ސިޓީގެ ކުޅުންތެރިން ވަރުބަލި ނުވޭ: ގާޑިއޯލާ

މެންޗެސްޓާ ސިޓީގެ ކުޅުންތެރިން ވަރުބަލި ނުވާ ކަމަށް އެ ޓީމުގެ ކޯޗު ޕެޕް ގާޑިއޯލާ ބުނެފިއެވެ.

މި ސީޒަނުގައި ސިޓީގެ ފުރަތަމަ އެގާރައިން ގާޑިއޯލާ ފުރުސަތު ދެމުން އަންނަނީ ގާތްގަނޑަކަށް ހަމަ އެއް ކުޅުންތެރިންތަކަކަށެވެ. މި ކުޅުންތެރިން ގާޑިއޯލާއަށް ނަތީޖާ ހޯދައިދެމުންދާއިރު ސީޒަނުގެ ފަހު ބަޔަށް އަޅާއިރު އެ ކުޅުންތެރިން ވަރުބަލިވެ ނަތީޖާތައް ދަށަށް ދާނެ ކަމަށް އެހެން ޓީމުތަކުގެ ކޯޗުން އަންނަނީ ބުނަމުންނެވެ. ސިޓީއިން ޗެމްޕިއަންސް ލީގުގެ ދެވަނަ ބުރުގެ ޖާގައެއް ހޯދާފައިވާއިރު އެ ޓީމު މިވަގުތު އޮތީ ޕްރިމިއާ ލީގުގެ އެއްވަނައިގައި 13 ޕޮއިންޓްގެ ލީޑަކާއެކުއެވެ.

ސިޓީގެ ކުޅުންތެރިންގެ ފަރާތުން ވަރުބަލިކަމުގެ އަސަރުތައް ފެންނަމުންދާ ކަމަށް ބުނެ ބައެއް މީހުން ފަތުރަމުންދާ ވާހަކަތަކައް ރައްދު ދެމުން ގާޑިއޯލާ ބުނީ އޭނާގެ ޓީމުގެ އޮތީ ރަނގަޅު ސްކޮޑެއް ކަމަށާއި ކުޅުންތެރިންގެ ފަރާތުން ވަރުބަލި ކަމުގެ އަސަރު ނުފެންނަ ކަމަށެވެ. ކޮންމެ ހަތަރު ދުވަހަކުން މެޗެއް ކުޅެން ޖެހޭކަން ފާހަގަކުރަމުން ގާޑިއޯލާ ބުނީ އެފަދަ ދަނޑިވަޅުތަކުގައި ފުރަތަމަ އެގާރަ ބަދަލުކުރާނެ ކަމަށެވެ. ސީޒަނުގެ މިހާތަނަށް ގިނަ ކުޅުންތެރިންތަކަކަށް ފުރުސަތުދީފައިވާ ކަމަށާއި ސީޒަނުގެ ފަހު ބައިގައި ވެސް ކަން ހިގާނީ އެހެން ކަމަށް ގާޑިއޯލާ ހާމަކުރިއެވެ.

މިކަމާއި ގުޅޭގޮތުން އިތުރަށް ވާހަކަ ދައްކަމުން ގާޑިއޯލާ ބުނީ އޭނާގެ ކޯޗުކަމުގެ ދަށުގައި މިހާރު އޮތް ސިޓީގެ ސްކޮޑަކީ އޭނާ ބާސެލޯނާ އަދި ބަޔާން މިއުނިކްއަށް އިރުޝާދުދިން އިރު އޭނާގެ ދަށުގައި ތިބި ސްކޮޑުތަކާއި އެއް ފެންވަރެއްގެ ސްކޮޑެއް ކަމަށެވެ. އޭނާ ބުނީ ކުރިޔަށް ޖެހި އެޓޭކް ކުރުމުގައި އެއްވެސް ޓީމަކަށް ސިޓީ ޖަހާލުމަށް ފަހު ނުދެވޭނެ ކަމަށާއި ބޯޅަ ގެއްލުމުން ބޯޅަ ހޯދުމަށް ވެސް އެންމެ މަސައްކަތް ކުރަނީ ސިޓީގެ ކުޅުންތެރިން ކަމަށެވެ.

ގާޑިއޯލާ މިހެން ބުނެފައިވާއިރު މިހިނގަމުންދާ 2017 ވަނަ އަހަރު އެ ޓީމުން ވަނީ 100 ލަނޑު ޖަހާފައެވެ. މިއީ 1982 ވަނަ އަހަރުގެ ލިވަޕޫލް ޓީމުން މި އަދަދަށް ލަނޑު ޖެހިފަހުން ޕްރިމިއާ ލީގުގެ ޓީމަކުން މި އަދަދަށް ލަނޑު ޖެހި ފުރަތަމަ ފަހަރެވެ. ހަމައެހެންމެ ގާޑިއޯލާގެ އިރުޝާދުގެ ދަށުން މި ސީޒަނުގެ ޕްރިމިއާ ލީގުގައި ސިޓީ ކުޅުނު އެއްވެސް މެޗަކުން ބަލިވެފައިނުވާއިރު އެ ޓީމުން ވަނީ ޖެހިޖެހިގެން 17 މެޗު ކާމިޔާބު ކޮށްފައެވެ. މިއީ ވެސް ޕްރިމިއާ ލީގުގެ ރެކޯޑެކެވެ.

ސިޓީގައި އެންމެ މޮޅު ކުޅުމެއް ދައްކަމުން އަންނަ އާޖެންޓީނާގެ ފޯވާޑް ސާޖިއޯ އަގުއޭރޯ އެ ޓީމު ދޫކޮށްލަން އުޅޭ ކަމަށް ދެކެވޭ ވާހަކަތަކަށް ރައްދު ދެމުން ގާޑިއޯލާ ބުނީ އޭނާއަކީ ސިޓީގެ ތާރީހުގައި ވެސް ކުޅުނު އެންމެ މޮޅު ކުޅުންތެރިންގެ ތެރޭގައި ހިމެނޭ ކުޅުންތެރިޔެއް ކަމަށާއި ޓީމު ދޫކޮށްލަން ޖެހޭނަމަ އެކަމެއް ނިންމާނީ އަގުއޭރޯ ކަމަށެވެ. އަދި އަގުއޭރޯ ނިންމާ ކޮންމެ ނިންމުމަކަށް ކޯޗެއްގެ ހައިސިއްޔަތުން އިހުތިރާމު ކުރާނެ ކަމަށް ގާޑިއޯލާ ހާމަކޮށްފައިވެއެވެ.

ގާޑިއޯލާގެ ފުރަތަމަ ސީޒަނުގައި އޭނާއަށް އަމާޒުވި ފާޑުކިޔުންތަކަށް އޭނާ އަންނަނީ މި ސީޒަނުގައި ނެރެމުންދާ ނަތީޖާތައް މެދުވެރިކޮށް ރައްދު ދެމުންނެވެ.