ރައީސް ޔާމީން ބ. ކެންދޫ ބަނދަރު ހުޅުއްވައިދެއްވައިފި
މި ބަނދަރަކީ 600 ފޫޓު ދިގު، 200 ފޫޓު ފުޅާ ބަނދަރެއް
ރައީސް ޔާމީނަން ކެންދޫ އިން މަރުޙަބާ ދަންނަވަނީ
ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް، މިއަދު މެންދުރު ފަހު މާޅޮސްމަޑުލު ދެކުނުބުރީ ކެންދޫއަށް ވަޑައިގެން އެރަށުގެ ބަނދަރު ހުޅުއްވައިދެއްވައިފިއެވެ.
ކެންދޫގެ ބަނދަރު ސަރަހައްދުގައި ހޯމަ ދުވަހު މެންދުރު ފަހު ކުރިޔަށް ދިޔަ މި ރަސްމިއްޔާތުގައި ރައީސް ޔާމީންގެ އަރިހުން އެރަށުގެ ބަނދަރު ހުޅުއްވައިދެއްވުން އެދި ދެންނެވީ މިނިސްޓަރ އޮފް ހައުސިންގ އެންޑް އިންފްރާސްޓްރަކްޗަރ ޑރ. މުޙައްމަދު މުޢިއްޒެވެ. ރައީސް ޔާމީން ކެންދޫ ބަނދަރު ހުޅުއްވައިދެއްވުމުގެ ގޮތުން ހަނދާނީ ބިނާގެ ފަރުދާ ކައްސަވާ ދެއްވިއެވެ. މި ބަނދަރަކީ 600 ފޫޓު ދިގު، 200 ފޫޓު ފުޅާ ބަނދަރެކެވެ.
މި ރަސްމިއްޔާތުގައި މިނިސްޓަރު ޠާރިޤު އިބުރާހިމް ވަނީ ކެންދޫ ބޯފެނުގެ މަޝްރޫޢުގެ ޢަމަލީ މަސައްކަތް ފައްޓަވައިދެއްވާފައެވެ.
ރައީސް ޔާމީން ކެންދޫއަށް ވަޑައިގެންނެވުމުގެ ކުރިން ހޯމަ ދުވަހު ހެނދުނު ޅ. ހިންނަވަރަށް ވަޑައިގެން އެރަށުގައި ޤާއިމްކޮށްފައިވާ ރައްކާތެރި ބޯފެނުގެ ނިޒާމް އިފްތިތާޙު ކޮށްދެއްވިއެވެ.
ރައީސް ޔާމީން އާދީއްތަ ދުވަހު ހެނދުނު ފެއްޓެވި 3 ދުވަހުގެ މިދަތުރުފުޅުގައި ވަނީ މިލަދުންމަޑުލު ދެކުނުބުރީ މާޅެންދޫއަށާއި، ހެނބަދޫއަށާއި، ހޮޅުދޫ އަދި ވެލިދޫއަށް ޒިޔާރަތް ކުރައްވާފައެވެ. އާދީއްތަ ދުވަހު ޒިޔާރަތް ކުރެއްވި ރަށްތަކުގެ ތެރެއިން، މާޅެންދޫއަށް ވަޑައިގެން އެރަށު ބަނދަރާއި އެރަށު މިސްކިތް ހުޅުއްވައިދެއްވައި ހެނބަދޫގެ ނަރުދަމާ ނިޒާމުގެ ޢަމަލީ މަސައްކަތް ފަށްޓަވައިދެއްވައި، ހޮޅުދޫ އަދި ވެލިދޫގެ ބަނދަރު ވެސް ވަނީ ހުޅުއްވައިދެއްވާފައެވެ.
ރައީސުލްޖުމްހޫރިއްޔާގެ މި ދަތުރުފުޅުގައި، މިއަދާއި، މާދަމާ ވަޑައިގަތުމަށް ހަމަޖެހިފައިވާ ރަށްތަކުގައި ވެސް ސަރުކާރުން ކުރިއަށް ގެންދަވާ ބައެއް މަޝްރޫޢުތައް ފައްޓަވައި ދެއްވުމާއެކު، ބައެއް މަޝްރޫޢުތަކުގެ ނިންމުން ފާހަގަ ކުރުމުގެ ރަސްމިއްޔާތުގައި ބައިވެރިވެވަޑައިގެންނެވުމަށް ވަނީ ހަމަޖެހިފައެވެ.
