ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް އިތުބާރުކުރައްވަނީ ހަމައެކަނި އެމަނިކުފާނުގެ އަނބިކަނބަލުން ފާތުމަތު އިބްރާހިމް ދީދީއަށް ކަމަށާއި، އެމަނިކުފާނުގެ އަރިހުގައި ދެން ތިއްބެވި ފަރާތްތަކަކީ އެފަރާތްތަކުގެ މައްޗަށް ރައީސްގެ އިތުބާރު ނެތް އިރުވެސް މަތިންބައިން ޖެހިގެން އުޅުއްވާ ފަރާތްތަކެއް ކަމަށް، ރައްޔިތުންގެ މަޖިލީހުގެ ދިއްދޫ ދާއިރާގެ މެންބަރު ޢަބްދުލްލަޠީފް މުޙައްމަދު ވިދާޅުވެއްޖެއެވެ.

ރާއްޖެޓީވީގެ ފަލަސުރުޚީ ޕްރޮގްރާމްގައި ލަޠީފް ވިދާޅުވީ، އިންތިޚާބަކަށް ކުރިމަތިލައްވައިފިނަމަ ރައީސް ޔާމީނަށް ކެމްޕެއިން ކޮށްދެއްވަން ތިއްބެވީ ރައްޔިތުންގެ މަޖިލީހުގެ މަދު މެންބަރުންތަކެއް ކަމަށާއި، އެ ބޭފުޅުންގެ ހަޤީޤަތް ރައީސް ޔާމީނަށް އެނގިލައްވާ ކަމަށެވެ. އެފަދަ މެންބަރުންނަކީ އަމިއްލައަށް ފައިދާއެއް ހޯދުމަށް އެމަނިކުފާނުގެ އަރިހުގައި ތިއްބެވި މެންބަރުން ކަމަށް ވެސް ލަޠީފް ވިދާޅުވިއެވެ.

ރައީސް ޔާމީންގެ އެންމެ އަރިހުގައި ތިއްބެވި، ޕާލިމެންޓްރީ ގްރޫޕުގެ ލީޑަރު އަޙުމަދު ނިހާން ޙުސައިން މަނިކާއި ޕާޓީގެ ނައިބުރައީސް ޢަބްދުއްރަޙީމް ޢަބްދުﷲމެން ފަދަ ބޭފުޅުން، ރައީސް ޔާމީން ފަސްދެއްވުމުން، އެމަނިކުފާނަށް ފާޑުވިދާޅުވާ ކަމަށާއި، އެހެންކަމުން ރައީސް ޔާމީން އިތުބާރު ކުރައްވަނީ ހަމައެކަނި އަނބިކަނބަލުންނަށް ކަމަށާއި، ޕާޓީގެ ތެރޭގައި އެކަމަނާގެ ނުފޫޒު ގަދަވެފައިވަނީވެސް އެ ސަބަބަށްޓަކައި ކަމަށް ލަތީފް ވިދާޅުވި އެވެ. 

