ކެޓަލޯނިއާގެ މިނިވަންކަން އިއުލާންކުރެއްވުމަށް ކުރެއްވި މަސައްކަތް ނާކާމިޔާބުވުމާއި ގުޅިގެން ބެލްޖިއަމްއަށް ވަޑައިގެންނެވި ކެޓަލޯނިއާގެ ސަރަހައްދީ ސަރުކާރުގެ ރައީސް ކާލްސް ޕުއިޖެމޮންޓް އަމިއްލަ އަށް ބެލްޖިއަމްގެ ޕޮލިހަށް ހާޒިރުވެއްޖެ އެވެ. 

އެ މަނިކުފާނުގެ އަރިހުގައި ބެލްޖިއަމްއަށް ވަޑައިގެންނެވި ކެޓަލޯނިއާގެ ކުރީގެ ހަތަރު ވަޒީރަކާއިއެކު ޕުއިޖެމޮންޓް ޕޮލިހަށް ހާޒިރުވެވަޑައިގަތީ އެ ބޭފުޅުން ހައްޔަރުކުރުމަށް ސްޕެއިންގެ މައި ސަރުކާރުން ޔޫރަޕިއަން އެރެސްޓް ވޮރެންޓެއް ނެރުމާ ގުޅިގެންނެވެ. ޕުއިޖެމޮންޓް ސްޕެއިން ދޫކުރައްވައި ބެލްޖިއަމްއަށް ވަޑައިގަތީ ކެޓަލޯނިއާގެ ސަރަހައްދީ ސަރުކާރު އުވާލައި، މެޑްރިޑްގައި ޤާއިމްވެފައިވާ މައި ސަރުކާރުން ކެޓަލޯނިއާގެ މައްޗަށް ސީދާ ބާރު ހިންގަން ފެށުމާ ގުޅިގެންނެވެ.  އިންސާފުވެރި ޝަރީޢަތެއް ލިބޭނެކަން ކަށަވަރު ނުވަނީސް އަނބުރާ ސްޕެއިންއަށް ވަޑައިނުގަންނަވާނެކަމަށް ޕުއިޖެމޮންޓް ވިދާޅުވިއެވެ.

ޕުއިޖެމޮންޓް މި އަމުރާމެދު ގޮތެއް ނިންމުމަށް ބެލްޖިއަމްގެ ފަނޑިޔާރަށް 24 ގަޑިއިރުގެ މުހުލަތެއް ލިބެއެވެ. އަދި މި 24 ގަޑިއިރުގެ ތެރޭގައި ކެޓަލޯނިއާގެ ކުރީގެ ވެރިން ހައްޔަރުކުރާނީތޯ ނުވަތަ ޝަރުތުތަކަކާއިއެކު ދޫކޮށްލާނީތޯ ބެލްޖިއަމްއިން ނިންމާނެއެވެ. ހައްޔަރުކުރަން ނިންމައިފިނަމަ، ހައްޔަރުކޮށް، ސްޕެއިންގެ ކަމާބެހޭ ފަރާތްތަކާއި ޕުއިޖެމޮންޓާ އޭނަގެ ވަޒީރުން ހަވާލުކުރުމަށް ބެލްޖިއަމްއަށް 2 މަސްދުވަހުގެ މުހުލަތެއް ޔޫރަޕްގެ ޤާނޫނުން ލިބިދެއެވެ. އެހެން ނަމަވެސް ހައްޔަރުކުރެވޭ  މީހުންގެ ފަރާތުން ގާނޫނީ ނުކުތާތަކެއް ނުނަގާނަމަ މިއަށްވުރެ އަވަހަށްވެސް އެކަންވާނެއެވެ.

ޔޫރަޕިއަން އެރެސްޓް ވޮރަންޓެއް ނެރުނުނަމަވެސް، ޕުއިޖެމޮންޓްގެ އިންސާނީ ހައްޤުތަކަށް ސްޕެއިންއިން ހުރުމަތްތެރިކޮށް ނުހިތަފާނެކަމަށް ބެލްޖިއަމްއަށް ފެނިއްޖެ ޙާލަތެއްގައި ޕުއިޖެމޮންޓް ސްޕެއިންއާއި ހަވާލުނުކޮށް ދޫކޮށްލުމުގެ ބާރު ބެލްޖިއަމްއަށް އޮންނާނެއެވެ.

ޕުއިޖެމޮންޓްގެ މައްޗަށް ސްޕެއިން އިން ތުހުމަތުކުރަނީ ވެރިކަމާއި ދެކޮޅަށް ހަރަކާތްތެރިވުމުގެ ދައުވާތަކެކެވެ.

ސްޕެއިންގެ ބައެއްގެ ގޮތުގައި އޮތް ކެޓަލޯނިއާއިން މިނިވަންކަން އިއުލާންކުރީ އެޤައުމުގައި މިދިޔަ އޮކްޓޯބަރު މަހުގެ ފުރަތަމަ ދުވަހު ނެގި ރެފަރެންޑަމްގައި މިނިވަންކަން އިއުލާންކުރަން ފެންނަކަމަށް ކެޓަލޯނިއާގެ ގިނަ ބަޔަކު ބުނުމާއި ގުޅިގެންނެވެ.