އަންނަ ޖެނުއަރީ މަހު ހުޅުވޭ ފިނި މޫސުމުގެ ޓްރާންސްފާ މާކެޓުގައި ޗެލްސީއަށް ކުޅުންތެރިން ގެނައުމުގައި އެ ޓީމުގެ ކޯޗު އެންޓޯނިއޯ ކޮންޓޭގެ ލަފާ ހޯދުމަށް އެ ކްލަބުގެ މެނޭޖްމަންޓުން ނިންމައިފިއެވެ.
މި ސީޒަނާއި ޗެލްސީއިން ކުރިމަތިލީ ޕްރިމިއާ ލީގުގެ ޗެމްޕިއަނުންގެ ގޮތުގައި ނަމަވެސް އެ ޓީމަށް މި ސީޒަނުގައި އަދި މާ އެދެވޭ ކުޅުމެއް ދެއްކިފައެއް ނުވެއެވެ. އެންމެ ފަހުން ކުޅުނު މެޗުގައި ވެސް ރަށުން ބޭރުގައި 0-0 ގެ ނަތީޖާއަކުން އެވަޓަންއާ ދެކޮޅަށް އެއްވަރުވީއެވެ. ޗެލްސީގެ ޓީމު އިތުރަށް ވަރުގަދަކޮށް އެ ޓީމުން ހޯދަމުން އަންނަ ނަތީޖާތައް ރަނގަޅު ކުރުމުގެ ގޮތުން މި ހުޅުވޭ ފިނި މޫސުމުގެ ޓްރާންސްފާގައި އެ ޓީމަށް އާ ކުޅުންތެރިން ގެނައުމަށް އެ ޓީމުގެ ވެރިޔާ ރޯމަން އަބްރަހޮމޮވިޗް ނިންމާފައިވާ ކަމަށް ރިޕޯޓުތައް ބުނެއެވެ.
މިކަމާއި ގުޅޭގޮތުން ވާހަކަ ދައްކަމުން ކޮންޓޭ ބުނީ ކްލަބާއިއެކު ކުރެވުނު މަޝްވަރާތަކުގައި އޭނާގެ ހިޔާލު ކްލަބުގެ މެނޭޖްމަންޓަށް ހުށަހަޅާފައިވާ ކަމަށާއި އެގޮތުން ޓްރާންސްފާގައި ކުޅުންތެރިން ގަތުމުގައި އޭނާގެ އިރުޝާދާއި ލަފާ ހޯދުމަށް ކްލަބުގެ ކިބައިން އެދިފައިވާ ކަމަށެވެ. އަދި ކްލަބުން އެކަމަށް އިޖާބަ ދޭނެ ކަމަށް ބުނެފައިވާ ކަމަށާއި އެހެން ނަމަވެސް އަބަދު ވެސް އެންމެ ފަހުގެ ނިންމުން ނިންމާނީ ކްލަބުން ކަމަށް ކޮންޓޭ ބުނެފައިވެއެވެ.
އޭނާ ބުނީ ކުޅުންތެރިން މިހާތަނަށް ދައްކާފައިވާ ކުޅުމާއިމެދު ވަރަށް ހިތްހަމަޖެހޭ ކަމަށާއި ހުރިހާ މުބާރާތްތަކުގައި ވާދަކުރެވޭ ފެންވަރު ސްކޮޑުގައި ހުރިކަން އެނގިގެންދާނީ ސީޒަނުގެ ފަހު ބައިގައި ކަމަށެވެ. ޗެމްޕިއަންސް ލީގުގެ ދެވަނަ ބުރުން ޖާގަ ހޯދާފައިވުމާއި ލީގު ކަޕްގެ ސެމީއިން ޖާގަ ހޯދުމުގެ އިތުރަށް ޕްރިމިއާ ލީގުގެ ތިންވަނަ މަގާމުގައި އޮތްކަން ފާހަގަ ކުރަމުން ކޮންޓޭ ބުނީ މިހުރިހާ ކަމަކުން ވެސް އަންގައިދެނީ އޭނާގެ ކުޅުންތެރިން ހިތްވަރު ކުރަމުންދާކަން ކަމަށެވެ.
ފިނި މޫސުމުގެ ޓްރާންސްފާގައި ގެނައުމަށް ޗެލްސީއިން އަންނަނީ ގިނަ ކުޅުންތެރިންތަކަކަށް ފާރަލަމުންނެވެ. އެގޮތުން ޔުވެންޓަސްއަށް ކުޅެމުން އަންނަ ބްރެޒިލްގެ ޑިފެންޑަރު އެލެކްސް ސަންޑްރޯއާއި މޮނާކޯއަށް ކުޅެމުން އަންނަ ފްރާންސްގެ މިޑްފީލްޑަރު ތޯމަސް ލެމާރ އަދި ސައުތްހެމްޕްޓަންއަށް ކުޅެމުން އަންނަ ނެދަލޭންޑްސްގެ ޑިފެންޑަރު ވާޖިލް ވެންޑައިކް ހޯދުމަށް ޗެލްސީއިން އަންނަނީ މަސައްކަތް ކުރަމުންނެވެ. އެހެން ނަމަވެސް މި ކުޅުންތެރިންނަށް ޗެލްސީއިން ބިޑުކުރަން އުޅޭކަމެއް ކޮންޓޭ ކަށަވަރު ކޮށްދީފައެއް ނުވެއެވެ.
ޗެލްސީއިން އާ ކުޅުންތެރިން ހޯދުމުގެ މަސައްކަތް ފަށާނީ އެ ކްލަބުގެ ޓެކްނިކަލް ޑައިރެކްޓަރެއްގެ ގޮތުގައި މަސައްކަތް ކުރި މައިކަލް އެމެނާލޯއާ ނުލައެވެ. އޭނާވަނީ އެ މަގާމު ދޫކޮށް ފްރާންސްގެ މޮނާކޯގެ ޓެކްނިކަލް ޑިރެކްޓަރުގެ މަގާމާއި ހަވާލުވެފައެވެ.
މި ސީޒަނުގައި ޗެލްސީއަށް ދިމާވެފައިވާ އެންމެ ބޮޑު މައްސަލައަކީ އެ ޓީމުގެ ސްކޮޑުގައި ކުޅުންތެރިން މަދުވުމުގެ މައްސަލައެވެ. މި މައްސަލައަށް ހައްލު ހޯދުމަށް ކޮންޓޭ މަސައްކަތް ފަށާފައިވާއިރު އޭނާގެ އިރުޝާދުގެ ދަށުން މި ސީޒަނުގައި އެ ޓީމު ކުޅުނު 29 މެޗުގެ ތެރެއިން މޮޅުވެފައިވަނީ 18 މެޗުންނެވެ. ފަސް މެޗުން އެއްވަރުވެފައިވާއިރު ބާކީ ހަ މެޗުން އެ ޓީމު ވަނީ ބަލިވެފައެވެ.