"ނިހާން، އަޅުގަނޑުމެންގެ ޕާލިމެންޓްރީ ގްރޫޕްގެ ލީޑަރު، ނިހާންގެ ޖޯޝާ ފޯރިއެއް ނެތް. ދެން ހަމަ އަޅުގަނޑަށް އެއާއެކުގައި ފާހަގަކޮށްލެވޭނީ، އަބްދުއްރަހީމް. އަބްދުއްރަހީމްގެވެސް ޖޯޝާ ފޯރިއެއް ނުފެނޭ. އެބޭފުޅުން އެތިބީ ލީޑަރޝިޕްގަ އެންމެ ބޮޑުކޮށް ނަގައިކިޔަންވެސް. އަދި އެބޭފުޅުންނަކަށް އިތުބާރެއްވެސް ރައީސް ނުކުރައްވާ. އެހެންވީމަ އެކަންކަން ރައީސްއަށް އެނގޭ މި ކޮން ބޭފުޅުންނެއްކަން، އަދި މި ބޭފުޅުންނަކީ ތިމަން މަނިކުފާނަށް މަސައްކަތް، ހިތްވަރެއް، ފަންވަރެއް ކެރުމެއް (ނެތް ބައެއްކަން). ފިލާ ތިބޭ ބައެއް އެއީ. އެހެންވީމަ ރައީސްކައިރީގައި ސަނާކިޔާލަން އެވަގުތު ލިބިދާނެ މަންފާއަކަށް ނޫނީ ފައިދާއަކަށް، ލިބިދާނެ އެއްޗަކަށް ރައީސް ހެއްވާލަން، އުފާކޮށްލަން އެ ތިބެނީ. ހަމަ ރައީސް ފަސްދީ ދިޔައިމަ ލޮލުން އިޝާރާތްކޮށްފަ ބުނާނެ ނޫނެކޭ މީ ކަމުދާ ރައީސެއް ނޫނޭ. އެހާ ހިސާބުގަ އެމީހުން ތިބެނީ. އެހެންވީމަ ރައީސް އިތުބާރެއް ނުކުރައްވާނެ"، ލަޠީފް ވިދާޅުވިއެވެ.

ޕްރޮގްރާމްގައި އިތުރަށް ވާހަކަ ދައްކަވަމުން ލަޠީފް ވަނީ ޕީޕީއެމްގެ އެތެރޭގައި ރައީސް ޔާމީންގެ އަނބިކަނބަލުން ފާތުމަތު އިބްރާހިމް ދީދީގެ ނުފޫޒު ގަދަވުމުން ބައިބައިވުން އުފެދިފައިވާކަން ފާހަގަކުރައްވާ ވާހަކަފުޅު ދައްކަވާފައެވެ.

"މެޑަމްގެ އޮފީހުން ކުރާ، ފާތުމަތު އިބްރާހިމް ދީދީގެ އޮފީހުން ކޮންމެ އިވެންޓެއްވެސް ބާއްވަންވަނީ. ސަރުކާރުގެ މުދަލާ ފައިސާއާ ތަކެތި ބޭނުންކޮށްގެން ނުވަތަ ސަރުކާރުގެ މީހުން ބޭނުންކޮށްގެން، މެޑަމް ކުރާކަމެއް އެ ކުރަނީ. އެތަނުގަ އަބްދުއްރަހީމަށް ނުވަތަ ނިހާނަށް ނުވަތަ ދެންހުރި ބޭފުޅަކަށް ފުރުޞަތު ދީގެންނެއް (ނޫޅޭ). ދެން އަނެއްކާ، އެބޭފުޅުންތެރޭގަވެސް ވަރަށް ބޮޑު ކޯޅުން އޮންނާނެ. ރައީސް (ޔާމީން 2018 އިގެ ރިޔާސީ އިންތިޚާބަށް) ކުރިމަތިލައްވައިފިއްޔާ ނައިބުރައީސަކަށް، މެޑަމް އޮފީހުންވެސް މިހާރު ނައިބުރައީސަކު ތައްޔާރުކޮށްގެން އުޅެނީ. ދެން އަނެއްކޮޅުން ވައި އޮފީސް، ޕާޓީ އޮފީހުންވެސް ނައިބު ރައީސަކު ތައްޔާރުކޮށްގެން އެ އުޅެނީ. އެހެންވީމަ އެއާވެސް ހަނގުރާމަ އެބަކުރޭ. މެޑަމްއަށް މި ހުރިހާއެއްޗެއް ރަނގަޅަށް އެނގޭނެ" ލަޠީފް ވިދާޅުވިއެވެ.

ލަޠީފް ވިދާޅުވީ މި ދަނޑިވަޅުގައި ރައީސް ޔާމީންއަށް އެންމެ ލާބަހުރި ގޮތަކީ 2018 ވަނަ އަހަރުގެ ރިޔާސީ އިންތިޚާބުގައި ވާދަކުރެއްވުމުގެ ވިސްނުންފުޅު އެމަނިކުފާނު ދޫކޮށްލެއްވުން ކަމަށެވެ.