ސީރިޔާގެ ގޫތާގައި ތިބި ބަލި މީހުން ވެރިރަށް ދިމިޝްގަށް ބަދަލުކުރަން ފަށައިފި ކަމަށް ރެޑް ކްރޮސްއިން ބުނެފިއެވެ.

އެ ޖަމާއަތުން ކުރި ޓްވީޓެއްގައި ބުނީ އިރުމަތީ ގޫތާގައި ނާޒުކު ހާލަތުގައިތިބި ބަލި މީހުން ވެރިރަށަށް ބަދަލުކުރަންފަށާފައިވާކަމަށެވެ.

އިނގިރޭސި ވިލާތުގެ އެހީދޭ ޖަމާއަތަކުން މިދިޔަ ހަފްތާގައި ބުނީ ސަރުކާރުގެ ހިސާރުގެ ދަށުގައި އޮންނަތާ ހަތަރު އަހަރުވެފައިވާ ގޫތާގައި ތިބި ކެންސަރު ބަލީގެ ހަތް ކުއްޖަކު އެ ސިޓީ އިން އެހެން ސަރަހައްދަކަށް ގެންދިއުމަށް އެދިފައިވާ އެދުމާ މެދު ރައީސް ބަޝާރުލް އަސަދު ގޮތެއް ނިންމަވައިފި ކަމަށެވެ.

އެ ކުދިން ހިމެނެނީ ވަގުތުން ވަގުތަށް ފަރުވާ ލިބެން ޖެހިފައިވާ 130 ކުދިންގެ ތެރޭގައެވެ.

އދ. އިން ބުނެފައިވާ ގޮތުގައި 400،000 އެއްހާ މީހުންގެ އާބާދީއެއް އޮންނަ އިރުމަތީ ގޫތާގައި 12 އިންސައްތައެއްހާ ކުދިންނަކީ ކާޑުބަލި ތަހައްމަލު ކުރަމުންދާ ކުދިންނެވެ.

އިންޓަރނޭޝަނަލް ކޮމިޓީ އޮފް ދި ރެޑްކްރެސެންޓުން އަންގާރަ ދުވަހު ވަނީ ބަލި މީހުން ގެންދިއުމަށްޓަކައި ގެންގޮސްފައިވާ އެމްބިއުލާންސްތަކުގެ ފޮޓޯ އާއްމުކޮށްފައެވެ.

އެ ސަރަހައްދުން ގެންދެވޭ މީހުންގެ އަދަދުގެ ތަފްސީލް އެ ޖަމާއަތުން ދީފައެއް ނުވެއެވެ.

ސީރިޔަން އަރަބް ރެޑް ކްރެސެންޓުން ފަހުން ވަނީ ތުއްތުކުދިން އެކުދިންގެ މައިންނާ އެކު ތިބި ފޮޓޯއެއް އާއްމުކޮށް ބަލިމީހުން ދިމިޝްގަށް ގެންދަނީ ކަމަށް ބުނެފައެވެ.

ސީރިޔާގެ ވެރިރަށް ދިމިޝްގާ 15 ކިލޯމީޓަރު ދުރުގައި އޮންނަ އިރުމަތީ ގޫތާގެ ވަށައިގެން ސީރިޔާ ސިފައިންގެ ފައުޖުތައް ތިބޭތާ ހަތަރު އަހަރު ވަނީ ވެފައެވެ.

އެ ސަރަހައްދުގައި ދިރިއުޅެމުންދާ 400،000 އެއްހާ މީހުންނަށް 2013 ވަނަ އަހަރުން ފެށިގެން އިންސާނީ އެހީ އެއްކޮށް ކަހަލަ ގޮތަކަށް ވަނީ ކެނޑިފައި ކަމަށް ޔުނިސެފުން ބުނެއެވެ.