ކޭންގެ އަމާޒަކީ ރޮނާލްޑޯއާއި މެސީ ފަހަތަށް ޖައްސާލުން

އިނގިރޭސިވިލާތުގެ ޓޮޓެންހަމްއަށް ކުޅެމުން އަންނަ ހުނަރުވެރި ފޯވާޑް ހެރީ ކޭންގެ އަމާޒަކީ ކްރިސްޓިއާނޯ ރޮނާލްޑޯ އަދި ލިއޮނެލް މެސީ ފަހަތަށް ޖައްސާލުން ކަމަށް އޭނާ ބުނެފިއެވެ.

މިހިނގަމުންދާ 2017 ވަނަ އަހަރަކީ ކޭންއަށް ވަރަށް ކާމިޔާބު އަހަރެކެވެ. އުމުރުން 24 އަހަރުގެ ފޯވާޑް ވަނީ ސައުތްހެމްޕްޓަން ކޮޅަށް ހެދި ހެޓްރިކާއެކު 36 ލަނޑު ހަމަކޮށް އަހަރެއްގެ ތެރޭގައި ޕްރިމިއާ ލީގުގައި އެންމެ ގިނަ ލަނޑު ޖެހި ކުޅުންތެރިޔާގެ މަގާމު ހޯދާފައެވެ.

ހަމައެހެންމެ މިއަހަރުގެ ތެރޭގައި ކުޅުނު 52 މެޗުގައި އޭނާ 56 ލަނޑު ޖަހާފައިވާއިރު މި އަދަދަށް އެހެން އެއްވެސް ކުޅުންތެރިޔަކަށް ލަނޑު ޖެހިފައެއް ނުވެއެވެ. މި ހެޓްރިކާއެކު އޭނާ ވެގެން ގޮސްފައިވަނީ ޔޫރަޕުގެ ގަދަ ފަސް ލީގުގައި ކުޅެމުން އަންނަ ފޯވާޑުންގެ ތެރެއިން އެންމެ ގިނަ ލަނޑު ޖެހި ކުޅުންތެރިޔާއަށެވެ. މިއީ ވޭތުވެދިޔަ ހަތް އަހަރުތެރޭ ރޮނާލްޑޯއާއި މެސީ ފިޔަވައި އެހެން ކުޅުންތެރިޔަކު މި މަގާމު ހޯދި ފުރަތަމަ ފަހަރެވެ.

މީގެކުރިން މީޑިއާތަކުން ކޭން ސިފަ ކޮށްފައިވަނީ "ވަން ސީޒަން ވޮންޑާ" އެއްގެ ގޮތުގައެވެ. މިކަމާއި ގުޅޭ ގޮތުން ވާހަކަ ދައްކަމުން ކޭން ބުނެފައިވަނީ އަދިވެސް ކުރަންޖެހޭ މަސައްކަތްތައް ވަރަށް ގިނަ ކަމަށާއި އޭނާ މަސައްކަތްކުރަމުން އަންނަނީ ކޮންމެ ސީޒަނެއްގައި ވެސް ދައްކާ ކުޅުން އިތުރަށް ރަނގަޅު ކުރަން ކަމަށެވެ. އޭނާ ބުނީ އަމާޒަކީ ރޮނާލްޑޯއާއި މެސީ ފަހަތަށް ޖައްސާލުން ކަމަށާއި ދުނިޔޭގެ އެންމެ މޮޅު ކުޅުންތެރިޔާގެ ގޮތުގައި ލޭބަލްވުމަކީ ދެކޭ ހުވަފެނެއް ކަމަށެވެ.

މިއަހަރުގެ އެންމެ ގިނަ ލަނޑުޖެހި ކުޅުންތެރިޔާގެ މަގާމު ލިބުމަކީ އެކަމުގެ ފެށުން ކަމަށާއި ކުރިޔަށް ހުރި އަހަރުތަކުގައި ވެސް އެންމެ ގިނަ ލަނޑު ޖެހި ކުޅުންތެރިޔާގެ މަގާމު ހޯދުމަކީ އުއްމީދެއް ކަމަށް ކޭން ބުނެފައިވެއެވެ. ރޮނާލްޑޯއާއި މެސީ އެއް ފެންވަރެއްގައި ކުޅެމުން އަންނަތާ ނުވަ އަހަރަށްވުރެ ގިނަ ދުވަސް ވެފައިވާ ކަމަށާއި އެ ކުޅުންތެރިން ފަހަތަށް ޖައްސާލަން ބޭނުންވާނަމަ އޭނާގެ ކުޅުމުގެ ފެންވަރުވެސް އެއް ފެންވަރެއްގައި ބަހައްޓަން ޖެހޭ ކަމަށް ކޭން ބުނެފައިވެއެވެ.

ދެ ރެކޯޑު ގާއިމު ކުރެވުނު ކަމަށް އިޝާރާތްކޮށް ކޭން ބުނެފައިވަނީ އެކަމުން އަންގައިދެނީ ކްލަބް ފެންވަރުގައާއި ގައުމީ ޓީމުގެ ފެންވަރުގައި މޮޅު ކުޅުމެއް އޭނާއަށް ދެއްކެމުންދާކަން ކަމަށެވެ. ހާއްސަކޮށް ޔުއެފާ ޗެމްޕިއަންސް ލީގާއި ގައުމީ ޓީމުގެ މެޗުތަކަށް އަހަންމިއްޔަތުކަންދޭ ކަމަށް ކޭން ބުނެފައިވެއެވެ.

މި ރޭޓުގައި ކޭން ލަނޑު ޖަހަމުންދާނަމަ އޭނާއަށް ޖެހިޖެހިގެން ތިންވަނަ ފަހަރަށް ޕްރިމިއާ ލީގުގެ ރަން ބޫޓު ލިބުމުގެ ފުރުސަތު އެބައޮތެވެ. މީގެކުރިން ޖެހިޖެހިގެން ތިން ފަހަރު ޕްރިމިއާ ލީގުގެ ރަން ބޫޓު ހޯދާފައިވާ ކުޅުންތެރިންގެ ތެރޭގައި އެލަން ޝިއަރާއާއި ތިއަރީ އޮންރީ ހިމެނެއެވެ.

ކޭންވަނީ އަންނަ އަހަރުގެ އަމާޒަކީ ދުނިޔޭގެ އެންމެ މޮޅު ކުޅުންތެރިޔާއަށްދޭ ބެލެންޑޯ އެވޯޑު ހޯދުން ކަމަށްވެސް ބުނެފައެވެ. އޭނާއަށް މިއަހަރުގެ އެވޯޑުގައި ލިބިފައިވަނީ 10 ވަނަ އެވެ.

ކޭން އަންނަނީ މި ސީޒަނުގައި ޓޮޓެންހަމްގައި ތަފާތު މޮޅު ކުޅުމެއް ދައްކަމުންނެވެ. މިދިޔަ އަހަރުގެ ޑިސެމްބަރު މަހު 2020 ވަނަ އަހަރުގެ ނިޔަލަށް ޓޮޓެންހަމްގައި މަޑުކުރަން ނިންމާ އައު އެއްބަސްވުމުގައި ސޮއިކޮށްފައިވާ ކޭން ވަނީ އެޓީމަށް ކުޅުނު 171 މެޗުގައި 111 ލަނޑު ކާމިޔާބުކޮށްދީފައެވެ. މި ސީޒަނުގެ މިހާތަނަށް އޭނާ ވަނީ ކުޅުނު 26 މެޗުގައި 26 ލަނޑު ޖަހައިދީފައެވެ.