ފިލިޕީންސްގެ ޝޮޕިންގ މޯލެއްގައި ރޯވެ މަދުވެގެން 37 މީހުން މަރުވެއްޖެ
25 ޑިސެމްބަރު 2017 | ހޯމަ 02:47ރައީސް ޑުޓާޓެ ވަނީ ރޯވި ސަރަހައްދަށް ޒިޔާރަތްކުރައްވާފައި
އަލިފާން ކޮންޓްރޯލް ކުރުމަށް ގަޑިއިރުތަކެއް ހޭދަވި
ފިލިޕީންސްގެ ދެކުނުގެ ޑަވާއޯ ސިޓީގެ ޝޮޕިންގ މޯލެއްގައި ހިނގި އަލިފާނުގެ ހާދިސާއެއްގައި މަދުވެގެން 37 މީހުން މަރުވެއްޖެ ކަމަށް އެ ސިޓީގެ އޮފިޝަލުން ބުނެފިއެވެ.
އިމާރާތުގެ ތިން ވަނަ ބުރީގައި ރޯވުމަށް ފަހު އޭގެ މައްޗަށް އަލިފާންގަނޑު ފެތުރިގެން ގޮސްފައިވާއިރު އަލިފާން ނިއްވުމުގެ މަސައްކަތްކުރާ ފަރާތްތަކުން ވަނީ އަލިފާން ކޮންޓްރޯލްކުރުމަށްޓަކައި އެތައް ގަޑިއިރުތަކެއް ހޭދަކޮށްފައެވެ. ކޯލް ސެންޓަރުގެ މުވައްޒަފުން ވަނީ އިމާރާތުގައި ތާށިވެފައެވެ.
ޑަވާއޯގެ މޭޔަރުގެ ނާއިބު ވިދާޅުވީ އެމީހުން ސަލާމަތްކުރެވުމުގެ ފުރުސަތު ކުޑަ ކަމަށެވެ.
މޭޔަރުގެ ނާއިބުގެ ބައްޕާފުޅު އަދި އެ ގައުމުގެ ރައީސް ރޮޑްރިގޯ ޑުޓާޓެ ވަނީ ހާދިސާ ހިނގި ސަރަހައްދަށް ޒިޔާރަތްކުރައްވާފައެވެ.
އެ ސިޓީގެ ރައްޔިތެއް ކަމަށްވާ ޑުޓާޓެ ވަނީ އެންސީސީސީ މޯލްގެ ބޭރުގައި ތިބި އާއިލާތަކާ ބައްދަލުކުރައްވާފައެވެ.
ހޮނިހިރު ދުވަހުގެ ހެނދުނު ހިނގި އަލިފާނުގެ މި ހާދިސާ ކަމާ ބެހޭ ފަރާތްތަކުން މިހާރު ގެންދަނީ ތަހުގީގުކުރަމުންނެވެ.
ފިލިޕީންސް ސްޓަރ ވެބްސައިޓްގައި، އެ މޯލްގެ މެނޭޖަރ، ޖައްނާ އަބްދުﷲ މުއްތަލިބްއާ ހަވާލާދީ ބުނެފައި ވަނީ އަލިފާން ރޯވީ މޯލްގެ ތިން ވަނަ ބުރީގައި ކަމަށާއި އެއީ އަންނައުނާއި ގޭތެރޭގައި ހިފައިގެންގުޅޭ ބައެއް ސާމާނުގެ އިތުރުން ފަރުނީޗަރު ހުންނަ ތަން ކަމަށެވެ.
