ނ. މާޅެންދޫ ބަނދަރު ރައީސް ޔާމީން ހުޅުއްވައި ދެއްވައިފި
26 މިލިއަން ރުފިޔާ ޚަރަދުކޮށްގެން ހަދާފައިވާ ބަނދަރެއް
ރައީސް ޔާމީން މާޅެންދޫގައި، ބަނދަރުގެ އިތުރުން މިސްކިތެއް ހުޅުއްވައި ދެއްވާނެ
ނ. މާޅެންދޫގައި މިއަހަރުގެ ކުރީކޮޅި އަލަށް ތަރައްގީކޮށް ނިންމާލި ބަނދަރު ރައީސް އަބްދުﷲ ޔާމީން ހުޅުއްވައިދެއްވައިފި އެވެ.
އުތުރުގެ ތިން އަތޮޅަކަށް ރައީސް ޔާމީން އާދިއްތަ ދުވަހު ފެއްޓެވި ދަތުރުފުޅުގައި އާދިއްތަ ދުވަހުގެ ހެނދުނު މާޅެންދޫއަށް ވަޑައިގެން އެރަށުގެ ބަނދަރު ހުޅުއްވައި ދެއްވިއިރު، އެ ބަނދަރަކީ 26 މިލިއަން ރުފިޔާ ޚަރަދުކޮށްގެން ހަދާފައިވާ ބަނދަރެކެވެ.
ދިގުމިނުގައި 800 ފޫޓޫ އަދި ފުޅާ މިނުގައި 250 ފޫޓު ހުންނަ އެ ބަނދަރު ތަރައްގީ ކުރީ އެމްޓީސީސީއިންނެވެ. ބަނދަރު ވަށައިގެން ބޮޑު ހިލަ ޖަހާފައިވާއިރު، ބަނދަރު ހިމެނޭ ސަރަހައްދުގައި ވަނީ ގައުވެސް އަޅާފައެވެ. މީގެއިތުރުން، ބަނދަރު ސަރަހައްދުގައި ބައްތިވެސް ޖަހާފައިވެއެވެ.
މާޅެންދޫ ބަނދަރު ތަރައްގީކުރުމުގެ މަސައްކަތް ފެށީ 2016 ވަނަ އަހަރުގެ ޖެނުއަރީ މަހުގެ ތެރޭގައެވެ. އަދި އެ މަސައްކަތް ނިންމާލާފައިވަނީ މިއަހަރުގެ ކުރީކޮޅުއެވެ.
މާޅެންދޫއަށް ރައީސް ޔާމީން ކުރައްވާ ދަތުރުފުޅުގައި، ސައުދީ އަރަބިއްޔާގެ ސަރުކާރުގެ އެހީގައި އެރަށުގައި ހަދާފައިވާ މިސްކިތެއްވެސް ހުޅުއްވައި ދެއްވުމަށް ވަނީ ހަމަޖެހިފައެވެ.
