އިންޑިއާއަށް ބަހުގެ ހަމަލާ ދޭން ސަރުކާރުގެ މީޑިއާ އާއި ސަރުކާރުގެ ނުފޫޒު ހިނގާ މީޑިއާތައް ބޭނުންކުރަން ޗައިނާއިން ގެންގުޅޭ އުކުޅު ދިވެހިރާއްޖެއިންވެސް މިހާރު ދަސްކޮށްފައިވާ ކަމަށް ދެކުނު އޭޝިއާގެ ސަރަހައްދީ ގުޅުންތައް ދިރާސާކުރައްވާ މުހައްލިލެއްކަމަށްވާ ރަޖީވް ޝަރްމާ ވިދާޅުވެއްޖެއެވެ.

ބްލޫމްބާގްއިން އިންޑިއާގައި ހިންގާ ދަ ކުއިންޓްގައި ލިޔުއްވާފައިވާ ލިޔުމެއްގައި ޝަރްމާ ވިދާޅުވީ އިންޑިއާއިން އެހީވަމުން އަންނަ އިރުވެސް، ރައީސް ޔާމީންގެ ސަރުކާރުން މަސައްކަތްކުރަމުން ދަނީ ޗައިނާއާއެކު އޮންނަ ގުޅުން ބަދަހިކުރުމަށް ކަމަށެވެ. ޗައިނާއާއި އިންޑިއާގުޅޭ ސަރަހައްދީ ރޮނގުގައި ދެ ޤައުމުގެ ސިފައިން ދާދި ފަހުން ހިންގި ކުރިމަތިލުންތަކުގެ ދުވަސްވަރު، ޗައިނާގެ މީޑިއާއިން އިންޑިއާއަށް ބަހުގެ ޙަމަލާތައް ދީ، އިންޑިއާގެ އަގު ވައްޓާލަން މަސައްކަތްކުރި ބީދައިން، ރާއްޖޭގައި ވެސް ސަރުކާރުގެ ނުފޫޒު ހިންގާ ނޫސްތަކުގައި އެފަދަ ލިޔުންތައް ލިޔަމުންދާ ކަމަށް އޭނާ ވިދާޅުވިއެވެ.

ޝަރްމާ ތުހުމަތުކުރެއްވި ގޮތުގައި އިންޑިއާއާ ދެކޮޅު ލިޔުންތައް ލިޔުނު ދިވެހި މީޑިއާތަކަކީ ރައީސް އަބްދުﷲ ޔާމީންގެ ފުރިހަމަ ކޮންޓްރޯލް އޮންނަ މީޑިއާތަކެކެވެ. އޭނާ ވަނީ އޭގެ މިސާލެއްގެ ގޮތުގައި ވަގުތު އޮންލައިންގެ ދެ އާޓިކަލްއަކާއި ރުމާލު 2 ކިޔާ ނޫހެއްގެ އާޓިކަލްއެއްގެ އިނގިރޭސި ތަރުޖަމާ މި ލިޔުއްވުމުގައި ހިމަނުއްވާފައެވެ.

މިހަފްތާގައި ރަޖީވް ޝަރްމާ ލިޔުއްވި އެހެން ލިޔުއްވުމެއްގައި ވިދާޅުވީ ރައީސް އަބްދުﷲ ޔާމީން އަބްދުލްޤައްޔޫމް އިންޑިއާއަށް ބަދު ބަސް ނުބުނުމަށް އެދިވަޑައިގަތް ނަމަވެސް، އަދި ރާއްޖެއިން ގެންގުޅެނީ އިންޑިއާއަށް އިސްކަން ދިނުމުގެ ސިޔާސަތު ކަމަށް ވިދާޅުވި ނަމަވެސް، އެއީ މާނައެއް ނެތް ހުސް ވާހަކަތަކެއް ކަމެއް ކަމަށެވެ.