އިސްތިއުފާދެއްވި ޒިމްބާބުވޭގެ ކުރީގެ ރައީސް ރޮބަޓް މުގާބޭގެ ރިޓަޔާމެންޓް ޕެކޭޖުގެ ދަށުން އެމަނިކުފާނަށް އަމިއްލަ ގެކޮޅަކާއި 20 މުވައްޒަފުންނާއި ކާރު ފްލީޓެއްގެ އިތުރުން ހިލޭ ވައިގެ ދަތުރުފަތުރު ހަމަޖައްސައިދިނުމަށް އެ ގައުމުގެ އައު ސަރުކާރުން ނިންމަވައިފިއެވެ.
އެ ގައުމުގެ ގައުމީ ޓީވީއިން ރިޕޯޓުކޮށްފައިވާ ގޮތުގައި އެ ގައުމުގެ އައު ސަރުކާރުން ވަނީ މުގާބޭގެ ރިޓަޔާމެންޓް ޕެކޭޖުގެ ހުރިހާ ހަރަދެއް ކުރުމަށް ނިންމާފައެވެ. މި ޕެކޭޖުގެ އެއްވެސް ތަފްސީލެއް އާންމުކޮށްފައި ނުވާއިރު ޒިމްބާބުވޭގެ ގާނޫނުގައި ވާގޮތުން ކުރީގެ ރައީސުންނަށް ދެވޭ ޕެންޝަން އެ ގައުމުގެ ރައީސްކަމުގެ މަގާމުގައި ހުންނަ ބޭފުޅެއްގެ މުސާރައާއި އެއްވަރުވާން ޖެހެއެވެ. އެ ގައުމުގެ މީޑިއާތަކުން ރިޕޯޓުކޮށްފައިވާ ގޮތުގައި ރައީސްކަމުން އިސްތިއުފާ ދެއްވުމާއި ގުޅިގެން މުގާބޭއަށް 10 މިލިއަން އެމެރިކާ ޑޮލަރުގެ ބޯނަސްއެއް ދީފައިވެއެވެ.
މި ޕެކޭޖުގެ ދަށުން އެ ގައުމުގެ ވެރިރަށް ހަރާރޭގެ ސަރަހައްދަކުން ފުލީ ފާނިޝްޑް ގެކޮޅެއް ވެސް މުގާބޭއަށް ލިބިވަޑައިގަންނަވާއިރު އެ ގެކޮޅުގެ ހުރިހާ ބިލްތަކާއި ހަރަދުތަކެއް ވެސް ބަލަހައްޓާނީ ސަރުކާރުންނެވެ. އަދި މުގާބޭއަށާއި އެމަނިކުފާނުގެ އާއިލާގެ ހުރިހާ މެމްބަރުންނަށް ހެލްތު އިންޝުއަރެންސް ވެސް ލިބިގެންދާނެއެވެ.
ހަމައެހެންމެ މުގާބޭއާ އެމަނިކުފާނުގެ އަނބިކަބަލުން ގްރޭސް މުގާބޭއަށް ޑިޕްލޮމެޓިކް ޕާސްޕޯޓް ދިނުމަށް ހަމެޖެހިފައިވާއިރު އެ ދެކަނބަލުންނަށް ޒިމްބާބްވޭގެ އެތެރޭގެ އުދުހުންތަކުގައި ފަސްޓް ކްލާސް ޓިކެޓް ލިބިގެންދާނެއެވެ. އަދި އަހަރެއްގެ މައްޗަށް ހަތަރު ފަހަރު ގައުމުން ބޭރަށް ވަޑައިގަތުމަށް ފަސްޓް ކްލާސް ޓިކެޓް ވެސް ދިނުމަށް ވަނީ ނިންމާފައެވެ.
މި ޕެކޭޖުގެ ދަށުން މުގާބޭއަށް ތިން ކާރު ލިބިވަޑައިގަންނަވާނެއެވެ. އޭގެ ތެރޭގައި މާސިޑީސް ބެންޒްގެ "އެސް 500 ސެޑާން" އެއް ހިމެނެއެވެ. އަދި ޕިކްއަޕް ވޭނަކާއި އިތުރު އުޅަނދެއް ވެސް ލިބިވަޑައިގަންނަވާއިރު މި ހުރިހާ އުޅަނދެއްގެ ތެލުގެ ހަރަދު ވެސް ބަލަހައްޓާނީ ސަރުކާރުންނެވެ. މި އުޅަނދުތައް ކޮންމެ ފަސް އަހަރަކުން އާކުރުމަށް ވަނީ ނިންމާފައެވެ. ހަމައެހެންމެ މުގާބޭގެ ހިދުމަތުގައި ސަރުކާރުން ހަރަދުކުރާ 20 މުވައްޒަފުން ތިބޭއިރު އޭގެ ތެރޭގައި ހަ ހަށިފާރަވެރިން ހިމެނެއެވެ.
މުގާބޭގެ 37 އަހަރުގެ ވެރިކަމަށް ނިމުމެއް އައިސް މިހާރު އެ ގައުމުގެ ރައީސްކަން ކުރައްވަމުން ގެންދަވަނީ އޭނާގެ ނާއިބު ރައީސްގެ މަގާމު އަދާކުރެއްވި އުމުރުފުޅުން 75 އަހަރުގެ އެމަސަން ނަންގަގްވާއެވެ.
