ރައީސް ޔާމީން ނ. ހޮޅުދޫ ބަނދަރު ހުޅުއްވައި ދެއްވައިފި
24 ޑިސެމްބަރު 2017 | އާދީއްތަ 09:14900 ފޫޓު ދިގު އަދި 200 ފޫޓު ފުޅާ ބަނދަރެއް
ރައީސް އަބްދުﷲ ޔާމީން ނ. ހޮޅުދޫގައި
ނ. ހޮޅުދޫގައި އަލަށް ހަދާފައިވާ ބަނދަރު ރައީސް އަބްދުﷲ ޔާމީން ހުޅުއްވައި ދެއްވައިފިއެވެ.
ހޮޅުދޫގެ ބަނދަރު ސަރަހައްދުގައި އާދިއްތަ ދުވަހުގެ މެންދުރުފަހު ބޭއްވި ހަފުލާގައި ރައީސް ޔާމީން ވަނީ ހޮޅުދޫގެ ބަނދަރު އިފްތިތާހުކޮށްދެއްވުމުގެ ގޮތުން ހަނދާނީ ބިނާގެ ފަރުދާ ކައްސަވާ ދެއްވާފައެވެ.
ހޮޅުދޫ ބަނދަރަކީ 900 ފޫޓު ދިގު އަދި 200 ފޫޓު ފުޅާ ބަނދަރެކެވެ. އެ ބަނދަރު 300 ދުވަހުގެ ތެރޭގައި ނިންމުމަށް އެމްޓީސީސީއާ ހަވާލުކުރީ 2014 ވަނަ އަހަރުގެ ފެބްރުއަރީ މަހުގެ ތެރޭގައެވެ. ބަނދަރުގެ އަމަލީ މަސައްކަތް ފެށީ 2014 ވަނަ އަހަރުގެ މާޗް މަހުގައެވެ.
މިއީ ދައުލަތުގެ ބަޖެޓުން 61 މިލިއަން ރުފިޔާ ޚަރަދުކޮށްގެން ހިންގާފައިވާ މަޝްރޫއެކެވެ.
އާދިއްތަ ދުވަހު ރައީސް ޔާމީން ފެއްޓެވި ތިން ދުވަހުގެ މިދަތުރުފުޅުގައި މިލަދުންމަޑުލު ދެކުނުބުރީގެ ބައެއް ރަށްރަށާއި، ފާދިއްޕޮޅު ހިންނަވަރަށާއި މާޅޮސްމަޑުލު ދެކުނުބުރީގެ ބައެއް ރަށްރަށަށް ވަޑައިގެންނެވުމަށް ވަނީ ހަމަޖެހިފައެވެ.
އެމަނިކުފާނުގެ މި ދަތުރުފުޅުގައި، ބައެއް ރަށްރަށުގައި ސަރުކާރުން ހިންގާ ބައެއް މަޝްރޫއުތަކުގެ ނިންމުން ފާހަގަކުރެއްވުމާއެކު ސަރުކާރުން ބައެއް ރަށްރަށުގައި ކުރިއަށް ގެންދަވާ މަޝްރޫއުތައް ފައްޓަވައި ދެއްވުމަށް ވަނީ ހަމަޖެހިފައެވެ.
