ސެއިންޓް ޕީޓަސްބާގްގެ ސުޕަމާކެޓުގައި ދިން ހަމަލާއަކީ ޓެރަރިސްޓް ހަމަލާއެއް: ޕޫޓިން
ސުޕަމާކެޓުގައި ދިން ހަމަލާގައި 13 މީހުން ޒަޚަމްވެފައިވޭ
ހަމަލާއަށް ފަހު ސުޕަމާކެޓުގައި އޮފިޝަލަކު ހަރަކާތްތެރި ވަނީ
ރަޝިއާގެ ސިޓީއެއް ކަމަށްވާ ސެއިންޓް ޕީޓަސްބާގްގެ ސުޕަމާކެޓެއްގައި ބުދަ ދުވަހުގެ ރޭ ދިން ބޮމުގެ ހަމަލާއަކީ ޓެރަރިސްޓް ހަމަލާއެއް ކަމަށް ރަޝިއާގެ ރައީސް ވްލަޑީމިއާ ޕޫޓިން ވިދާޅުވެއްޖެއެވެ.
ބުރާސްފަތި ދުވަހު ޕޫޓިން އިތުރަށް ވިދާޅުވީ ބޮން ގޮއްވި މީހުން ހައްޔަރު ކުރުމަށް ރަޝިއާގެ ފެޑެރަލް ސެކިޔުރިޓީ ސާވިސްގެ ޑައިރެކްޓަރަށް އަންގަވާފައިވާ ކަމަށެވެ.
ސެއިންޓް ޕީޓަސްބާގްގެ ސުޕަމާކެޓުގައި ދިން ހަމަލާގައި 13 މީހުން ޒަޚަމްވެފައިވެއެވެ. ގޮވާތަކެތި ބޭނުންކޮށްގެން އުފައްދާފައިވާ ހޯމްމޭޑް ބޮން ގޮއްވާލާފައި ވަނީ ސުޕަމާކެޓަކަށް އަންނަ ކަސްޓަމަރުންގެ ދަބަސްތައް ބަހައްޓަން ހުންނަ ސްޓޯރޭޖް ސަރަހައްދުގައެވެ.
ސެއިންޓް ޕީޓަސްބާގްގެ ސުޕަމާކެޓުގައި ހިންގި ބޮންގޮއްވުމުގެ ހާދިސާގެ ޒިންމާ އަދި އެއްވެސް ފަރާތަކުން އުފުލާފައެއް ނުވެއެވެ.
މިދިޔަ އޭޕްރީލްގައި ސެއިންޓް ޕީޓަސްބާގްގެ ސަބްވޭއެއްގައި ދިން ހަށިގޮއްވުމުގެ ހަމަލާއެއްގައި 16 މީހުން މަރުވެ 50 އަށް ވުރެ ގިނަ މީހުން ޒަޚަމްވެފައިވެއެވެ.
