އެމެރިކާގެ އޭޓީއެމެއްގެ ތެރޭގައި މީހަކު ތާށި ވެއްޖެ

އެމެރިކާގެ ޓެކްސަސް ސިޓީގެ އޭޓީއެމް މެޝިނެއް ތެރޭގައި ބުދަ ދުވަހު މީހަކު ތާށި ވެއްޖެއެވެ.

އޭޓީއެމް މެޝިން ތެރޭ ތާށިވެފައިވަނީ ބޭންކެއްގައި މަސައްކަތްކުރަމުން އަންނަ ފިރިހެނެއް ކަމަށް ޚަބަރުތައް ބުނެއެވެ. މި މީހާ އޭޓީއެމް މެޝިން ތެރޭ ތާށިވެފައިވާކަން އެނގުނީ ލާރި ނަގަން އޭޓީއެމް އަށް ގޮސް ހުރި މީހަކަށް ފައިސާ ނަގަން ޖެހުމުން ފައިސާގެ ބަދަލުގައި ކަރުދާސް ކޮޅެއް އައުމާ ގުޅިގެންނެވެ.

ކަރުދާސް ކޮޅުގައި ލިޔެފައި އޮތީ "އަހަންނަށް އެހީވެދީ. އަހަރެން މިހިރީ އެތެރޭގައި ތާށިވެފައި. އަހަރެން އަތުގަ ފޯނެއް ވެސް ނެތް. އަހަރެންގެ ބޮސްއަށް ގުޅައިދީ" މިހެންނެވެ. އަދި އެ ކަރުދާސް ކޮޅުގައި އޭނާގެ ބޮސްގެ ނަންބަރު ވެސް ވަނީ ލިޔެފައެވެ.

ލާރި ނަގަން އޭޓީއެމް އަށް ދިޔަ މީހާއަށްވީ މިއީ ވަރަށް ހައިރާންކުރުވަނި ކަމަށެވެ. އަދި އެ މީހާ ވަގުތުން ބޮސްއަށް ފޯނުކޮށް އެވާހަކަ ކިޔައިދިނެވެ. ބޮސް އެތަނަށް އައިސް ފުލުހުންނަށް ގުޅިއެވެ.

ފުލުހުންނަށް ވެސް މިކަންވީ ޤަބޫލުކުރަން ދަތި މަޖާ ކަމަކަށެވެ. ސިފައިން އެތަނަށް ގޮސް ގާތްގަނޑަކަށް ދެ ގަނޑިއިރު ތެރޭގައި ވަނީ އޭޓީއެމް ތެރެއިން އެ މީހާ ނެރެދީފައެވެ.

އެތަނުގައި ހަރަކާތްތެރިވި ފުލުހންގެ މީހަކު ބުނެފައިވަނީ ވަރަށް މަދުން ނޫނީ ދިރިއުޅުމުގައި މިހެން މީހަކު އޭޓީއެމް މެޝިނެއް ތެރޭގައި ތާށިވެފައިވާ މަންޒަރު ނުފެންނާނެ ކަމަށާއި މިއީ ވަރަށް އާދަޔާ ހިލާފު ކަމެއް ކަމަށެވެ.

މި މީހާ އޭޓީއެމް މެޝިން ތެރޭގައި ތާށިވާން ދިމާވި ސަބަބެއް ސާފެއް ނުވެއެވެ.