އޭއެފްސީން އެފްއޭއެމް ޖޫރިމަނާކޮށް، އިންޒާރުދީފި!

އޭޝިއަން ފުޓްބޯލް ފެޑެރޭޝަން (އޭއެފްސީ) އިން ރާއްޖޭގެ ފުޓުބޯޅައިގެ މައި އިދާރާ އެފްއޭއެމް ޖޫރިމައިނާކޮށް، އިންޒާރުދީފިއެވެ.

އެފްއޭއެމް ޖޫރިމަނާ ކުރީ އޭޝިއަން ކަޕް ކޮލިފައިންގައި ރަށުން ބޭރުގައި ފަލަސްތީން އަތުން 1-8 ގެ ނަތީޖާއިން ރާއްޖެ ބަލިވި މެޗުގެ ހާފް ޓައިމަށް ފަހު ކުޅުންތެރިން ދަނޑަށް އެރި ވަގުތު ލަސްވުމުންނެވެ.

އޭއެފްސީން 1,500 ޑޮލަރުން އެފްއޭއެމް ޖޫރިމަނާ ކޮށްފައިވާއިރު، އެކަހަލަ ކަމެއް ތަކުރާރު ނުކުރުމަށް ވަނީ އިންޒާރު ވެސް ދީފައެވެ.

ރާއްޖެއެމްވީ އަށް މައުލޫމާތު ދެމުން އެފްއޭއެމްގެ ޖެނަރަލް ސެކެޓްރީ ހުސެއިން ޖަވާޒް (ޖަވާ) ވިދާޅުވީ، އެފްއޭއެމް 1,500 ޑޮލަރުން ޖޫރިމަނާކޮށްފައިވާ ކަމަށާއި، އެގޮތަށް އެކަން ހިނގާފައި ވަނީ ފަލަސްތީން މެޗުގެ ހާފްޓައިމަށް ފަހު ކޯޗު ކުޅުންތެރިން ދަނޑަށް އެރުވި ވަގުތު ލަސްވުމުން ކަމަށެވެ.

އޭއެފްސީން އެފްއޭއެމްއާ މެދު ފިޔަވަޅު އަޅާފައިވާއިރު، އޭއެފްސީގެ ގަވައިދުތަކާ ހިލާފުގެން ރާއްޖޭގެ ބައެއް ކުޅުންތެރިން ވެސް މި އަހަރު ތެރޭގައި ވަނީ ޖޫރިމަނާކޮށްފައި ކަމަށް މައުލޫމާތު ލިބެއެވެ.