ތުރުކީން ގަތަރަށް ސިފައިންގެ ފައުޖެއް ފޮނުވައިފި

ތުރުކީން ގަތަރަށް އިތުރު ސިފައިންތަކެއް ފޮނުވައިފިއެވެ.

ގަތަރުގައި ހުންނަ ތުރުކީގެ އަސްކަރީ ބޭހަށް ތުރުކީން ސިފައިންގެ އާ ފައުޖެއް ފޮނުވީ ގަތަރާއި ތުރުކީއާ ދެމެދުގައި ވެފައިވާ އަސްކަރީ އެއްބަސްވުމެއްގެ ދަށުންނެވެ.

ތުރުކީން ގަތަރަށް ސިފައިން ފޮނުވާފައިވާ ކަން ކަށަވަރު ކޮށްދީ ގަތަރުގެ ޑިފެންސް މިނިސްޓްރީން ބުނީ ގަތަރުގެ ވެރިރަށް ދޯހާގައި ހުންނަ އަލް އުބެއިދް ވައިގެ ބޭހަށް ތުރުކީން އަންގާރަ ދުވަހު ސިފައިންގެ ފައުޖެއް ފޮނުވާފައިވާ ކަމަށެވެ.

ގަތަރަށް އައި ތުރުކީ ސިފައިން ގަތަރުގެ ސިފައިންނާ ގުޅިގެން އަސްކަރީ ތަމްރީންތައް ބާއްވާނެ ކަމަށް ރިޕޯޓުތައް ބުނެއެވެ.

ތުރުކީން އެންމެ ފުރަތަމަ ގަތަރަށް ސިފައިން ފޮނުވާފައި ވަނީ 2015 ގައެވެ.

މިއަހަރުގެ ޖޫން 5 ގައި އަރަބި ބައެއް ގައުމުތައް ކަމަށްވާ ސައުދީ އަރަބިއްޔާ، ބަހްރައިން، ޔޫއޭއީ އަދި މިސްރުން ގަތަރާއެކު އޮންނަ ޑިޕްލޮމެޓިކް އަދި ވިޔަފާރީގެ ގުޅުން ކަނޑާލުމާ ގުޅިގެން ތުރުކީން ވަނީ ގަތަރާމެދު އޮންނަ ގުޅުން އިތުރަށް ވަރުގަދަ ކޮށްފައެވެ. ތުރުކީން ވަނީ މައްސަލަ ހައްލު ކުރުމަށް މެދުވެރިއެއްގެ ރޯލް ވެސް އަދާކުރަން މަސައްކަތް ކޮށްފައެވެ.

ތުރުކީ އާއި ގަތަރަކީ ޚާރިޖީ ގުޅުންތަކުގެ ދާއިރާގައި ވެސް ވަރަށް ގުޅުން ބަދަހި ދެގައުމެވެ. އެގޮތުން ފަލަސްތީން، ސިރިޔާ އަދި މިސްރާ ގުޅޭ އެކިކަންކަމުގައި ވެސް ގަތަރާއި ތުރުކީ އަކީ އެއްގޮތް ވިސްނުމެއް ގެންގުޅޭ ދެގައުމެވެ.