"ރައީސް ޔާމީންގެ ސިކުނޑީގައި މިހާރު ވެސް އުނިކަމެއް އުޅޭ"
25 ޑިސެމްބަރު 2017 | ހޯމަ 07:06ވޯޓް ދިނުމުގެ ކުރިން ވިސްނަންޖެހޭ ތިން ޝޯޓް ކަޓެއް ވިދާޅުވި
ރައީސް ޔާމީން ހިންނަވަރުގައި ވާހަކަ ދައްކަވަނީ: ޥޯޓު އެޅުމުގެ ކުރިން ވިސްނަންވީ ކަންތައްތަކެއް ވިދާޅުވި
ރައީސް އަބްދުﷲ ޔާމީން އަމިއްލަފުޅަށް އެމަނިކުފާނުގެ ސިކުނޑިފުޅުގައި އުނިކަމެއް ހުންނަ ކަމަށް ވިދާޅުވެއްޖެއެވެ.
ޅ. ހިންނަވަރު ފެނުގެ ނިޒާމު ފައްޓަވައި ދެއްވުމަށް ފަހު އެރަށުގައި ވާހަކަ ދައްކަވަމުން ރައީސް ޔާމީން ވިދާޅުވީ އެމަނިކުފާނުގެ ސިކުނޑިފުޅުގައި މިހާރު ވެސް އުނިކަމެއް ހުންނަ ކަމަށެވެ. އެމަނިކުފާނު މިހެން ވިދާޅުވީ ރިޔާސީ އިންތިހާބުގައި ވޯޓުލުމުގެ ކުރިން ރައްޔިތުން ވިސްނާލަންޖެހޭ ކަމަށް އެމަނިކުފާނު ގަބޫލުކުރައްވާ ތިން ކަމެއްގެ ވާހަކަ ދައްކަވަމުންނެވެ. އެމަނިކުފާނު އެކަން ސިފަކުރެއްވީ ރަނގަޅު ލީޑަރަކު ހޮވުމަށް "ޝޯޓް ކަޓް" އެއްގެ ގޮތުގައެވެ.
"ތިބޭފުޅުން ހިތާހިތާ ކޮށްލަންވީ ސުވާލަކީ، އަދި ޖޯލިފަތިތަކާއި ހޮޅުއަށިތަކުގައި ދައްކަވަންވީ ވާހަކައަކީ މިވެނި މީހަކު މިވެނި ކަހަލަ ވާހަކައެއް ދައްކައިފިޔޭ، ރައީސް ޔާމީން ވެސް ސްޕޭސްއަށްދާ ވާހަކަ ދައްކައިފިއްޔާ ޖައްވަށް ދަތުރުކުރާ ވާހަކަ ދައްކައިފިއްޔާ, ރައީސް ޔާމީނުގެ ސިކުނޑީގައި މިހާރުވެސް އުނިކަމެއް އުޅޭ، އެއިރުން އަދި އަނބުރާ އިޔާދަ ނުކުރެވޭ ވަރަށް ސިކުނޑި ގޯސްކަމަށް ނިންމަންވާނެ،" ރައީސް ޔާމީން ވިދާޅުވި އެވެ.
ރައީސް ޔާމީން ވިދާޅުވީ ރަށްރަށުގައި ނަރުދަަމާ އާއި ފެނުގެ ނިޒާމު ނެތް ވާހަކަ ދައްކަމުންދަނިކޮށް، ޚިޔާލުގައި ނުކުރެވޭ ވަރުގެ މޮޅު ވާހަކަ ދައްކާ ނަމަ އެއީ އެހެން ދުނިޔެއަކުން އައިސްގެން އުޅޭ އޭލިއަނެއް ކަމަށް ގަބޫލުކުރަންޖެހޭ ކަމަށެވެ. ރައީސް ޔާމީން ވިދާޅުވީ އެކަހަލަ ވާހަކަ ދައްކާ މީހުންގެ ނަން ވޯޓު ކަރުދާސް ކޮޅުގައި ހިމެނުމުގެ ކުރިން އެފަދަ މީހުންނަަށް ރަސްގެ ދޭންޖެހޭ ކަމަށެވެ.
