެ ޝައުގުވެރިކަން ހޯދައިގެން އޭނާގެ ކުންފުނިތަކަށް މީހުން ލައްވާ އިންވެސްޓް ކުރުވާ މީހެއް ކަމަށެވެ. ޕުޑިތް ސެމިނަރ ތަކުގައި ބައިވެރިވާ މީހުންގެ ގާތު އޭނާ ބުނަނީ އިންވެސްޓް ކުރުމުން ލިބޭ ފައިދާގެ އިތުރުން، އިންވެސްޓް ކުރާ މީހުން މެދުވެރި ވެގެން އިތުރު އިންވެސްޓަރުން ހޯދުމުން އިތުރު ބޯނަސް ލިބޭނެ ކަމަށެވެ. މި ގޮތުން ކުރިން ފައިސާ ދިން މީހުންނަށް ލާރި ދެނީ އަލަށް ބައިވެރިވެ އިންވެސްޓް ކުރާ މީހުން ދޭ ފައިސާ ބޭނުން ކޮށްގެން ކަމަށްވެސް ވަކީލުން ބުނެފައިވެއެވެ.

ޕުޑިތްގެ މައްޗަށް އައި ހުކުމުގެ އިތުރުން، މަކަރު ހަދައިގެން ފައިސާ ހޯދުމަށް ޕުޑިތް އުފައްދާފައިވާ ދެ ކުންފުނިން ކުރެ ކޮންމެ ކުންފުންޏެއް 20 މިލިއަން ޑޮލަރުން ކޯޓުން ވަނީ ޖުރިމަނާ ކޮށްފައެވެ. އަދި އޭނާގެ މަޅީގައި ޖެހުނު މީހުންގެ ތެރެއިން 2،653 ފަރާތްތަކަށް އަހަރަކު 7.5 ޕަސެންޓްގެ އިންޓަރެސްޓް ރޭޓުން ގާތްގަނޑަކަށް 17 މިލިއަން ޑޮލަރު ދިނުމަށްވެސް ކޯޓުން ވަނީ ހުކުމް ކޮށްފައެވެ.