"ރައީސް ޔާމީނު ވެސް ނާސާގެ އުޅަނދުފަހަރު ދަތުރުކުރާ ފަދައިން ސްޕޭސްއަށްދާ ވާހަކަ ދައްކައިފި ނަމަ މި ދެންނެވީ އެކަހަލަ ނުކުރެވޭ ވަރުގެ މޮޅު ވާހަކަ ދައްކައިފި ކަމަށް ވަންޏާ އެ ހިސާބުން ގަބޫލުކުރަންވާނެ މިއުޅެނީ އަދި އެހެން ދުނިޔެއަކުން އައިސް އުޅޭ އޭލިއަނެއްކަން، މުޅިން އެހެން ޖައްވަކުން އައިސް އުޅޭ އޭލިއަނެއް މިއުޅެނީ،" ރައީސް ޔާމީން ވިދާޅުވި އެވެ.
ރައީސް ޔާމީން ވިދާޅުވީ ރާއްޖެއަށް ގިނަ ޚިދުމަތްތަކެއް ކޮށްދެއްވި ސިޔާސީ ލީޑަރުން އެބަތިއްބެވި ކަމަށާއި މައްސަލައަކަށް ވަނީ އެއްކަމެއްގައި އެބޭފުޅުން ދައްކަވާ ވާހަކަ ތަފާތުވެގެންދިއުން ކަމަށެވެ.
"އެހެންވީމަ ރައްޔިތުންނަކަށް ފަސޭހައެއް ނޫން މިތަނުން ރަނގަޅަށް ވާހަކަ ދައްކަނީ ކާކުތޯ ބަލާކަށް، އަދި މި މައްސަލައަކީ ފައިސަލާ ކުރާކަށް ޝަރުއީ ކޯޓަކަށް ވައްދައިގެން ގޮތެއް ނިންމޭވަރުގެ މައްސަލައަކަށް ވެސް ނުވޭ،" ރައީސް ޔާމީން ވިދާޅުވިއެވެ.
ރައީސް ޔާމީން ވިދާޅުވީ ސިޔާސީ ބޭފުޅުން ތަފާތު ވާހަކަ ދެއްކިކަމުގައިވީ ނަމަވެސް، ވޯޓްލާ ދުވަހު ރައްޔިތުން ބުއްދީގެ ބޭނުން ހިފަންޖެހޭ ކަމަށެވެ. ރައީސް ވިދާޅުވީ ލީޑަރުންނާއި ހެޔޮއެދޭ މީހުން އިޚްތިޔާރު ކުރުމުގައި އެ މީހެއްގެ ދީނީ "ބެކްގްރައުންޑަށް" ބަލަންޖެހޭ ކަމަށެވެ.
"ދެކެވޭ ވާހަކަ އާއި ވާހަކަ ދައްކާ މީހުންގެ ބެކްގްރައުންޑް މާޒީއަށް ބަލާފައި އަޅުގަނޑުމެން ނިންމަން އެބަޖެހޭ، މީނަ މިދައްކާ ވާހަކައިން އަޅުގަނޑުމެން މިތިބަ މިސްރާބުގައި ނޫނީ އަޅުގަނޑުމެން މިތިބަ އަގީދާ މަތީގައި ތިބުމުގެ ސާބިތުކަން ކިހާވަރަކަށް ގެނެސްދޭނެތޯ. ވަރަށް ފަސޭހަ ސުވާލެއް ނޫންތޯ،" ރައީސް ޔާމީން ވިދާޅުވި އެވެ.
ރައީސް ޔާމީން ވިދާޅުވީ އިސްލާމީ އަގީދާގައި ތިބެން ބޭނުންވާ ކަމަށްވާ ނަމަ، ދީނީ ބެކްގްރައުންޑް ބެލުމުން ފެއިލްވާނެ ލީޑަރުންތައް އިންތިހާބުގެ ކުރިން ކަށަވަރުކޮށް އެފަދަ ލީޑަރުންނަށް ރަސްގެ ދޭންޖެހޭ ކަމަށެވެ.
ތިން ވަނަ ކަމެއްގެ ގޮތުގައި ރައީސް ޔާމީން ވިދާޅުވީ ވޯޓު ދިނުމުގެ ކުރިން، ވައުދުވާ ކަންތައްތަކާއި ދައްކާ ވާހަކަތައް ހަގީގަތަކަށް ހެދުމުގެ އިލްމީ ގާބިލުކަމާއި ކުޅަދާނަކަން އެ މީހެއްގެ ކިބައިގައި ހުރިތޯ ބަލަންޖެހޭ ކަމަށެވެ. ރައީސް ޔާމީން ވަނީ މި ކަންތައްތަކާ މެދު ވިސްނުމަށް ރައްޔިތުންނަށް ގޮވާލައްވާފައެވެ.
